Dăk Lăk geh 2 nă cau jak chài gah lơh đèng càl bơtờp mờ virus Sars CoV-2
Thứ sáu, 10:59, 10/09/2021
VOV4.K’ho- Mho ngai 09/9, Chủ tịch Ủy ban Nhân dân kơnhoàl Ea H’leo, càr Dăk Lăk pà gĭt, gam pơgồp bal mờ gah lơh sơnơm càr dê nàng lơh jăt ală jơnau sồr bè lơh sơnơm tŭ gŏ 2 nă cau jak chài lơgar ndai tus tàm kơnhoàl nàng lơh rơndăp broă lơh ồs đèng càl bơtờp mờ virus Sars CoV-2. Jăt ồng Nguyễn Văn Hà- Chủ tịch Ủy ban Nhân dân kơnhoàl Ea H’leo yal, ngai 06/9, mpồl cau jak chài lơgar ndai geh 6 nă cau lòt bơh ƀòn dờng Hồ Chí Minh lòt tus ù tiah kơnhoàl dê nàng lơh rơndăp broă lơh ồs đèng càl.
Tơnơ̆ tŭ lòt tus kơnhoàl tơn, jơh bal 6 nă cau jak chài do geh ai ơm yah ngài tàm dùl hìu năc, tơl nă cau ơm is tàm dùl cơldŭ. Ngai 08/9, Hìu sơnơm kơnhoàl Ea H’leo tus ai mẫu test mhar kháng nguyên den 2 tàm khà 6 nă cau jak chài do geh cồng nha bơtờp mờ virus Sars CoV-2. Ală cau jak chài do neh geh cĭt 2 ding vaccine rơcăng sơndră kòp Covid-19 mờ neh geh ai ơm yah ngài kham sơm kòp 14 ngai jăt jơnau sồr tàm ƀòn dờng Hồ Chí Minh. CDC Dăk Lăk đơs, digơlan 2 nă cau jak chài do lơh bơtờp kòp ai cau ndai in là ờ huan geh ngan. Tŭ do, ală gah lơh broă geh gơnoar bơh càr Dăk Lăk mờ kơnhoàl Ea H’leo dê gam lơh ală sră nggal pal geh nàng jun 2 nă cau jak chài do lòt sơm kòp, mơkung bơyai lơh ai ơm yah ngài ai ală cau jak chài gam wơl in jăt jơnau sồr.Cau mblàng Lơ Mu K’Yến
Viết bình luận