VOV4.K’ho - Ngai òr (24/08), Sở Y tế càr Dăk Lăk neh dờp geh 1 nă cau kòp tai gơtìp chơ̆t tài bơh kòp Covid-19. Do là cau dơ̆ 4 gơtìp chơ̆t tài kòp Covid-19 tàm càr Dăk Lăk. Cau do là cau kòp Covid-19 geh sồ 161 rơbô 832, deh nam 1989, tàm hìu sồ 54 gùng Ama Jhao, sơnah ƀòn Tân Lập, ƀòn dờng Buôn Ma Thuột.

Cau kòp do neh geh kòp bè bơta ờ ngăc ngar bồ tơngoh, gơtìp kơrwài. Cau kòp 161 rơbô 832 neh gŏ mờ virus Sars CoV-2 bơh ngai 02 nhai 8 mờ geh cèng sơm kòp tàm hìu sơnơm ing sồ 1. Ngai 03 nhai 8, cau kòp do geh jun tus hìu sơnơm kòp bơsiă jòr gơlik mhàm mờ kòp klờm soh càr Dăk Lăk. Tus ngai 15 nhai 8, kòp gơtìp jroă rơlao den tàng cau kòp sồ 161 rơbô 832 geh jun tus tiah sơm kòp cau kòp Covid-19 tàm hìu sơnơm tiah Tây Nguyên. Tơnơ̆ mờ 9 ngai sơm kòp tàm hìu sơnơm tiah Tây Nguyên, tus tàm tŭ 4 jơ 15 phút mho ngai 23 nhai 8, cau kòp sồ 161 rơbô 832 gơtìp chơ̆t. Hìu sơnơm tiah Tây Nguyên neh bơyai lơh sră nggal geh kuơ nàng bơsong ƀồc cau kòp di mờ kơrnoăt tàm adăt boh lam dê.

Cau mblàng Ndong Brawl