VOV4.K’ho- Jăt Công ty Ồs đèng càr Dak Lak dê yal, bơh bồ nam tus tu\ do neh sền go\ mờr 700 dơ\ lơh tìs bè khà priă đèng, ku\p ai rlau 500 tơlak priă. Broă lơh tìs uă ngan rlau jơh là blơ\ blăc broă cih yal jơnau kờ` ngui đèng tàm sră pơrgon kă bro đèng.

Tàm hơ\, uă ngan là cih yal jơnau kờ` lơh sa (geh khà priă đèng lơyah) mơya ngui wơl tàm jơnau kờ` kă bro drơng broă (geh khà priă đèng jơnhoa rlau). Bal mờ hơ\ là broă lơh kơldang bồ lơh tam gơl rơndăp tăp sèng gùng che bơh ngkời jiơ đèng nàng ngui đèng bơh jiơ đèng geh khà priă tăc đèng lơyah rlau.

Mìng kờp is tàm tiah gơ wèt Ồs đèng đah tô Buôn Ma Thuột, bơh bồ nam tus tu\ do neh gơlik mờr 150 nă cau lơh tìs, gah lơh đèng sền go\ mờ ku\p ai wơl mờr 200 tơlak priă, Sở Công thương lơh glài 14 tơlak priă.

Ồng Lâm Anh Dũng – Kuang atbồ mpồl lòt sền gròi sền kă bro đèng, di Ồs đèng Đah tô Buôn Ma Thuột gơ wèt Công ty Ồs đèng Dak Lak dê pà gi\t, nàng kơryan jơnau lơh tìs do, bal mờ broă mblàng yal, mpồl lơh broă do ngui ală broă lơh măy mok nàng sền go\ mờ bơsong di tu\.

Cau mblàng Lơ Mu K’Yến