VOV4.K’ho- Di tơngkah kir sơnrai 39 nam Ngai cau pơgru Việt Nam (20/11), drim ngai 19/11, Sở Giáo dục mờ Đào tạo càr Dăk Lăk bơyai lơh jàu pà khà jờng cau pơgru jak ngan mờ jờng rơ ală cau pơn rơ gơguh jak tàm nam bơsram 2020- 2021.

Tàm nam bơsram 2020- 2021, bulah kong gơ rềng kơn jơ̆ kơn jut ngan tài bơh kòp Covid-19, mơya gah Giáo dục mờ Đào tạo càr neh lơh geh ală cồng nha niam ngan. Cồng nha bơto bơsram ờs mờng, bơto bơsram tờm geh gàr sùm mờ geh tơnguh niam; geh 41 nă kơnòm bơsram jak kấp dà lơgar, Dăk Lăk pơn jat tai lam lài ală càr tiah kềng gah dà lềng đah jum tàm gùl lơgar mờ Tây Nguyên.

Di tŭ do, dờp gơnoar jàu bơh Chủ tịch lơgar dê, kuang đơng lam bồ càr Dăk Lăk neh jàu pà khà jờng Cau pơgru jak ngan ai pơgru Nguyễn Ngọc Thái, pơgru Hìu bơsram kấp 3 chuyên Nguyễn Du, ƀòn dờng Buôn Ma Thuột, càr Dak Lăk; jàu Huân chương Lao động khà 3, bồng bi tàm pơrlòng bơh Chính phủ dê, Bằng khen bơh Thủ tướng Chính phủ dê, bồng bi tàm pơrlòng bơh Bộ Giáo dục mờ Đào tạo dê ai ală cau dùl nă să mờ mpồl cau neh geh cồng nha jak ngan tàm broă lơh bơto bơtê.

Cau mblàng K’Duẩn