VOV4.K’ho- Drim ngai 18/10, jơnau yal bơh Anih tờm gròi sền kòp tê jê să càr Dăk Lăk dê pà git, tàm ƀòn dờng Buôn Ma Thuột pa geh dùl tiah geh kòp tàm mpồl bơtiàn tàm drà bơh sơn rờp Tân Hòa, tàm sơnah ƀòn Tân Hòa, ƀòn dờng Buôn Ma Thuột mờ 12 nă cau geh cồng nha xét nghiệm bơtờp mờ virus Sars CoV-2. Jat hơ̆, ngai 17/10, bi P.M.T (48 sơnam, ơm tàm gùng Xô Viết Nghệ Tĩnh, ƀòn dờng Buôn Ma Thuột) là cau tùng, yờ phan tàm drà bơh sơn rờp Tân Hòa tus Hìu sơnơm sơnah ƀòn Tân Hòa lơh xét nghiệm mhar kháng thể geh cồng nha bơtờp mờ virus Sars CoV-2. Cồng nha xét nghiệm mờ broă lơh Realtime-PCR ai gŏ bơtờp mờ virus Sars CoV-2.

Anih tờm gròi sền kòp tê jê să càr Dăk Lăk neh pơgồp bal mờ Hìu sơnơm sơnah ƀòn Tân Hòa lam lơh jòi cau ơm rềp, jòi git anih lòt rê, ai mẫu lơh xét nghiệm ală cau ơm rềp mờ cau kòp. Tus 2 jơ drim ngai 18/10, mpồl lơh sơnơm neh ai mẫu, lơh xét nghiệm mhar ai rlau 500 nă cau tac phan tàm drà bơh sơn rờp in mờ ală cau ơm rềp mờ bi T... Bơh xét nghiệm mhar geh tai 11 nă cau bơtờp mờ virus Sars CoV-2, tàm hơ̆ geh 6 nă cau là cau tờm hìu bơnhă bơh cau kòp dê mờ 5 nă cau là cau tac phan tàm drà bơh sơn rờp.

Cau mblàng K’Duẩn