VOV4.K’ho- Dơ̆ bơtờp kòp Covid-19 do, Dak Lak là tiah tờm geh bơta sền gròi tàm tiah Tây Nguyên dê mờ bàr pe nă cau bơtờp kòp bơtờp bơh ală tiah ndai dê. Bal mờ bơta gơlik geh kòp kal ke ngan tàm ƀòn dờng Hồ Chí Minh den ờ mìng is Dak Lak lơm mờ ală tiah rềp bal (tàm hơ̆ geh càr Gia La) kung lơh ngan tàm broă rcang sơndră kòp.

Kơnhoàl Chư Pưh, càr Gia Lai là tiah rềp bal mờ tiah ơm kis bơh cau kòp sồ 7186 bơh càr Dak Lak dê. Càr Gia Lai neh lơh wơl tơn anih kơryan kòp tàm gơl gùng dờng 14, ù tiah rbàng sồ 110 rềp nhàr bal mờ càr Dak Lak. Mpồl lơh broă ală gah tàm hơ̆ geh “Kảnh sát gùng lòt, thanh tra gùng lòt, gah lơh sơnơm...” neh lơh broă ai rơndeh lòt rê ơm ing, was să jan, yal tiah lòt rê mờ gah lơh sơnơm tŭ lòt gan tiah do. Jat cau măy rơndeh Dương Quốc Hiệu, ơm tàm thị trấn Đăk Đoa, kơnhoàl Đăk Đoa đơs, pa lòt bơh ƀòn dờng Hồ Chí Minh rê tàm Gia Lai, broă lơh jat broă yal tiah lòt rê mờ gah lơh sơnơm kung bè ală broă lơh rcang sơndră kòp bơh mpồl lơh broă geh gơnoar dê lơh bi mờ uă cau măy rơndeh ndai gơ lơh iang nùs rlau tai.

Lòt tàm do geh ală oh mi gah lơh sơnơm sền gròi bè tiah ờdo ờdă den să jan añ sền gŏ oh mi lơh niam ngan. Mìng lòt tàm gùng den broă rcang sơndră kòp bơh ală oh mi măy rơndeh gùng ngài dê geh gàr niam. Broă bè sa sào den oh mi cau măy rơndeh ờ hoan ơm rềp mờ cau tàm ală tiah dê, gàr niam ngan ală bơta tàm rơndeh nàng gàr niam bơta ờdo ờdă  ai pơ ùr, oh kòn mờ jơh hìu bơnhă tàm hìu in.

Wàng se kơryan kòp tàm anih ràng tăc phan Ba Khía xã Ea Wy, kơnhoàl Ea H’leo, càr Dak Lak

Bi Ksor Mướt, Kuang bàng lơh sơnơm tàm anih sền gròi tàm rbàng 110- gùng dờng 14 lòt gan càr Gia Lai pà gĭt, bơdìh mờ broă sồr pal pơn chèu glòm muh mat, was să jan mờ lơh jat broă lơh kloh khuẩn, jơh tơl nă cau ndrờm pal yal tiah lòt rê dùl bă jơh nùs mờ tơl làm. Kuơ màng là tiah pa lik, tiah lòt tus, bơta pràn kơl dang să jan mờ ală bơta kòp jŏ tàm să jan geh gơrềng. Bulah roh dùl ết tŭ jiơ, mơya cau lơi kung lơh jat niam ală jơnau sồr, jơnau bơto pơlam bơh mpồl lơh broă geh gơnoar dê.

Dilah kòp duh să, halà geh tềl tơngŏ pin kòp den pal ơm yah ngài, ai dilah was să jan bè ờs den sồr làng bol yal mờ gah lơh sơnơm den hơ̆ sồng ai lòt. Xã lơi, thôn lơi den yal mờ gah lơh sơnơm tàm ală tiah hơ̆, ai ală cau rê bơh tiah ngài halà bơh ƀòn dờng Hồ Chí Minh rê den sồr pal yal mờ gah lơh sơnơm.

Anih kơryan kòp rềp nhàr bal Dak Lak mờ Gia Lai

Tus tŭ do, jơh ală cau geh gơrềng tus cau kòp sồ 7186 tàm Dak Lak ndrờm geh cồng nha xét nghiệm ờ bơtờp mờ virus Sars CoV-2, mơya gam pal pơn jat tai ai ơm yah ngài, kham să jan. Ai gơwèt mờ ală càr tàm tiah Tây Nguyên, kuơ màng là broă lòt rê tàm gùng dờng 14 (gùng Hồ Chí Minh) neh ơm ing broă pơndiang năc. Bàr pe nă cau ờ lơh jat neh gơtìp mpồl lơh broă geh gơnoar lơh glài kràñ. Gơnoar atbồ mờ gah lơh broă geh gơnoar ală tiah tàm tiah do dê sùm pơgồp bal niam nàng lam lơh dơ̆ lĕ bal, lơh kràñ ngan, nàng broă lơh rcang sơndră kòp Covid-19 lơh geh cồng nha niam ngan rlau jơh.

Cau cih Hoàng Qui- Cau mblàng K’Hạnh