VOV4.K’ho- Dăk Lăk kung gam gàr bè ờs gùng dà bơyai lơh pơrlòng mŭt ơdŭ 10 hìu bơsram kấp pe bal mờ 4 môn pơrlòng, là Ngữ văn, Toán, Dà đơs lơgar ndai mờ môn bơsram sùm. Nam bơsram 2021- 2022, Dăk Lăk geh bơyai lơh pơrlòng mŭt bơsram ơdŭ 10 gơwèt mờ 2 hìu bơsram kấp pe krơi is, là: Hìu bơsram kấp pe Chuyên Nguyễn Du mờ Hìu bơsram Kấp pe Kòn cau ơm sa bĭc tơn tàm hìu bơsram Nơ Trang Lơng; ală hìu bơsram dà lơgar crơng gơs ndai lơh jăt gùng dà sền swì săc rwah.

Tơngai bơyai lơh dơ̆ pơrlòng tàm ngai 8 mờ 9/6/2021. Jăt mờ hơ̆, ngai 8/6, ƀùi drim, cau pơrlòng lơh jơnau pơrlòng Ngữ văn, ƀùi mho, cau pơrlòng lơh jơnau pơrlòng Dà đơs lơgar ndai. Ngai 9/6, ƀùi drim, cau pơrlòng lơh jơnau pơrlòng Toán mờ ƀùi mho lơh jơnau pơrlòng ală môn sùm bơsram. Bè hơ̆, Dăk Lăk kung gam gàr bè ờs sơl tơngai pơrlòng mŭt bơsram ơdŭ 10 bè neh yal lài hơ̆. Nàng dơ̆ pơrlòng mŭt bơsram ơdŭ 10 geh lơh niam, ờdo ờdă, jăt di broă rơndăp lơh, Sở Giáo dục mờ Đào tạo neh sồr kuang bàng, cau pơgru, cau lơh broă tàm ală hìu bơsram tơnguh uă nùs nhơm geh kơnòl, lơh jăt niam rơcăng lài niam ngan rlau jơh bè phan bơna drơng dơ̆ pơrlòng in, ală anih pơrlòng sền gàr ờdo ờdă rơcăng sơndră kòp Covid-19.

Cau mblàng Lơ Mu K’Yến