VOV4.K’ho- Drim ngai 08/12, pơrjum dơ̆ 3, Hội đồng Nhân dân càr Dăk Lăk khóa 10, tơngai lơh broă bơh nam 2021 tus nam 2026 neh mut pơrjum. Nam 2021 là nam pal kong mờ uă kal ke, bơta lòng tài bơh kòp Covid-19 lơh aniai. Bulah bè hơ̆, tơn jơh nam 2021, Dăk Lăk geh 8 broă geh jàu gơtùi lơh geh mờ sơrlèt rlau broă rơndap lơh, khà gơguh lơh sa niam, gơguh 5,1% pơndrờm mờ bal dùl tŭ nam lài dê; tă dia mờ hòi jà priă bơcri gùt mpồl bơtiàn sơrlèt rlau broă rơndap lơh ai tơlik, kờp dŭ geh rlau 8 rbô tơmàn đong, gơguh 10% pơndrờm mờ khà kờp dŭ Hội đồng Nhân dân càr jàu; khà mpồl lơh sa kă bro lơh broă wơl gơguh uă, khà lơh gơlik phan mờ jơnau kờñ blơi phan tàm càr geh gàr niam, broă lơh bơto bơtê mờ bơsram, sền gàr pràn kơldăng să jan làng bol in, sền gàr mpồl bơtiàn, tơrmù rƀah, dong kờl làng bol gơtìp kal ke tài bơh kòp Covid-19 geh sền gròi lam lơh...

Đơs đơng lam pơrjum, ồng Nguyễn Đình Trung, Ủy viên Đảng dà lơgar, Bí thư Tỉnh ủy Dăk Lăk sồr: tơngai tus, ală kấp, ală gah broă lơh, ală tiah pơn jat tai lơh jat bơta đơng lam, pơlam bơh dà lơgar dê tàm jơh ală gah nàng lam lơh jat geh cồng nha Nghị quyết pơrjum dờng Đảng gùt lơgar dơ̆ 13 mờ Nghị quyết pơrjum dờng Đảng bộ càr dơ̆ 17. Kuơmàng, tơrgùm lam lơh jơh nùs, geh cồng nha Nghị quyết sồ 128 nam 2021 bơh Chính phủ dê.

Cau mblàng K’Duẩn