VOV4.K’ho- Tềng đap bơta kòp Covid-19 gam gơlik geh kal ke ngan, git nđờ rhiang nă cau bơsram dờng gah lơh sơnơm tàm càr Dăk Lăk neh cih mat tus bal is dong kờl rơcang sơndră kòp, pơgồp bal bơta pràn mờ mpồl lơh broă lơh sơnơm tàm mpồl lam lài sơndră kòp.

Mờr 2 nhai do, cau bơsram dờng Trần Ngọc Hải mờ mpồl cau bơsram dờng lơh broă dong kờl is bơh Khoa Y Dược, hìu bơsram Đại học Tây Nguyên dê tus bal dong kờl broă lơh rơcang sơndră kòp bơtờp tàm Hìu sơnơm ƀòn dờng Buôn Ma Thuột, càr Dăk Lăk. Pah ngai lơh broă bơh mpồl dê sơn đờm bơh 7 jơ 30 phuk drim mờ jŏ jòng tus 11 jơ mang, geh tŭ geh ală ngai pal lơh broă tus 4 jơ àng drim ngai tơnơ̆ hơ̆ sồng jơh. Broă lơh khi dê là tam pà ală bơta mẫu, ai mẫu lơh xét nghiệm mờ tơmut jơnau yal tơnggit. Trần Ngọc Hải yal, klo yal Sở Y tế hòi jà cau bơsram dờng tus bal is dong kờl rơcang sơndră kòp Covid-19, bi neh cih mat tus bal mờ neh geh 2 dơ̆ mut tàm tiah tờm gơbàn kòp: “Oh cih mat tus bal rơcang sơndră neh 2 dơ̆, dơ̆ sơn rờp oh lòt tàm càr Bình Dương, tơnơ̆ hơ̆ geh hòi rê mờ oh cih mat lòt dong kờl tàm ƀòn dờng Buôn Ma Thuột. Oh gŏ là dùl nă cau bơsram dờng gah lơh sơnơm den he pal cih mat lòt dong kờl rơcang sơndră kòp nàng dà lơgar mhar jơh kòp mờ he gơtùi tă pơgồp bơta pràn cau kơnòm să dà lơgar dê kàr lơi ai dà lơgar in den he tă pơgồp.”

Bal mờ ală mpồl lơh broă ndai, ală cau bơsram dờng gah lơh sơnơm tàm Dăk Lăk gam jơh nùs ngai mang dong kờl rơcang sơndră kòp

Kung bè Trần Ngọc Hải sơl, bơh nhai 6 tus tŭ do neh geh git nđờ rhiang nă cau bơsram dờng gah lơh sơnơm tàm càr Dăk Lăk cih mat tus bal dong kờl mpồl lam lài rơcang sơndră kòp. Bal mờ dong kờl ai càr Bình Dương in, cau bơsram dờng lơh broă dong kờl is gam geh tam pà kơnòl lòt dong kờl tàm Hìu sơnơm ƀòn dờng Buôn Ma Thuột, Anih tờm gròi sền kòp tê jê să càr, tus dong kờl broă lơh lùp sền bơta gơ rềng bơtờp kòp, tơmut jơnau yal tonggit, xét nghiệm kòp Covid-19, dong kờl xét nghiệm mhar ai làng bol tàm ală anih wàng se in... Sơrlèt gan ală kal ke, bòl glar bơh broă lơh dê mờ jơnau kơlôi rơcang rơngòt bơtờp kòp, ală cau bơsram dờng ndrờm gŏ chờ hờp mờ pơn iờ să tài să tờm neh tă pơgồp geh dùl bơnah bơta pràn tàm broă lơh kơryan kòp Covid-19. Do kung là tŭ ƀuơn nàng tơl nă cau bơsram dờng geh ngui jơnau git wă neh bơsram tàm bơta geh ngan kung bè prap gàr is he in uă mờng chài ngan ngồn ai broă lơh tơnơ̆ do in. Cau bơsram dờng Nguyễn Thị Thanh Nga, Khoa Y Dược, hìu bơsram Đại học Tây Nguyên yal: “Bơh sơn rờp tŭ Sở Y tế mờ hìu bơsram hòi jà ală mpồl lơh broă tus bal rơcang sơndră kòp den oh neh cih mat tus bal nàng dong kờl ală oh mi gah lơh sơnơm, kờp tus tŭ do kung neh 4 nhai. Oh kung kờñ tă pơgồp dùl bơnah bơta pràn he dê nàng dong ƀòn dờng kơryan kòp bơtờp, kơp kờñ Dăk Lăk kung bè Buôn Ma Thuột mhar kơryan gơtùi kòp bơtờp.”

Ală cau bơsram dờng lơh broă dong kờl is gah lơh sơnơm geh ai tus dong kờl Hìu sơnơm ƀòn dờng Buôn Ma Thuột

Mờ bơta jơh nùs bơh cau kơnòm să dê, ală cau bơsram dờng ndrờm lơh broă jơh nùs mờ geh kơnòl. Bơta jơh nùs khi dê geh làng bol cih dờp mờ đơs niam ngan. Mò Nguyễn Thị Thanh Hương, atbồ ƀòn Alê A, sơnah ƀòn Ea Tam, ƀòn dờng Buôn Ma Thuột pà git: “Tàm tơngai lài den tàm ƀòn añ geh ală oh mi cau bơsram dờng Hìu bơsram Đại học Tây Nguyên tus pơgồp bal niam ngan, jơh nùs ngan mờ lơh broă jơh kơnòl bơh cau bơsram dờng dê. Đơs bal bơta pơgồp bal đah ƀòn mờ ală cau bơsram dờng kung niam ngan. Lài mờ tŭ cau bơsram dờng tus den añ kung yal mờ cau bơsram dờng nàng tơl nă cau in git anih mờ he lơh xét nghiệm tềng lơi. Ală oh bơsram dờng tus is mờ đơs bal là niam ngan, jơh nùs ngan mờ làng bol.”

Bulah kong mờ uă jơnau pơhìn mơya ală cau bơsram dờng gah lơh sơnơm tàm Dăk Lăk kung gam ngai mang jơh nùs bal mờ mpồl lơh sơnơm lơh kơnòl broă tàm mpồl lam lài sơndră kòp. Khi kung mìng kơp kờñ mờ bơta tă pơgồp he dê geh pơgồp bơnah gờñ kơryan kòp bơtờp nàng să tờm kung bè ală cau y bác sĩ gam lơh kơnòl broă gờñ geh rê wơl mờ hìu bơnhă; ală tiah ờ geh kòp, tiah ờdo ờdă geh hời rơ hời rề ơnàng mờ rài kis geh gờñ gơ rê bè ờs wơl. Tŭ mờ kòp bơtờp gam gơlik geh kal ke, den mờ nùs nhơm geh kơnòl, ală cau bơsram dờng gah lơh sơnơm kung geh pơn jat tai lam lài lơh broă dong kờl is nàng dong mpồl lam lài sơndră kòp. Cau bơsram dờng Nguyễn Đức Duy, Khoa Y Dược, hìu bơsram Đại hocj Tây Nguyên đơs nền bơta lơh ngan: “Tàm tơngai tus mờ kòp bơtờp gam pơn jat tai gơlik geh kal ke den oh kung geh tus bal sơl. Tŭ tus bal den oh kung kơp kờñ he gơtùi tă pơgồp dùl bơnah bơta pràn he dê nàng dong kòp bơtờp mhar geh kơryan nàng bol he gơtùi rê wơl mờ rài kis bè ờs.”

Mpồl cau bơsram dờng bơh Hìu bơsram Đại học Tây Nguyên dê lòt gùng dong kờl càr Bình Dương rơcang sơndră

Bơh tŭ kòp Covid-19 bơtờp dơ̆ 4 tus tŭ do, càr Dăk Lăk neh hòi jà mờr 800 nă cau bơsram dờng, kuang bàng mờ cau lơh broă bơh ală hìu bơsram đại học tàm càr nàng dong kờl ală mpồl lơh broă tàm mpồl lam lài rơcang sơndră kòp. Mờ bơta pràn cau kơnòm să, nùs nhơm lam lài, sơrlèt gan ală kal ke, glar bòl mờ ngòt rơngơt, ală cau bơsram dờng gah lơh sơnơm neh jơh nùs ngui ală jơnau git wă, mờng chài bơsram gah broă lơh geh bơto bơtê, tus bal mờ mpồl kuang bàng, cau lơh sơnơm lam lơh kơnòl broă, pơgồp bal bơta pràn kơryan kòp Covid-19 nàng gờñ ai rài kis gơ rê bè ờs wơl.

Cau mblàng K’Duẩn