VOV4.K’ho- Ủy ban Nhân dân kơnhoàl Ea Hleo, càr Dăk Lăk pà git, Rơndap broă lơh Hìu măi ồs đèng càl Ea Nam tàm kơnhoàl neh lơh gơs, mìng gam lơh sir broă tam gơl kỹ thuật den geh gơtùi gàr niam broă mut bal mờ gùng che ồs đèng dà lơgar.

                                                  Dùl bơnah rơndap broă lơh ồs đèng càl Ea Nam

Do ờ mìng là rơndap broă lơh ồs đèng càl đang ù gờl dờng ngan rlau jơh gùt lơgar, geh lam lơh mờ tŭ tơngai mhar ngan rlau jơh, mờ gam ring bal bè bơta kuơ lơh sa mờ mpồl bơtiàn tai. Rơndap broă lơh Hìu măi ồs đèng càl Ea Nam bơh Tập đoàn Trung Nam lơh cau tờm bơcri priă, geh 84 jrong càl, 1 kơi sồ 200 thơk gùng che 500KV, kờp jơh priă tă lơh 16 rbô 500 tơmàn đong, lam lơh tàm 3 xã Ea Nam, Ea Khal mờ Dliê Yang, kơnhoàl Ea Hleo. Rơndap broă geh kơrnuat bơcri priă tàm ngai 31/12/2020 mờ tơngai lam lơh uă ndrờm geh lơh tàm tŭ tơngai kòp Covid-19 bơtờp uă. Bulah bè hơ̆, mờ bơta lơh ngan uă bơh jơh bal cau bơcri priă, ală mpồl lam lơh mờ gơnoar atbồ, mpồl cau ală kấp kơnhoàl Ea Hleo mờ càr Dăk Lăk dê, rơndap broă lơh neh lơh gơs broă lam lơh mờ ờ lời gơlik geh bơta ờ niam lơi mờ bơta tam pìt tam phà dờng lơi.

Jat kờp dŭ bơh cau tờm bơcri priă dê, tŭ lơh broă, Rơndap broă lơh hìu măi ồs đèng càl Ea Nam geh lơh geh rlau 1 tơmàn 100 tơlak kWh pah nam. Dilah gah ồs đèng blơi jơh khà đèng do, priă lơh geh dùl nam bơh rơndap broă lơh dê geh mờr 94 tơlak dolar Mỹ, tă pơgồp tàm kes priă càr mờr 250 tơmàn đong.

Cau mblàng K’Duẩn