VOV4.K’ho- Àng drim gờñ ngai 30/7, càr Dak Lak dờp mờr 900 nă cau lơh broă bơh càr Đồng Nai rê. Do là dơ̆ dờp cau ngan ngồn sơn rờp bơh càr Dak Lak dê. Bơh xét nghiệm mhar, geh 4 nă cau bơtờp mờ Sars CoV-2, ală broă lơh sơnơm gam geh pơn jat tai lam lơh nàng rơ wah ală cau pin bơtờp.

Mờr 900 nă cau lơh broă tàm Đồng Nai do gơtìp roh broă lơh tài bơh kòp Covid-19 bơtờp uă mờ kờñ đì rơndeh măi rê wơl hờ càr Dak Lak. Ală cau geh bơta kơp kờñ rê neh cih mat mờ anih lơh broă geh gơnoar càr Đồng Nai mờ mìng gơtùi rê tŭ neh xét nghiệm mhar ờ bơtờp kòp Covid-19 nàng gàr ờ duh pal ơm wơl tàm ală anih gròi sền.

Tơnơ̆ hơ̆, cảnh sát gùng lòt mờ ală mpồl lơh broă geh gơnoar geh mpồl sền gàr ring lơngai, hình sự, mpồl y bác sĩ bơh càr Đồng Nai dê neh bơt bơtàu mpồl jun rê tàm gơl gùng jòng mờr 400 kơi sồ. Bè hơ̆, do là dơ̆ sơn rờp càr Dak Lak ngan ngồn bơyai lơh dờp cau bơh tiah geh kòp rê. Lài hơ̆, càr kung neh yal geh uă ngan cau bơh ƀòn dờng Hồ Chí Minh, càr Bình Dương mờ ală càr tiah đah jum dà lơgar rê is hờ càr, jơh ală ndrờm đì rơndeh măi lơm.

Cau mblàng K’Duẩn