VOV4.K’ho- Ủy ban tĕ khà càr Dak Lak pà gĭt, gùt càr geh 1 rơbô 790 tiah đùh sră mờ 1 rơbô 802 tiah đùh sră tĕ khà Kuang bàng Quốc hôị khoá 15 mờ Kuang bàng Hội đồng Nhân dân càr tơngai lơh broă bơh nam 2021-2026. Tềng đap bơta kòp gơlik geh kal ke, ală broă lơh gàr niam bơta ờdo ờdă rcang sơndră kòp Covid-19 tàm ală tiah do geh lam lơh niam, gàr niam bơta ờdo ờdă ai ngai tĕ khà mờr tus in. Gah lơh sơnơm càr Dak Lak gam jat sền bơta gơlik geh kòp Covid-19 tàm lơgar mờ bơdìh lơgar; gàr niam bơta pơgồp bal niam đah Mpồl tĕ khà mờ Mpồl đơng lam rcang sơndră kòp Covid-19 ală kâp. Gah lơh broă  geh gơnoar rcang mpồl cau, rơndeh rơndồ, măy mok, phan bơna, ală sơnơm tơm ƀa rcang lài di pal broă lơh rcang sơn dră kòp Covid-19 tàm tơngai bơyai lơh dơ̆ tĕ khà in.

Kuang đơng lam bồ càr Dak Lak lòt sềb broă lơh tĕ khà tàm ală tiah

Ủy ban tĕ khà càr Dak Lak sồr ală tiah sac rơwah ală tiah đùh sră di pal mờ jơnau sồr rcang sơndră kòp, geh tơl bơta ơnàng, ha pah, nàng lơh jat broă ai ơm yah ngài tŭ đùh sră. Jơh ală cau tĕ khà mờ cau drơng broă tĕ khà pal pơn chèu glòm muh mat, rào tê mờ dà lơh kloh khuẩn.

Cau mblàng K’ Hạnh