VOV4.K’ho- Tus tŭ do, rlau 140 nă cau ơm tàm 47 hìu bơnhă tàm gùng kòn 189/1 gùng Mai Hắc Đế, sơnah ƀòn Tân Thành, ƀòn dờng Buôn Ma Thuột, càr Dăk Lăk dê kung gam ơm sơl tàm tiah wàng se kơryan kòp tài bơh geh 2 nă cau bơtờp kòp Covid-19. Làng bol tàm do gam dờp geh bơta sền gròi wil tơl ngan bơh cau pròc mhàm mờ uă ngan mpồl cau tàm mpồl bơtiàn dê. Tơl bào phe, nai tăp, biăp, plai chi geh jun tus, dong khi ram nùs, kơ̆ kơl jăp iang nùs nhơm bal mờ gơnoar ătbồ tàm tiah do kơryan jơh kòp.

Dờp geh ală phan pà tàm tiah wàng se kơryan kòp, bi Nguyễn Thị Lý (apah hìu ơm tàm gùng kòn 189/1, gùng Mai Hắc Đế) yal, bi bơh kơnhoàl Ea Kar lòt tus ƀòn dờng Buôn Ma Thuột apah hìu ơm nàng pờ anih phun xăm. Priă lơh geh pah ngai mìng tơl nàng ngui sa tàm rài kis ai bàr nă mè mờ kòn in mờ priă apah hìu ơm pah nhai. Mang ngai 08/5, tŭ kơno yal tàm gùng kòn he dê ơm geh cau bơtờp kòp Covid-19 bi kung gơlơh kơlôi rơcăng ngan. Mơya, tŭ geh ală kuang bàng tàm tiah do mblàng yal bè broă lơh jăt ală jơnau sồr bè rơcăng sơndră kòp, bi gŏ gơlơh iang nùs mờ pin dờn là kòp geh gờñ geh gròi sền.

Ală ngai lơh jăt “kơrnoat sồr wàng se kơryan kòp”, bi sùm sền ngăc tàm broă lơh jăt ală jơnau sồr bè rơcăng sơndră kòp nàng sền gàr he mờ cau gùt dar. Bulah ờ gơtùi lòt lơh broă mơya bàr pe ngai do, mờ bơta dong kờl bơh ală mpồl cau, cau dùl nă să is mờ gơnoar ătbồ tiah do dê, rài kis, broă ơm kis pah ngai bơh bàr nă mè mờ kòn bi dê neh rơhời geh bè ờs, ờ gam kơlôi rơcăng ờ tơl phan sa pah ngai tai. Bi Nguyễn Thị Lý, pà gĭt: Tơngai ơm yah ngài 21 ngai den bol añ kung tìp sơl dùl êt kal ke mơya gơnoar ătbồ tàm tiah do neh dong kờl uă ngan. Bol añ geh dờp piang sàu, phe sa mờ uă ngan phan sa.

Biăp sa geh jun tus nàng dong kờl ai làng bol tàm tiah wàng se kơryan kòp in

Tàm kờp jơh khà 47 hìu bơnhă làng bol ơm kis tàm gùng kòn 189/1 gùng Mai Hắc Đế, geh 20 hìu bơnhă bal mờ 47 nă cau là ală hìu bơnhă ơm kis ing apah hìu ơm tàm 4 sèng hìu ơm apah. Uă ngan ală cau do geh broă lơh ờ kơ̆ kơl jăp, priă lơh geh tŭ geh tŭ ờ, den tàng rài kis kal ke. Tiah ơm gơtìp wàng se kơryan kòp nàng rơcăng sơndră kòp, ndrờm bal mờ broă khi ờ gơtùi lòt lơh broă, ờ geh priă jền nàng ngui sa tàm rài kis pah ngai. Den tàng bè hơ̆, gơwèt mờ khi, ală kơnâm mbar sơkul sa drim, halà phan ngui sa pal geh ndai bơh ală cau geh nùs nhơm niam dong kờl tàm tơngai do là dờng màng ngan. Mò Đặng Thị Liệu là cau apah hìu ơm tàm tiah gơtìp wàng se kơryan kòp yal, 3 ngai do, mờ bơta dong kờl di tŭ bơh tiah do dê, hìu bơnhă mò ờ gam kơlôi rơcăng jơnau gơtìp ờ tơl phan sa pah ngai. Mò gơlơh ram nùs ngan gơwèt mờ ală bơta nđàc bơh ală cau geh nùs nhơm niam dê neh dong kờl ai làng bol tiah gơtìp wàng se kơryan kòp in.

Mò Đặng Thị Liệu, đơs: Kơnờm bơh ală cau geh nùs nhơm niam, mpồl cau mờ gơnoar ătbồ tàm tiah do dong kờl nàng bol añ in sơrlèt gan tŭ tơngai kal ke do. Bol añ kung mìng gĭt dan ưn ngài uă ngan jơh ală cau neh dong kờl bol añ.

Phan sa, puăc ka geh jàu pà tơn tàm tê ai làng bol tàm tiah wàng se kơryan kòp in

Kờp tus ngai 15/5, Ủy ban Nhân dân sơnah ƀòn Tân Thành neh dờp geh pơgăp 30 tơlak đong priă măt, 300 kĭ phe, 100 thùng ƀung mi, rlau 200 kĭ biăp mờ uă phan pà là ală phan ngui sa pal geh ndai. Bi Vũ Thị Mai Tuyên, Kuang ătbồ Mpồl cau ùr tổ dân phố 10, sơnah ƀòn Tân Thàng pà gĭt, bơh ală phan pà bơh ală cau geh nùs nhơm niam dê, ală ngai do, Mpồl neh pơgồp bal mờ Ủy ban Nhân dân mờ mpồl cau bơh sơnah ƀòn Tân Thành dê lòt jàu tơn tàm tê ală bơnah phan pà ai làng bol in. Gơ jăt tàm ală phan bơna tă pơgồp, mpồl geh hòi jà ală cau geh nùs nhơm dong kờl is tus bal sac rwah, tam pà jăt kơldung nàng pà ai ală hìu bơnhă làng bol in. Gơwèt mờ phan sa ris, ờ hềt gơm sin bè biăp, kơnuh, bùm, plai chi den ală cau geh nùs nhơm dong kờl is geh pà tơn, ală bơta phan gơtùi lời jŏ den geh tam pà bal nàng pà rơhời.

Bi Vũ Thị Mai Tuyên, đơs: Tus tŭ do, ală hìu bơnhă lang bol kung bè ờs đau wơl rài kis tàm tiah wàng se kơryan kòp. Tơngai ơm yah ngài là 21 ngai den tàng kờñ pal geh bơta tă pơgồp bal bơh jơh gùt mpồl bơtiàn dê gơwèt mờ làng bol ơm tàm gùng kòn 189 do. Mờ kơnòl broă bơh he dê den ờ gŏ di lời dùl hìu bơnhă làng bol lơi gơtìp ờ tơl bè phan sa kung bè phan ngui sa pal geh pah ngai.

Phan ngui sa geh tam pà, ơn tàm kơldung niam ngan lài mờ tŭ jàu tàm tê ală hìu bơnhă làng bol tàm tiah wàng se kơryan kòp

Bơta sền gròi bơh gơnoar ătbồ tiah do dê, bơta dong kờl bal bơh uă cau geh nùs nhơm niam dê neh dong ai ală làng bol kis tàm tiah wàng se kơryan kòp sơlơ ram nùs tai. Bơh hơ̆, pơgồp tai bơta pràn nàng khi sơrlèt gan kal ke tàm rài kis mờ tơrgùm bal pràn tàm broă kơryan kòp.

Cau cih Vũ Nam Trang- Cau mblàng Lơ Mu K’Yến