VOV4.K’ho- Bulah UBND càr Dăk Lăk neh lơh nền tơn rŭc tơngai bơsram tus ngai 15/9, mơya tŭ do, Dăk Lăk kung gam gơtìp kal ke tàm broă tăc sră măi ai kơnòm bơsram in. Jơnau tờm gơbàn là tài bơh sră măi ờ gơwèt tàm sră cih mat phan bơna kờñ pal geh den bơh ngai 26/8 tus tŭ do, ală hìu tăc sră tàm ală tiah gam ngui Chỉ thị sồ 16 sồr pal til mpồng mờ tam gơl tus broă lơh tăc sră tàm internet.

Jat ồng Trương Văn Băng, Kuang atbồ Công ty cổ phần sră, phan bơna hìu bơsram càr Dăk Lăk dê yal, ală nam lài công ty tăc sră măi, sră cih, phan ngui bơsram sră bơh 7 hìu tăc sră mờ rlau 400 đại lý tàm gùt càr dê. Nam do tài bơh gơlik geh kal ke bơh kòp Covid-19 dê den broă tăc, pơndiang, jun sră tus mờ kơnòm bơsram kung gơtìp kal ke sơl. Bơh ngai 05/9, công ty lơh jat broă tăc online dờp sră blơi bơh năc dê bơh tàm Zalo, Facebook. Tài bơh là nam sơnrờp lam lơh tăc online den công ty kung gơtìp uă ngan kal ke tàm broă jun sră tus mờ cau năc. Kòp Covid-19 tàm Dăk Lăk kờp dŭ kung gam gơlik geh kal ke tàm tơngai tus. Den tàng, dilah UBND càr ờ geh gùng dà broă lơh lơi tă bơsong di tŭ den bơta kơnòm bơsram ờ tơl sră măi tàm nam bơsram pa kung gam geh pơn jat tai sơl.

Cau mblàng K’Hạnh