VOV4.K’ho- Ngai òr (08/10), Kuang àng ƀòn dờng Buôn Ma Thuột, càr Dăk Lăk neh tơlik kơrnoăt yă cau tìs, lơh jăt kơrnoat sồr kơryan ờ ai lik bơdìh ƀòn ơm kis gơwèt mờ Đỗ Thanh Hải, 36 sơnam, kis tàm sơnah ƀòn Tân Lợi, ƀòn dờng Buôn Ma Thuột, càr Dăk Lăk. Hải gơtìp yă nàng bơsong broă lơh tìs “Lơh gơtờp kòp ngòt rơngơ̆t tus mờ kòn bơnus” jăt sèng 1, bơta 240 Adăt lơh glài hình sự dê. Jăt cồng nha lùp khào bơh kuang àng dê, Đỗ Thanh Hải là cau atbồ tàm Anih lơh broă hìu rơndeh Tiến Oanh, geh anih lơh broă tàm sồ hìu 134 gùng Hai Bà Trưng, sơnah ƀòn Tân Lợi, ƀòn dờng Buôn Ma Thuột.

Mang ngai (10/07), Hải bal mờ 2 nă cau ndai đì tàm rơndeh pơn diang phan geh ƀàng sồ 50H-052.70 bơh ƀòn dờng Hồ Chí Minh rê tus ƀòn dờng Buôn Ma Thuột. Tŭ do, ƀòn dờng Hồ Chí Minh là tiah gơtìp kòp. Tŭ rê tus hờ hìu rơndeh, Hải ờ tus anih lơh broă lơh sơnơm nàng lơh jăt broă broă yal lơh sơnơm di jăt mờ kơrnoăt geh ai, mờ neh lòt tus uă tiah tàm ƀòn dờng Buôn Ma Thuột mờ tìp mờ uă cau ndai. Tơnơ̆ mờ tŭ neh sền gŏ gơtìp kòp, să tờm Hải kung ờ gŏ yal mờ gah lơh sơnơm in mờ gam lơh jăt broă lòt ntrờn tàm tiah ndai, lơh broă jòi cau tìp rềp, sền git anih lơh gơtờp bơh mpồl lơh broă geh gơnoar dê gơtìp kal ke. Bơh broă lùp khào rơwah, kuang àng neh gŏ Đỗ Thanh Hải neh lơh 10 nă cau ndai kis tàm ƀòn dờng Buôn Ma Thuột gơtìp gơtờp mờ kòp Covid-19. Anih lơh broă geh gơnoar gam lơh gơs sră nggal, lơh glài cau tìs di jăt mờ kơrnoăt geh ai tàm adăt boh lam dê.

Cau mblàng Ndong Brawl