VOV4.K’ho- Klo ngai 31/5, Bộ Y tế yal geh tai 1 nă cau bơtờp kòp Covid-19 tàm Dak Lak, là cau kòp sồ 7186. Cau do ơm tàm thôn 7, xã Cư Mốt, kơnhoàl Ea H’Leo, là F1 bơh cau kòp tàm ƀòn dờng Hồ Chí Minh dê. Tềng đap broă gơlik geh kal ke bơh kòp bơtờp dê, kơnhoàl Ea H’Leo neh sơbac mhar lam lơh broă lơh đal git tiah kơryan kòp. Tơnơ̆ 1 ngai, rlau 600 nă cau F1, F2 mờ F3 neh geh jòi bàn, 10 tiah gam lơh jat kơrnuat wàng se. Broă ơm yah ngài mpồl bơtiàn kung geh lam lơh sơbac mhar ngan.

Ồng Nông Ngọc Thiết, Chủ tịch Ủy ban Nhân dân xã Ea Wy, là tiah geh ală anih gơ rềng tus cau kòp sồ 7186 pà git, bơh 10 jơ mang ngai 30/5, mpồl lơh boă geh gơnoar xã neh lơh anih sền gròi, wàng se ală tiah hìu tac phan ñô sa Thanh Dậu, hìu tac dà kơphe Cây Si, hìu tac phan sa 3 Khía, cơldŭ kham Nha khoa Viẹet Pháp 2, mờ kung jòi ală cau ơm rềp F1, F2: “Mờ tơl broă lơh den neh kờp geh 27 nă cau F1, ală cau F2 kung mờr 200 nă. Bol hi neh pờ 5 anih sền gròi tàm ală tiah geh cau F0 lòt gan. Ală anih sền gròi kung neh geh yal tàm loa pờ tơlik jơnau đơs. Bol hi sồr Hìu sơnơm xã pơn jat tai jòi ală cau F1, F2 mờ F3. Bè broă do bol hi hòi jà làng bol git tơl jơnau tơnggi, mờ bol hi pơn jat tai sồr yal gah lơh sơnơm in”.

Wàng se tiah hìu tac phan sa 3 Khía tàm xã Ea Wy

Ai tàm xã Cư Mốt, là tiah geh cau kòp Covid-19 sồ 7185, bơh mang ngai 30/5 tus tŭ do, gơnoar atbồ xã neh jòi cau ơm rềp mờ lam lòt tam cah is tơrgùm bal 15 nă cau F1. 150 nă cau F2 mờ 180 nă cau F3 kung neh geh pơlam tam cah is sơl. Xã kung pờ 5 anih sền gròi wàng se tàm 3 thôn 6a, 6b mờ thôn 7 bal mờ 2 rbô 500 nă cau. Ồng Võ Văn Lệ, Phó Chủ tịch Ủy ban Nhân dân xã Cư Mốt pà git, tơl anih sền gròi wàng se, gơnoar atbồ xã neh ai 7 nă cau geh mpồl rơcang gàr ƀòn, đoàn ơruh pơnu, mpồl cau ùr mờ kuang àng drơng broă. Broă lơh dong kờl làng bol tàm tiah wàng se in kung geh xã sền gròi lam lơh: “Bol hi jàu tơl mpồl 2 nă klau pơnu mờ cau ùr tŭ làng bol tàm tiah wàng se geh jơnau kờñ den geh yal mờ mpồl ơruh pơnu lơh broă dong kờl is bol hi dê geh lòt blơi ală jơnau kờñ kuơmàng bơh làng bol dê nàng pà làng bol in. Ủy ban Mặt trận kung geh jơnau hòi jà kuang bàng công chức kung bè viên chức tàm tiah do tă pơgồp dong kờl ai broă lơh rơcang sơndră kòp do in”.

Jat ồng Nguyễn Văn Hà, Chủ tịch Ủy ban Nhân dân kơnhoàl Ea H’Leo pà git, kờp tus 2 jơ mho ngai 31/5, kơnhoàl do neh jòi geh 62 nă cau F1, rlau 300 nă cau F2. Tŭ do, jơh ală cau F1 neh geh jun tus anih tam cah is tơrgùm bal bơh càr dê tàm Hìu ơm bal Hìu bơsram Cao đẳng Công nghệ Tây Nguyên. Cồng nha xét nghiệm neh geh 47 tàm 62 nă cau ờ bơtờp dơ̆ 1 mờ virus Sars CoV-2. Bơh 9 jơ mang ngai 31/5, Ủy ban Nhân dân kơnhoàl kung lơh jat broă ơm yah ngài gùt mpồl bơtiàn jat jơnau sồr sồ 15 bơh Thủ tướng Chính phủ dê gơ wèt tus mờ thị trấn Ea Drăng, xã Ea Wy.

Anih sền gròi thôn 6b xã Cư Mốt

Ồng Nguyễn Văn Hà đơs nền, gơnoar atbồ kơnhoàl neh geh broă rơndap lơh gàr tơl phan ngui sa nàng drơng rài kis làng bol in. Bal mờ hơ̆, Ủy ban Nhân dân kơnhoàl neh tam pà kơnòl broă ai tơl mpồl in mờ sồr ală mpồl lơh broă geh gơnoar pal lơh glài kràñ ală cau lơh tìs jơnau sồr ơm yah ngài: “Niam chài geh kơnòl pal lòt sền ală gah niam chài atbồ, Nội vụ den lòt sền broă pin dờn jat yàng ai kuang àng den lòt sền ală hìu rơndeh jun, rò, pơndiang nac. Gơwèt mờ ală xã, ală cơldŭ lơh broă, mpồl lơh broă dilah lời gơlik geh bơta lơh tìs den kơ nòl hơ̆ gơ wèt hờ cau atbồ. Ờ gŏ di sền ờ sơp, roh bơta rơcang ngac, mơya sùm geh nùs nhơm rơcang lài, ờ rmơp dơl”.

Dơ̆ bơtờp kòp Covid-19 dơ̆ 4 do, Dak Lak neh geh 4 nă cau kòp hơ̆ là ală cau kòp sồ 3237, 3334, 3836 mờ 7186. Càr do kung neh tam cah is tơrgùm bal, tam cah is git nđờ rhiang nă cau F1, tam cah is tàm hìu rlau 5 rbô nă cau mờ rlau 3 rbô nă cau kis tàm ală anih wàng se.

Cau mblàng K’Duẩn