VOV4.K’ho- Jăt Mpồl đơng lam rơcăng sơndră kòp Covid-19 càr Dăk Lăk dê yal, tàm ngai 10/8, jơh gùt càr gŏ tai 36 nă cau bơtờp mờ virus Sars CoV-2 tàm 6 kơnhoàl mờ ƀòn dờng Buôn Ma Thuột. Pal sền ngăc ngan là tàm thôn 7, xã Vụ Bổn, kơnhoàl Krông Pach pa gŏ dùl tiah gơbàn kòp uă ngan, bal mờ 17 nă cau F0 ờ gĭt loh bơtờp bơh cau lơi. Tŭ do, thôn do neh geh wàng se kơryan kòp. Gah lơh sơnơm càr Dăk Lăk neh jòi bàn geh gĭt nđờ rhiang nă cau F1.

Bàr pa mpồl cau pà phan mờ phan ngui sa kờñ pal geh ai mpồl cau lơh kơnòl broă in tàm ală anih gròi sền kòp Covid-19 bơh xã Vụ Bổn dê

Nàng gàr niam broă dong kờl ai làng bol tàm tiah wàng se kơryan kòp in, xã Vụ Bổn neh crơng gơs dùl mpồl ai pà phan bơna mờ yal sồ điện thoại bơh mpồl ai pà phan bơna dê ai làng bol in nàng hòi tŭ kờñ. Bal mờ hơ̆, xã Vụ Bổn kung neh sồr ală thôn cih mat ală hìu bơnhă rƀah, hìu bơnhă kal ke digơlan gơtìp jơgloh tàm tơngai lơh jăt jơnau sồr ơm yah ngài nàng geh gùng dà dong kờl di tŭ.

Broă lơh jòi cau ơm rềp, ai mẫu xét nghiệm mhar geh xã jơh nùs lam lơh

Broă lơh lùp sền, jòi cau ơm rềp nàng cang tiah, kơryan kòp kung gam geh xã jơh nùs lam lơh sơl. Kờp tus klo ngai, ngai 10/8, càr Dăk Lăk neh gŏ geh 446 nă cau bơtờp mờ virus Sars CoV-2, tàm hơ̆ gam sơm kòp ai 415 nă cau in, 30 nă cau neh sơm bời kòp mờ 01 nă cau neh chơ̆t.

  Cau mblàng Lơ Mu K’Yến