VOV4.K’ho- Càr Dăk Lăk tŭ do geh rlau 209 rbô lồ kơphe, khà lơh geh pah nam rlau 500 rbô tấn, là phan lơh geh priă jền tờm ngan bơh git nđờ rhiang rbô hìu bơnhă lơh broă sa dê. Nàng rơcang sơndră bơta tung kơñau, gàr niam ờdo ờdă phan bơna bơh cau tam kơphe dê in, ală anih lơh broă geh gơnoar mờ mpồl atbồ is thôn, ƀòn tàm càr gam jơh nùs lam lơh ală broă lơh mờng chài.

3 ƀùi dùl dơ̆ tơnơ̆ tŭ jơh sàu piang mang, ồng Trương Văn Đệ ơm tàm thôn 3, xã Ea Kpam, kơnhoàl Cư Mgar rơcang ai àu ram, khŏ đù, sơ gơn ndau, đèng pil... pơgồp bal mờ ală cau tàm mpồl atbồ is thôn lòt sền gàr mìr kơphe. Ồng Đệ yal, mìr kơphe hìu bơnhă dê ơm lồi thôn 3, ơm ngài mờ ƀòn làng bol ơm kis den tàng ƀuơn ngan gơtìp cau kơñau. Bè hơ̆ den tàng bơh bồ nhai 10, tŭ plai kơphe sơn đờm kràñ, mpồl atbồ is thôn dê neh pal lòt sền, gròi sền: “Nam lài, hìu añ dê gơtìp bol blơ̆ pik kơñau mờr 40 tờm kơphe, kờp jơh digơlan pal rlau 20 ƀàu. Ngòt cau kơñau, hìu bơnhă neh lơh nền ơpah cau pik gờñ, mơya tài plai kơphe ờ hềt dum jơh den tàng lơh bơta niam gar kơphe dê gơmù. Bol blơ̆ pik kơñau gam klah pă uă ntê, geh tŭ là ngui pềs, jơ trơi koh tơn ntê plai gơ in ƀuơn pik, lơh gơ rềng tus kàl tơnơ̆. Nam do, oh mi tàm mpồl atbồ is thôn dê dong kờl gròi sền den ờ gơlik geh bơta cau pik kơñau tai, hìu añ dê kơp dum jơh hơ̆ sồng pik”.

Jơh gùt xã Ea Kpam geh rlau 1 rbô 200 lồ kơphe, rah rài ơnàng tus rềp nhàr mờ ƀòn dờng Buôn Ma Thuột, thị xã Buôn Hồ. Thiếu tá Lưu Quang Chiến, Kuang atbồ Kuang àng xã Ea Kpam, kơnhoàl Cư M’gar pà git, tàm ală bă kơphe rềp nhàr, ală bol blơ̆ sùm pik kơñau, lơh roh lơngap lơngai, lơh gơbàn hoàc huơr phan bơna làng bol dê. Nam do, kuang àng xã pơgồp bal mờ ală mpồl, gah broă lơh, mpồl cau crơnggơs 8 mpồl aybồ is tàm jơh ală thôn, ƀòn, lam lơh gròi sền den tàng kơphe làng bol dê geh sền gàr: “Kuang àng xã neh ai tơlik ală broă rơndap lơh tus tơl mpồl atbồ is mờ ală mpồl lơh broă lam lài nàng lòt sền, gròi sền tàm trồ mang tàm ală suơn mìr ngài, ờ geh cau sùm gơlik geh bơta pik kơñau kơphe nàng kơryan. Mờ kung lam lơh yal jơnau tơnggit, pờ rùp tàm ală pang zalo, facebook bơh xã, kơnhoàl dê bè broă lơh, kai bơh ală mpồl tung kơñau dê nàng làng bol in rơcang ngac. Kờp sền mpồl cau pa rê jàm, sùm tung kơñau phan bơna nàng bơto tơngkah, bơh hơ̆ ală cau do sang tĕ broă lơh tìs”.

Càr Dăk Lăk tŭ do geh rlau 209 rbô lồ kơphe, khà lơh geh rlau 500 rbô tấn, den tàng pah tŭ mut tàm kàl pik kơphe, ndrờm kờñ ngan geh cau nàng sền gàr. Jat Thượng tá Nguyễn Văn Quý, Phó Kuang atbồ Cơldŭ cảnh sát Hình sự Kuang àng càr Dăk Lăk đơs, bal mờ ală mpồl atbồ is tàm ƀòn lơgar, kuang bàng càr lam lơh ală broă lơh mờng chài kờñ kup bàn, kơryan ală mpồl tung kơñau phan bơh suơn sre, bơ sir wơl broă blơi, sền gàr lơngap lơngai ờdo ờdă tàm ƀòn lơgar: “Cơldŭ cảnh sát Hình sự Kuang àng càr tam pà kơnòl cau gròi sền lòt tus ală tiah geh bơta tung kơñau phan bơh suơn sre gơlik geh uă nàng pơgồp bal mờ kuang àng ală kơnhoàl, thị xã, ƀòn dờng lam lơh lùp khàu, kup bàn, kơryan ală mpồl tung kơñau phan bơh suơn sre bồ kàl tơnhàu. Lam lơh mblàng yal tơnguh jơnau git wă sền gàr phan bơna bơh làng bol dê; rơcang lài atbồ niam 2, 3 mpồl cau pin lơh tìs, tơnguh ală cau tờm anih blơi phan bơh suơn sre bañ blơi phan ờ git loh bơh lơi geh”.

Cau mblàng K’Duẩn