VOV4.K’ho- Drim ngai 04/8, càr Dak Lak neh lam lơh broă dờp 59 nă làng bol là cau lơh broă gam kis tàm ƀòn dờng Hồ Chí Minh rê tàm càr mờ lam lơh tam cah is tơrgùm bal jat jơnau sồr. Khi là ală công nhân lơh broă tàm Kong ti TNHH Worldon Việt Nam, gơ wèt anih lơh sa mờ măi mok Đông Nam, kơnhoàl Củ Chi, ƀòn dờng Hồ Chí Minh kờñ geh rê wơl hờ ƀòn tờm.

Nàng ai tơl bơta niam ai ală công nhân do in geh rê hờ ƀòn tờm ƀuơn  ƀuài, ờdo ờdă, ƀòn dờng Hồ Chí Minh neh sồr ală mpồl lơh broă lam lơh xét nghiệm mhar kòp Covid-19 ai ală công nhân in; Mpồl atbồ anih lơh sa mờ măi mok Đông Nam, kơnhoàl Củ Chi bal mờ Kong ti TNHH Worldon Việt Nam ai 3 nơm rơndeh pơndiang công nhân mờ 1 nơm rơndeh pơndiang rơndeh rơndồ ală cau do dê rê jàu càr Dak Lak in. Tŭ ală công nhân rê tus rbàng 14 tàm xã Hòa Phú, ƀòn dờng Buôn Ma Thuột, mpồl cảnh sát gùng lòt neh rò mờ lam gùng lòt tơn tus anih tam cah is tơrgùm bal bơh càr dê tàm Hìu ơm bal Anih tờm sền gàr lơngap lơngai sền gàr dà lơgar- Hìu bơsram Đại học Tây Nguyên.

Cau mblàng K’Duẩn