VOV4.K’ho - Ngai hìng 23 nhai 05, cau tĕ khà gùt lơgar tus bal broă lơh chính trị kuơ màng – Tĕ khà kuang bàng Quốc hội khoă 15 mờ kuang bàng HĐND ală cấp, tơngai bơh nam 2021 tus 2026. Bal mờ gùt lơgar, mpồl lơh broă chính trị càr Dak Lak gam lơh ngan lơh jăt ală bơnah broă dŭt ndơl, rơcang lài nàng dơ̆ tĕ khà geh bơyai lơh niam ờ do ờ dă, gàr niam di mờ adăt boh lam, lơh tờm mờ mùl màl là ngai chờ bơh gùt làng bol dê.

Là dùl tàm ală tiah tờm bơh ƀòn dờng Buôn Ma Thuột dê, sơnah ƀòn Thành Công geh 13 anih đùh sră mờ rơlao 5 rơbô nă cau tĕ khà. Ală bơta bè phan bơna, mpồl cau drơng broă, lir sră măt cau tĕ khà mờ khà măt cau tơlĭk măt tĕ khà, neh geh ală mpồl tĕ khà ai lơh di pal, khoa học, rơcang ai ngai chờ gùt làng bol in. Kờñ gàr niam bơta lơngăp lơngai, ờ do ờ dă, Mpồl đơng lam tĕ khà sơnah ƀòn Thành Công kung neh tam pà mpồl lơh broă, tơnguh broă lòt sền gròi nàng di tŭ gŏ, bơsong ală broă gơlĭk geh (di lah geh).

Măt ală cau tơlĭk măt tĕ khà kuang bàng Quốc hội khoă 15 mờ kuang bàng HĐND ală cấp tơngai bơh nam 2021 tus 2026 geh lir tềng hìu lơh broă UBND sơnah ƀòn Thành Công, ƀòn dờng Buôn Ma Thuột càr Dak Lak

Ồng Phan Hữu Trí, Bí thư Đảng ủy, Chủ tịch Hội dồng Nhân dân, Kuang atbồ đơng lam tĕ khà sơnah ƀòn Thành Công, ƀòn dờng Buôn Ma Thuột, càr Dak Lak pà gĭt: “Bol añ đơng lam Ủy ban tĕ khà pal sùm sền wơl ală kơnòl gơrềng bal tus mờ tĕ khà. Dơ̆ bàr, gàr niam ờ do ờ dă khà măt cau tĕ khà. Pơn jăt tai là sền gàr niam ờ do ờ dă khà măt cau tơlĭk măt tĕ khà, tơnơ̆ mờ tŭ khà măt cau tơlĭk măt tĕ khà neh geh lir den bol añ ai pah mang geh mpồl kuang àng, mpồl gàr ƀòn, mpồl sơnah ƀòn lòt sền gròi tàm ù tiah bol añ jào kơnòl ală kuang bàng pal sùm rơcang ală tiah đùh sră. Tus tŭ do, ală khà măt geh bol añ ndrờm gàr niam ờ do ờ dă”.

Tàm cấp ƀòn dờng, Mpồl đơng lam tĕ khà, Ủy ban tĕ khà mờ Ủy ban Mặt trận Dà lơgar ƀòn dờng Buôn Ma Thuột neh crơng gơs ală mpồl, lơh jăt ală dơ̆ sền gròi broă tĕ khà tàm jơh ală xã, sơnah ƀòn, gàr niam ală tơngu me, broă lơh jăt di mờ tơngai bal mờ adăt boh lam. Ồng Nguyễn Khắc Long, Phó Chủ tịch Mpồl duh broă tĕ khà ƀòn dờng Buôn Ma Thuột pà gĭt, tus tŭ do, geh uă cau tĕ khà neh dờp geh sră tĕ khà mờ gùng dà broă kuang bàng bè khà geh, broă tơlĭk măt kuang bàng Quốc hội khoă 15, Kuang bàng HĐND ală cấp tơngai bơh nam 2021 tus 2026; khà măt cau tơlĭk măt tĕ khà neh geh pơyoa tus tơl hìu, nàng kơlôi sơnơng lài mờ tŭ rơwah ală kuang bàng di pal.

Làng bol tĕ khà càr Dak Lak sền gròi ngan tus mờ cau tơlĭk măt tĕ khà kuang bàng Quốc hội khoă 15 mờ kuang bàng HĐND ală cấp tơngai bơh nam 2021 tus 2026

Gơwèt mờ cau tĕ khà là cau bơsram dờng tŭ rê mờ ƀòn lơgar geh bơtơl khà măt di tŭ nàng geh niam gơnoar làng bol bơh să tờm dê. “Khà măt cau tĕ khà tŭ do bol añ pơn jăt tai sền wơl, lơh khà măt cau tĕ khà tus jơh ngai 21 nhai 05. Tài tŭ do kòp Covid-19 den tàng geh ờ uă hìu bơsram Đại học, Cao đẳng ai cau bơsram bơsram pờ tơlĭk tàm internet, den tàng cau bơsram dờng geh rê tàm hìu, cau bơsram dờng ală tiah ndai geh rê tàm do den tàng pal cih măt wơl, ha là cau bơsram dờng bơsram tàm hìu bơsram Đại học Tây Nguyên geh rê tàm ƀòn ơm kis, ờ ơm tàm do tai, den tàng pal pơn jăt tai sền wơl khà măt cau tĕ khà nàng bol añ di tŭ bơtơl di pal”.

Jăt ồng Y Biêr Niê, Phó Bí thư Tỉnh ủy, Chủ tịch HĐND càr, Kuang atbồ mpồl Kuang bàng Quốc hội càr, Chủ tịch Ủy ban tĕ khà càr Dak Lak yal, gùt càr geh 1 rơbô 794 mpồl tĕ khà mờ 1 rơbô 802 anih đùh sră. Ală broă rơcang ai tĕ khà tàm càr Dak Lak neh lơh gơs, di pal mờ jơnau kờñ bơh Mpồl duh broă tĕ khà dà lơgar geh ai. Kuơ màng, tềng đăp mờ bơta kal ke bơh kòp gơtờp mờ bơta lơngăp lơngai ờ do ờ dă tàm càr, Mpồl sền gàr bơta lơngăp lơngai, ờ do ờ dă mpồl lơh sơnơm neh tơlĭk gùng dà broă lơh sền gàr niam bơta lơngăp lơngai, ờ do ờ dă mpồl bơtiàn tàm càr tàm broă bơyai lơh jăt broă tĕ khà. Mpồl kuang àng neh lơh jăt uă dơ̆ lĭk lơh broă, kơrian cau tìs, tơrgùm lùp khào, bơsong ală broă hình sự geh mpồl bơtiàn sền gròi. Gah lơh sơnơm rơcang lơh ală broă neh geh ai lài, gùng dà tĕ khà tàm bơta kòp Covid-19 gơtìp kal ke...

Ồng Y Biêr Niê đơs: “Gơtùi đơs tŭ do broă rơcang tĕ khà tàm càr Dak Lak kung bè ală broă lơh tờm neh geh lơh gơs di mờ tơngai geh ai mờ di jăt mờ jơnau yal lài bè bơta tŭ do, ală broă, tàm hơ̆ geh bal broă sền gàr bơta lơngăp lơngai, broă lơh sơnơm gam geh lơh niam. Kơ̆p kờ bơh tŭ do tus ngai tĕ khà ală broă geh niam bơnĕ nàng lơh bè lơi, he geh dơ̆ tĕ khà tàm gùt càr Dak Lak geh cồng nha niam bơnĕ ngan, pơgồp bal tàm broă lơh geh cồng nha bal bơh gùt lơgar dê”.

Ngai tĕ khà neh mờr tus. Ngai do 22 nhai 5, 7 pôs ling sền gàr tiah nhàr dà lơgar mờ Tiểu đoàn pơlam tàp ling cơ động, gơwèt mpồl ling sền gàr tiah nhàr dà lơgar càr Dak Lak neh bơyai lơh gờñ bơh dơ̆ tĕ khà Quốc hội khoă 15 mờ HĐND ală cấp tơngai bơh nam 2021 tus 2026.

Mờ broă tus bal pràn bơh gùt mpồl lơh broă chính trị bơh càr tus tàm xã bal mờ broă kơ̆p kờñ, lơh ngan uă bơh cau tĕ khà, broă tĕ khà kuang bàng Quốc hội khoă 15 mờ kuang bàng HĐND ală cấp tơngai bơh nam 2021 tus 2026 càr Dak Lak gam wèt tus lơh geh cồng nha, niam ờ do ờ dă, mùl màl là ngai chờ bơh gùt làng bol dê.

Cau cih Hương Lý-Cau mblàng Ndong Brawl