VOV4.K’ho - Jăt jơnau bơh Mpồl đơng lam rơcang sơndră mờ kòp Covid-19 càr Dak Lak yal, tàm ngai 26 nhai 7, càr do neh gŏ tai 11 nă cau gơtờp mờ virus Sars CoV-2, tàm hơ̆ geh 6 nă cau gơtờp tàm mpồl bơtiàn.

                               Lơh uă anih gròi sền tàm càr Dak Lak nàng kơrian kòp gơtờp

Krông Năng là kơnhoàl geh gŏ khà cau gơtờp mờ virus Sars CoV-2 uă ngan mờ 5 nă cau. Ƀòn dờng Buôn Ma Thuột geh gŏ tai 3 nă cau gơtờp mờ virus Sars CoV-2. Kơnhoàl Ea Kar gŏ 2 nă cau ndrờm gơrềng tus mờ bơta kòp bơh càr Bình Dương. Kơnhoàl Krông Păc gŏ 1 nă cau rê bơh ƀòn dờng Hồ Chí Minh.

Gơrềng tus mờ 6 nă cau gơtờp tàm mpồl bơtiàn geh gŏ tàm ngai 26 nhai 7, gah lơh sơnơm càr Dak Lak neh jòi, ai lòt tam cah is tơrgùm bal mờ bơyai lơh ai mẫu xét nghiệm mhar geh 14 nă F1; bơto sồr anih lơh sơnơm ală kơnhoàl lơh jăt broă ƀồm sơnơm lơh kloh vi khuẩn tàm tiah kis tàm hìu cau gơtìp kòp mờ ală tiah cau kòp geh tus. Bè hơ̆, kờp tus 5 jơ mho ngai 26 nhai 7, càr Dak Lak neh gŏ 128 nă cau geh gŏ mờ virus Sars CoV-2 bơh 13 tàm 15 kơnhoàl, thị xã mờ ƀòn dờng. Bàr tiah ờ hềt gơtìp kòp là kơnhoàl Mdrăk mờ Cư̆ Mgar.

Cau mblàng Ndong Brawl