VOV4.K’ho- Jat khà tơrgùm kờp bơh Sở Lao động- Thương binh mờ Xã hội càr Dak Lak, bơh bồ nam tus tŭ do, tàm ù tiah càr neh gơlik geh 31 dơ̆ chơ̆t bŭ dà lơh 39 nă kơnòm dềt chơ̆t, uă mờr 2 dơ̆ pơndrờm dùl tŭ bal mờ nam lài. Khà do hơ̆ là jơnau tơngkah lài bè broă atbồ kơnòm dềt tŭ kàl rơlô bơkang sơnđờm tus. Lơh mbè lơi nàng tơrmù ƀà ală dơ̆ chơ̆t bŭ dà tàm kơnòm dềt là broă lơh kal ke kờñ geh bơta sơm bat tê bal mut lơh broă bal bơh gùt mpồl bơtiàn dê.

Kah wơl ngai chơ̆t bơh kòn klau put dê, bi H’Bren Êban ơm tàm ƀòn Ea Mấp, thị trấn Ea Pôk, kơnhoàl Cư Mgar, càr Dak Lak kung gam gơ hòr dà mat sùm. Bi pà gĭt, kòn klau bi dê hàm ngan nhơl den bơh lài tus tŭ do lòt tiah lơi, lơh bơta lơi bi kung cèng kòn lòt bal mờ sền gròi ngan kòn. Mơya, drim ngai 9/6, tài bơh geh broă pal bơsong den bi neh lời kòn lòt jat bèp lòt tàm sre ngài mờ hìu pơgap 300 thơk. Hơ̆ là, mìng dùl phuk ờ sền ngăc lơm kòn klau bi dê ntoat tus tàm tơnau dà pa tờ rềp sre nàng nhơl den hơ̆ sồng ntiar jơng gơ dùh tàm tơnau dà. Sền gŏ kòn klau gơdùh tàm tơnau dà, bơklau bi neh ntruñ tàm tơnau dà dong kòn mơya neh jơla.

Dilah gơtùi blơi wơl bơta kis ai sau in mờ priă tơmàn den añ kung lơh ngan tăc ù tăc tiah nàng ai kòn in kis wơl. Añ kơ̆p kờñ kòn klau añ geh kis wơl.

Kơnòm chờ hờp jà bal mờ gơ̆p um dà dờng, ngòt rơngơ̆t ngan

Chơ̆t tàm dơ̆ ƀŭ dà hơ̆, gam geh sau klau 12 sơnam, kòn bơh bi Y Dro Niê dê- kung ơm tàm ƀòn Ea Mấp. Bi Y Dro Niê pà gĭt, 2 kàl rơlô bơkang pa do, kòn klau bi bal mờ bi lòt tàm mìr, tàm sre nàng dong bèp lơh broă tàm mìr. Ngai hơ̆, tơnơ̆ tŭ dong bèp pŏ lŏ sre, khai ơm rlô lòt nhơl gùt dar. Kơlôi là kòn he dê gĭt re dà mờ geh bơta mờng chài lòt tàm mìr den bi Y Dro ờ nting tơngkah kòn. Cau lơi gĭt, hơ̆ là dơ̆ lòt lơh broă lồi dŭt bơh bi mờ kòn klau dê.

Pơgap 10 jiơ drim den ai bèp in măy rơndeh công nông, khai pŏ dùl lŏ sre den khai đơs là kòn neh bòl bloh tŭ hơ̆ añ sền khai ờ gŏ tai, añ dòn là kòn he dê ờ mù tàm tơnau dà ờ, tồn là khai lòt đàr ndung đah ne. Sa piang jơh, ờ gŏ kòn den añ lòt đah ne lùp den nrơ̆t tŭ sền gŏ sơgơn kòn dê pơrđồng tàm tơnau dà.

Jat khà kờp tơrgùm bal bơh Sở Lao động - Thương binh mờ Xã hội càr Dak Lak, bơh bồ nam tus tŭ do, tàm ù tiah càr dê gơlik geh 31 dơ̆ chơ̆t bŭ dà lơh 39 nă kơnòm dềt chơ̆t uă rlau 2 dơ̆ pơndrờm dùl tŭ bal mờ nam 2020. Ală dơ̆ chơ̆t bŭ dà tàm kơnòm dềt gơlik geh tàm 13 tàm 15 kơnhoàl, thị xã, ƀòn dờng bơh Dak Lak dê. Krông Bông là tiah geh ală kơnòm chơ̆t bŭ dà uă ngan rlau jơh mờ 8 nă sau. Tơnơ̆ Krông Bông là kơnhoàl Cư Mgar mờ 6 nă. Jat mò Nguyễn Thị Thu Ba, Phó Trưởng Phòng Lao động, Thương binh mờ Xã hội kơnhoàl Cư M’gar yal, uă ngan ală kơnòm chơ̆t bŭ dà là tàm tiah sar lơgar ngài, tiah kal ke uă ờ gĭt mờ broă bơtê re dà, bơto bơta chài rcang sơndră chơ̆t bŭ dà. Bơdìh hơ̆, Dak Lak geh ală tơnau dà, dà dờng, dà croh, ñrùh dà geh tus dùl khà dờng ngan mờ geh rah rài làm bă tiah, ală tơnau dơng dà, tơrlung dà, tơnau dà tuh phan bơh ală tiah lơh sa suơn sre, ală hìu bơnhă tam kơphê dê uă ngan sơl... hời rơ hời gơlam tus dơ̆ chơ̆t bŭ dà nđàc sơngĭt ngan.  

Broă atbồ kơnòm dềt tàm tơngai ơm rơlô bơkang do ờ hềt niam, tiah nhơl chờ ờ hềt geh uă ai kơnòm dềt in nàng lòt nhơl chờ hờp mờ gơ lơh bè nhơl tàm hìu halà jat mè bèp lòt tàm mìr lơm den bơta pơhìn chơ̆t bŭ dà uă ngan. Ală tơnau dà tàm ù tiah càr dê uă, ală tơnau dà jrô tàm mìr tàm sre kung ờ hềt gĭt loh jơh sơl den ờ hềt top kƀàng yal tơngĭt lài.

Dak Lak neh top uă kƀàng yal tơngĭt lài tàm ală tơnau dà, dà dờng, dà croh

Ồng Trần Phú Hùng, Kuang atbồ Sở Lao động - Thương binh mờ Xã hội càr Dak Lak pà gĭt, tàm tơngai pa do, UBND càr mờ Mpồl đơng lam Broă lơh lơh broă tài kơnòm dềt càr Dak Lak neh lam lơh uă gùng dà broă lơh kơryan rềs àr chơ̆t bŭ dà mờ sồt să ai kơnòm dềt in tàm ù tiah càr dê đơs bal, chơ̆t bŭ dà đơs is bè bơt bơtàu uă tiah nhơl chờ ai kơnòm dềt tàm ală tiah in; ai broă lơh bơto re dà tàm ală hìu bơsram; mpồl bơtiàn lơh bal lơh tơnau dà. Ồng Hùng đơs là, ală broă do neh lơh geh kuơ tŭ ală kơnòm dềt geh bơto rê dà ngai sơlơ uă, mơya, pơndrờm mờ jơnau kờñ geh ngan den kung ờ hềt tơl sơl. Nàng tơrmù ƀà bơta chơ̆t bŭ dà tàm kơnòm dềt den kờñ geh bơta mut lơh broă bal pràn rlau tai bơh ală mpồl bơtiàn, anih lơh broă geh gơnoar mờ kuơ màng là bơta atbồ bơh hìu bơnhă dê.

Bol añ tơnguh broă mblàng yal tàm ală gah lơh mbè lơi nàng ală hìu bơnhă geh kơnòm dềt bol he pal sền gròi, dong kờl ală kơnòm dềt tŭ ală kơnòm dềt lik bơdìh. Tơnguh rlau tai broă bơto pơlam, geh ală kƀàng yal tơngĭt lài tàm ală tiah ƀuơn gơlik geh rềs àr chơ̆t bŭ dà tàm kơnòm dềt. Dùl gah den geh jơnau dan pơn jat tai lơh mbè lơi pờ ơnàng tai broă bơto rê dà ai ală kơnòm dềt in, ală kơnòm dềt geh bơta chài re dà den geh tơrmù ƀà jơnau kơnòm dềt chơ̆t bŭ dà. Bơdìh hơ̆, pơn jat tai dan mờ ală kấp, gơnoar atbồ lơh geh ală ƀlàng nhơl, ờdo ờdă niam ai kơnòm dềt in, ngan là tàm ală tơngai ơm rlô bơkang.

Roh tĕ ală cau kòn tài bơh ală bơta rềs àr ờ dipal geh ngan bè chơ̆t bŭ dà là ală bơta jê sồt moat jrùm ờ gơtùi yal jơh bơh uă hìu bơnhă dê. Ngan là, nàng kơryan geh cồng nha jơnau chơ̆t bŭ dà tàm kơnòm dềt kờñ ngan geh bơta mut lơh bal geh kơnòl broă, lơh ngan bơh ală kấp, ală gah, ală tiah dê, tàm hơ̆ geh gơnoar broă bơh hìu bơnhă, ală mè bèp là kuơ màng uă ngan.

Cau mblàng K’Hạnh