VOV4.K’ho- Tềng đăp bơta gơbàn kal ke bơh kòp bơtờp tàm phan ròng dê, Sở Nông nghiệp mờ Phát triển Nông thôn càr Dăk Lăk pa geh broă rơndăp lơh lam lơh “Nhai kloh niam, ƀồm sơnơm kơryan kòp lơh sàng goh tiah ơm kis dơ̆ dùl nam 2021” mờ rơcăng sơndră kòp bơtờp tàm ù tiah càr dê.

Jăt mờ hơ̆, bơh ngai 20/6/2021 tus ngai 20/7/2021, ală anih lơh broă, hìu bơnhă ròng siam phan ròng tàm ù tiah càr Dăk Lăk dê geh tus ƀồm sơnơm kơryan jơh kòp tàm tiah lơh wàng ròng phan, tiah ròng siam phan ròng mờ tiah rềp bal pah poh dùl dơ̆. Kloh niam sàng goh rơndeh rơndồ, phan ngui pơndiang phan tơnơ̆ pah dơ̆ jun pơndiang phan.

Pơs wàs sàng goh jơh ù tiah ròng krơ̆ phan ròng; khòm tơrgùm phơng, sồ siă nàng chu pơrgŭc halà tơ̆p. Kờp tus ngai 17/6, Dăk Lăk geh 8 tàm 15 kơnhoàl, thị xã, ƀòn dờng geh kòp jê ndul gơjroh sur châu Phi, kờp jơh sur bơtờp kòp, chơ̆t mờ pal chu pơrgŭc, tơ̆p là rlau 350 nơm.

Cau mblàng Lơ Mu K’Yến