VOV4.K’ho- Pơgăp mờ do bàr pe ngai, tàm ù tiah càr Dăk Lăk dê gơlik geh sùm ală dơ̆ chơ̆t bŭ dà nđàc sơngĭt ngan lơh 5 nă kơnòm bơsram chơ̆t. Broă gơbàn pa ngan rlau jơh là tàm mho ngai 17/5, tàm tơnau dà thôn Ea Lang, xã Cư Pui, kơnhoàl Krông Bông lơh dùl nă kơnòm bơsram chơ̆t. Cau gơtìp chơ̆t do là sau: Lương Thị Như Ngọc, 9 sơnam ơm tàm thôn Ea Lang, xã Cư Pui, kơnhoàl Krông Bông, càr Dăk Lăk. Sau Ngọc là kơnòm bơsram ơdŭ 3, Hìu bơsram kấp dùl Cư Pui II, xã Cư Pui, kơnhoàl Krông Bông, càr Dăk Lăk. Dơ̆ chơ̆t bŭ dà gơbàn tàm tŭ 3 jiơ mho ngai 17/5, tŭ sau Ngọc bal mờ mpồl cau bơyô lòt nhơl kềng gah tơnau dà thôn Ea Lang nàng nhơl. Tàm tŭ nhơl, ờ bơtuah sau Ngọc gơtìp ntiar jơng mờ gơdùh tàm tơnau dà mờ gơtìp chơ̆t bŭ dà.

Lài hơ̆, tàm ngai 13/5, ală sau, là H’Hằng Kmăn mờ H’Nan Mlô, deh bal nam 2008, ndrờm là kơnòm bơsram ơdŭ 7A, Hìu bơsram kấp 2 Trần Quốc Toản, xã Ea R’bin, ơm kis bal tàm xã Ea R’bin, lòt tus hờ dà dờng Krông Nô um dà tơnơ̆ hơ̆ gơtìp dà bŭ mờ chơ̆t. Ai tàm ngai 16/5, tàm tơnau dà Drao, xã Cư Dliê M’nông, kơnhoàl Cư Mgar kung gơlik geh sơl dơ̆ chơ̆t bŭ dà nđàc sơngĭt ngan lơh 2 nă oh mờ mi tờm là, sau: Phan Thị Thanh L, 13 sơnam mờ Phan Thanh N, 11 sơnam, ơm kis tàm thôn 1, xã Cư Dliê M’nông chơ̆t. Gơlik geh sùm dơ̆ chơ̆t bŭ dà là jơnau tơngkah lài tus ală mè bèp, hìu bơnhă mờ ƀòn lơgar in tàm broă sền gàr oh kòn niam ờdo ờdă tŭ nhai duh kàl rlô bơkang gam tus.

Cau mblàng Lơ Mu K’Yến