VOV4.K’ho- Jăt Mpồl đơng lam rơcăng sơndră kòp Covid-19 càr Dăk Lăk dê yal, tàm ngai 12/8, jơh gùt càr sền gŏ tai 12 nă cau bơtờp kòp Covid-19. Tơnguh jơh khà cau bơtờp kòp tàm càr tus 476 nă. Tàm khà 12 nă cau kòp pa geh sền gŏ den geh 3 nă cau geh bơta bơtờp kòp bơh ƀòn dờng Hồ Chí Minh mờ càr Đồng Nai. 9 nă cau gam wơl gơrềng tus ală cau kòp neh geh gŏ lài hơ̆.

Tiah Block C, hìu ơm bal Hoàng Anh Gia Lai geh wàng se tàm mang

Pal sền ngăc ngan là geh 3 nă cau geh bơta bơtờp kòp mờ mpồl cau kòp tàm xã Vụ Bổn, kơnhoàl Krông Pach. 2 nă cau kòp geh sền gŏ tàm tiah hìu ơm bal Hoàng Anh Gia Lai, sơnah ƀòn Tự An, ƀòn dờng Buôn Ma Thuột geh gơrềng tus cau kòp tàm thôn 20, xã Cư Bông, kơnhoàl Ea Kar. Gơrềng tus 2 nă cau kòp do, gah lơh sơnơm càr Dăk Lăk neh jòi bàn geh 15 nă cau F1, tàm hơ̆ geh 2 nă cau F1 xét nghiệm mhar gơ ai cồng nha bơtờp mờ virus Sars CoV-2. Tàm mang ngai 11/8 tơn, mpồl lơh broă geh gơnoar neh tus wàng se mờ ai mẫu xét nghiệm mhar ai làng bol tiah Block C bơh hìu ơm bal Hoàng Anh Gia Lai dê in.

Cau lơh sơnơm lơh xét nghiệm mhar ai làng bol tàm tiah Block C, hìu ơm bal Hoàng Anh Gia Lai dê in

Tàm ngai 12/8, gah lơh sơnơm càr Dăk Lăk kung neh jàu sră rê bơh hìu sơnơm ai 20 nă cau kòp Covid-19 in. Bè hơ̆, tus tơngai do, Dăk Lăk neh geh 74 nă cau geh sơm bời kòp Covid-19 mờ geh ai rê bơh hìu sơnơm.

Cau mblàng Lơ Mu K’Yến