VOV4.K’ho- Kuang bàng đơng lam bồ Anih tờm gròi sền kòp tê jê să càr Dăk Lăk pà gĭt, tàm càr pa gŏ tai dùl nă cau bơtờp mờ virus Sars CoV-2. Hơ̆ là Y.T.H’M, ơm tàm ƀòn Dranh A, xã Dăk Liêng, kơnhoàl Lăk, càr Dăk Lăk, là công nhân tàm ƀòn dờng Hồ Chí Minh. Ngai 26/6/2021, cau kòp do lòt rơndeh bơh ƀòn dờng Hồ Chí Minh rê hờ hìu. Drim ngai 27/6, tus hờ Hìu sơnơm kơnhoàl nàng yal mờ cau lơh sơnơm in.

Bơh test mhar geh cồng nha bơtờp mờ virus Sars CoV-2, tơnơ̆ hơ̆ xét nghiệm mờ măy PCR kung gơ ai cồng nha bơtờp mờ virus Sars CoV-2 sơl. Gah lơh broă geh gơnoar neh jun 3 nă cau là F1 lòt ơm yah ngài tơrgùm bal, ai mẫu xét nghiệm ai 26 nă cau ơm rềp; Lơh anih wàng se kơryan tàm ƀòn Dranh A mờ ƀồm sơnơm lơh kloh khuẩn gùt dar ù tiah hìu bơnhă cau kòp do dê ơm kis. 18 nă cau lòt rơndeh bal mờ cau kòp do bơh ƀòn dờng Hồ Chí Minh rê hờ Dăk Lăk kung geh ai ơm yah ngài sơl.

Cau mblàng Lơ Mu K’Yến