VOV4.K’ho - Tơnơ̆ mờ tŭ ală cau F1 geh 3 dơ̆ xét nghiệm ờ gŏ mờ virus Sars CoV-2, rơlao 14 nă làng bol kis tàm tiah kơrian kung ai geh cồng nha 2 dơ̆ xét nghiệm ờ gŏ mờ kòp, poh lài, UBND càr Dak Lak neh tơlĭk kơrnoăt tơn jơh wàng se gơwèt mờ ƀòn ơm kis tềng gùng kòn 189/1 gùng Mai Hắc Đế, sơnah ƀòn Tân Thành, ƀòn dờng Buôn Ma Thuột, càr Dak Lak-do là tiah geh dờp 2 nă cau gơtìp kòp Covid-19. Chờ hờp tài neh geh tơn jơh wàng se, mơya làng bol bañ sền ờ sơ̆p, ờ sền gròi nền nòn mờ broă sơndră mờ kòp Covid-19.

Lài mờ tŭ tơn jơh wàng se, ală kuang bàng lơh sơnơm tàm broă soh phan sền gàr să jan neh ƀồm sơnơm lơh kloh vi khẩn dơ̆ dŭt ndơl tàm tiah ƀòn tềng gùng kòn 189/1 gùng Mai Hắc Đế, sơnah ƀòn Tân Thành, ƀòn dờng Buôn ma Thuột-do là tiah geh dờp 2 nă cau gơtìp kòp Covid-19.

                                                          Mpồl lơh broă geh gơnoar tă che wàng se

Tơnơ̆ mờ hơ̆, ală pơngàr, anih kơrian geh tă sờr jơh. Kuang đơng lam UBND sơnah ƀòn Tân Thành yal kơrnoăt tơn jơh wàng se mờ jào sră dờp neh lơh jơh tơngai tam cah is gơwèt mờ rơlao 100 nă công nhân. Dờp sră yal neh jơh tơngai wàng se, ồng Bùi Trung Khánh pà gĭt: “Bol añ chờ hờp ngan, tài tàm tơngai pa do kung neh lơh jăt niam kơrnoăt bơh dà lơgar, bơh Chính phủ bè broă tam cah ngài broă lơh sơnơm, lơh jăt nền nòn ală kơrnoăt bơh gơnoar atbồ tàm do ai. Tàm tơngai tus, bol añ kung pal tam cah is tau tàm hìu mờ sền gròi bơta pràn kơl dang să jan 7 ngai tai, tŭ hơ̆ di lah bơta pràn kơl dang să jan bơh să tờm geh niam den lòt lơh broă bè ờs”.

Lài mờ hơ̆, tàm mang ngai 08 nhai 5, dờp geh 1 nă cau gơtìp mờ kòp Covid-19 tềng gùng kòn 189/1 gùng Mai Hắc Đế là cau kòp sồ 3237. Tàm mang ngai 08 nhai 5 tơn, càr Dak lak neh tơlĭk kơrnoăt wàng se, tam cah is ƀòn ơm kis tềng gùng dềt 189/1 mờ 47 hìu, 144 nă cau. Tàm broă wàng se, gah lơh sơnơm neh ai phan xét nghiệm 2 dơ̆ ai jơh ală cau kis tàm do, ndrờm pà gŏ cồng nha ờ gŏ mờ virus Sars CoV-2.

                          Làng bol kis tàm tiah wàng se chờ hờp dờp sră neh jơh tơngai wàng se

Mò Lê Thị Ngọc Hương, kis tàm ƀòn gùng kòn 198/1 gùng mai Hắc Đế, sơnah ƀòn Tân Thành, ƀòn dờng Buôn Ma Thuột đơs: “Tơnơ̆ mờr 20 ngai gơlơh ngoh rơngăc ngar mờ kung kơ̆p kờñ là ờ geh cau lơi pal kis tàm bơta bè do. Bŭ lah mờr 20 ngai kis tàm bơta wàng se gơtìp ờ sŭk ngan, mơya bơh broă sền gròi bal pà gŏ ală cau kung dùl nùs bal sơl, kung kơ̆p kờñ kòp mhar jơh, nàng kòp bañ gơtìp tus tai tàm aolă ƀòn ơm kis bè do tai”.

Ƀòn ơm kis gơtìp wàng se tềng gùng kòn 189/1, gùng Mai Hắc Đế, sơnah ƀòn Tân Thành, ƀòn dờng Buôn Ma Thuột geh 47 hìu mờ rơlao 140 nă cau, tàm hơ̆ geh 20 hìu ơm tàm hìu ơpah, là cau lơh broă khăt gơboh. Tàm tơngai tam cah is ƀòn, bal mờ broă ai geh tơl phan sa nàng gàr niam bơta lơngăp lơngai, tam dră mờ kòp, gơnoar atbồ tàm do kung hòi jà ală cau geh nùs nhơm niam dong kờl phan sa mờ phan ngui nàng gàr niam rài kis làng bol in. Jăt mờ hơ̆, neh geh mờr 50 tơlăk đong; rơlao 5 tấn biăp, plai chi; mờr 15 tấn phe mờ gĭt nđờ rơhiang thùng ƀung mi mờ uă phan ngui ală bơta ndai neh geh ală cau geh nùs nhơm niam pà làng bol kis tàm do in.

Mò Trần Thị Dinh, Phó Chủ tịch UBND sơnah ƀòn Tân Thành, ƀòn dờng Buôn ma Thuột, càr Dak Lak pà gĭt: tàm tơngai tus, bŭ lah neh tơn jơh wàng se, gơnoar atbồ ƀòn lơgar tàm do gam pơn jăt tai geh ală broă sền gròi bơta pràn kơl dang să jan ală cau tàm òn do in nàng di tŭ bơsong di lah gơtìp. “Tơnơ̆ mờ tŭ neh tơn jơh wàng se den mpồl đơng lam sơndră mờ kòp Covid-19 bơh sơnah ƀòn pơn jăt tai sền gròi, lam sồr làng bol pơn jăt tai lơh jăt niam broă sơndră mờ kòp Covid-19 tŭ do. Làng bol di lah gŏ bơsiă, duh să, jê rơnồng dờ, jê bồ den lùp tus hiù sơnơm sơnah ƀòn Tân Thành nàng geh gùng dà broă lơh mùl màl”.

Jăt bác sĩ Nguyễn Trung Thành, Phó kuang atbồ Sở Y tế càr Dak Lak yal, gah lơh sơnơm neh hòi jà ală cau tus bal tàm broă sơndră mờ kòp Covid-19, tàm hơ̆ geh lơh sơnơm xã, sơnah ƀòn, thị trấn tàm càr pơgồp bal dờng màng ngan tàm cồng nha broă sền gròi kòp. Là tiah lài mờ là mpồl lơh sơnơm rềp mờ làng bol ngan den tàng broă lơh sơnơm tàm ală tiah, tàm hơ̆ geh hìu sơnơm xã, sơnah ƀòn, thị trấn geh gơnoar kuơ màng tàm broă sơndră mờ kòp Covid-19.

Tơngai do, tŭ tàm càr Dak Lak geh dờp 3 nă cau geh gŏ mờ virus Sars CoV-2, ală hìu sơnơm xã, sơnah ƀòn, thị trấn ndrờm geh ai mpồl kuang bàng lơh broă ngai kung bè mang nàng sơndră mờ ală bơta gơtìp bơh kòp gơtờp. Mờ tơnguh broă sền gròi bơta pràn kơl dang să jan làng bol kis tàm ƀòn, gŏ di tŭ ală bơta tơngŏ bè duh să, glar tă nhơm nàng kham mờ bơsong di tŭ di lah geh pin gơtìp mờ kòp Covid-19; tus bal dan mờ mpồl đơng lam sơndră mờ kòp gơtờp ƀòn lơgar in nàng pơgồp bal mờ ală mpồl lơh broă bơyai lơh ƀồm sơnơm lơh kloh vi khuẩn; bơto sồr ală hìu nhă, ƀòn ơm kis lơh kloh nima hìu đam, yal broă lơh sơnơm; atbồ nền nòn ală cau lòt rê bơh tiah gơtìp kòp nàng di tŭ lơh jăt mờ kơrnoăt tam cah is tơrgùm bal, tam cah is tàm hìu mờ ai kuang bàng lơh sơnơm sền gròi bơta pràn kơl dang să jan pah ngai gơwèt mờ làng bol gơtìp tam cah is.

Tus do, Sở Y tế càr Dak Lak geh crơng gơs mpồl kuang bàng sền gròi mờ bơyai lơh sền gròi ni sơna ală hìu sơnơm nàng lơh niam wơl, bơto sồr kung bè lam sồr ală mpồl lơh broă lơh niam broă sơndră mờ kòp tàm ƀòn ơm kis.

Cau cih VOV Tây Nguyên-Cau mblàng Ndong Brawl