VOV4.K’ho – Trung thu nam do là dùl tŭ krơi is ngan gơ wèt tus mờ uă oh dềt gam ơm tàm ală anih sơm kòp, anih tam cah is, anih wàng se nàng rơcang sơndră kòp Covid-19 tàm càr Dăk Lăk. Ờ duh hồl, nggồr nggàc sap jañ sơnggơr tamya đăng grài halà ală hoàt hoạ bi Hằng, wa Cuội, ală oh dềt kung gam gŏ gơ lơh ram mhŭ rlau tŭ dờp geh ală phan pà Trung thu mờ bơta gròi sền bơh ală mpồl cau mờ ală cau gam lơh broă tàm do.

Dờp kơldung pà phan Trung thu bơh ală mpồl dong kờl tus tàm hìu jàu pa, oh H’ Samuel Adrơng, ơm tàm ƀòn Pưk Prong, xã Ea Ning, kơnhoàl Cư Kuiñ yal, do là Trung thu krơi is ngan rlau jơh gơ wèt tus mờ oh bơh lài tus tŭ do. Tàm tơngai do ală nam lài, oh mờ oh ùr chờ hờp ngan kơp gơn nàng rò đèng gŭ lòt hờ hìu chài rơgơi ƀòn mờ geh ală bi tàm đoàn ơruh pơnu bơyai lơh đơs crih tamya, sền wa Cuội, bi Hằng. Nam do, tài kòp Covid-19 gơlik geh kal ke, ƀòn Pưk Prong pal wàng se nàng rơcang sơndră kòp den tàng nùs nhơm ngai Trung thu tàm ƀòn kung gơ lơh ngềt ngơt rlau. Bulah bè hơ̆, oh kung gam chờ hờp ngan tài bơh geh dờp phan pà Trung thu di tàm ngai Trung thu nàng 2 nă oh mi sa is ƀañ kèu Trung thu tàm hìu: “Oh chờ hờp ngan geh dờp phan pà bơh ală bi dê, nàng bol oh geh dùl dơ̆ sa tềp Trung thu chờ hờp. Oh ưn ngài ală bi tàm Hội đồng đội càr mờ Hìu chài rơgơi ơruh pơnu kơnòm pa tàu kơnòm dềt càr Dăk Lăk neh pà phan oh in”.

Rơcang phan pà Trung thu ală sau in

Tàm anih sơm kòp ing sồ 1 càr Dăk Lăk ală ngai do gơ lơh chờ hờp rlau. Bal mờ broă lơh gròi sền, sơm ală cau kòp in, ală kuang bàng, cau lơh broă tàm do gam ala mat ală cau, ală mpồl dong kờl tus tơl cơldŭ nàng pà phan Trung thu ai ală sau dềt gam sơm kòp Covid-19 in. Bác sĩ chuyên khoa 2 Phạm Thị Tuyết Nhung, Phó Kuang atbồ Hìu sơnơm ing sồ 1 pà git, tàm do, tŭ do gam dờp mờ sơm mờr 500 nă cau kòp in, tàm hơ̆ geh 117 nă kơnòm dềt, sau dềt ngan rlau jơh mìng rơp pa rlau 1 nhai. Tŭ do, pràn kơldăng să jan ală cau kòp dê ndrờm niam, bơta pràn wơl să jan dê niam. Ală ngai do, hìu sơnơm dờp geh bơta sền gròi bơh ală mpồl lơh broă, mpồl cau dê, bơh kuang bàng, cau lơh broă hìu sơnơm nàng pà phan Trung thu ai ală sau in. Bác sĩ Phạm Thị Tuyết Nhung đơs là, do là broă lơh kuơmàng ngan, dong pơn jờng nùs nhơm ală sau dê, kơnờm bơh hơ̆ dong ală sau gàr kơ̆ nùs nhơm, chờ hờp pin dờn rlau, pơgồp bơnah tơrmù lơyah tŭ tơngai sơm kòp mờ tơnguh bơta pràn sơndră kòp, bơta pràn ờ bơtờp kòp nàng mhar bời kòp: “Ală oh dềt tàm do ờ mìng geh sơm kòp, geh gròi sền mờ gam geh pơlam, lơh bè lơi nàng ală oh in git sơrlèt gan kal ke să tờm dê, sơrlèt gan kòp jê nàng gờñ geh rê mờ hìu bơnhă. Trung thu nam do hìu sơnơm kung geh ală cau geh nùs nhơm niam tus pà phan bè do den kung chờ hờp ngan mờ kung pơgồp bơnah tàm broă mhar bơsong ală kal ke, sơrlèt gan kòp jê nàng rê mờ hìu bơnhă, mờ ƀòn lơgar”.

Ală phan pà geh pơyua bơh ală cau lơh broă tàm hìu sơnơm mờ anih tam cah is nàng jàu ală sau in

Tềng đap bơta kòp Covid-19 gơlik geh kal ke, uă tiah tàm càr Dăk Lăk gam pal tam cah is, wàng se nàng rơcang sơndră kòp. Mờ bơta kơp kờñ cèng wơl ală oh dềt in dùl kàl Trung thu ram mhŭ mờ bềng bơta kuơ, ală kấp bộ Đoàn, Mpồl, Đội tàm càr neh pơgồp bal mờ anih lơh broă, mpồl lơh broă mờ cau geh nùs nhơm niam bơyai lơh broă lơh sa tềp Trung thu mờ tơngume “Đèng gŭ sòl àng bơta kơp kờñ – Tam pà bal mờ oh dềt, at tê bal sơrlèt gan kòp dờng”. Bi Trần Doãn Tới, Phó Bí thư Tỉnh đoàn Dăk Lăk pà git, broă lơh geh pơyua tus ală oh ală bơnah phan pà, bañ Trung thu, priă dong kờl bơsram, đèng gŭ, dà toh mờ phan ngui bơsram. Gơ jat tàm broă gơlik geh ngan ngồn tàm ală tiah, mpồl duh broă đoàn geh lam lơh ală broă lơh dipal cèng bơta kuơ ngan ngồn nàng di tŭ dong kờl mờ pơn jờng ală oh tàm dơ̆ sa tềp Trung thu nam do. Mìng is gơ wèt mờ kấp càr, Hội đồng đội càr pơgồp bal mờ ală cau dong kờl geh jàu pà 500 bơnah phan tus ală oh dềt geh rài kis kal ke mờ ală oh gam sơm kòp halà gam tam cah is, wàng se nàng rơcang sơndră kòp Covid-19: “Gơ wèt mờ ală mpồl, ală tiah ờ geh kòp, tiah geh jơnau pơhìn bơtờp kòp uă, tiah geh jơnau pơhìn bơtờp kòp dùl êt, tiah geh jơnau pơhìn bơtờp kòp uă ngan den rơ wah ală broă lam lơh dipal, lơh bè lơi nàng ală sau geh rài kis kal ke, ală sau tàm anih wàng se, ală sau kòn đời, kơnòm dềt kuet kơlte geh nùs nhơm sa tềp Trung thu ram mhŭ tàm bơta ờ tơrgùm gal cau. Gơ wèt mờ kấp càr den Ban Thường vụ Tỉnh đoàn, Hội đồng đội càr neh bơyai lơh tàm hìu sơnơm ing mờ ală hìu sơnơm tàm tiah hơ̆ nàng gròi sền mờ ai nùs nhơm sa tềp tung thu tus mờ ală sau”.

Ală phan pà dềt mơya geh kuơ tus di tŭ mờ ală sau tàm kàl Trung thu nam do

Dùl kàl Trung thu tus krơi mờ ală nam lài, tài gơ rềng bơh kòp Covid-19, uă kơnòm dềt Dăk Lăk bal mờ gùt lơgar ờ gơtùi rò đèng gŭ, sa bañ kèu Trung thu halà sền tamya đăng grài. Bulah bè hơ̆, mờ bơta gròi sền bơh gơnoar atbồ mờ ală mpồl, gah broă lơh, mpồl cau, ală oh neh geh wă rò kàl Trung thu ram mhŭ mờ geh kuơ bal mờ ală phan pà pơn jờng di tŭ mờ ngan ngồn.

Cau mblàng K’Duẩn