VOV4.K’ho - Tềng đăp mờ kal ke bơh kòp Covid-19, mho òr (31/05), UBND ƀòn dờng Buôn Ma Thuột, càr Dak Lak neh bơyai mŭt lơh wơl anih sền gròi ală gah lơh broă tàm gùng Hồ Chí Minh gơl lòt gan rơbàng 14 gơwèt xã Hoà Phú nàng sơndră, tam dră mờ kòp Covid-19.

Anih sơndră mờ kòp Covid-19 tàm gùng Hồ Chí Minh gơl lòt gan càr Dak Lak geh mŭt lơh broă wơl

Jăt mờ hơ̆, bơh tàm tŭ 5 jơ mho ngai òr (31/05), ală mpồl lơh broă, tàm hơ̆ geh Cảnh sát sền gàr gùng lòt, gah lơh sơnơm... tềng anih sền gròi neh sền gròi cau bal mờ rơndeh lĭk mờ mŭt tàm càr Dak Lak nàng kơrian kòp gơtờp; sền gròi broă lơh jăt mờ broă sơndră, tam dră mờ kòp mờ bơsong broă lơh sơnơm (sền gròi, was bơta duh să jan, pơn chèo, yal broă lơh sơnơm, lơh kloh vi trùng bơh cau bal mờ rơndeh lòt gan anih sền gròi). Mờ sền gròi, gŏ di tŭ ală cau gơtìp kòp ha là geh pin gơtìp kòp, ală cau geh tơngŏ gơtìp bè kòp Covid-19 nàng lơh jăt ală broă tam cah is, sơm kòp di tŭ di lah gŏ gơtìp kòp.

Kuang bàng lơh sơnơm ƀòn dờng Buôn Ma Thuột bơto sồr làng bol yal bè broă lơh sơnơm

Mang ngai 31/5, mò H’Yim Kđoh - Phó Chủ tịch UBND càr Dak Lak mơ kung là Phó Kuang atbồ Mpồl đơng lam rcang sơndră kòp Covid-19 càr dê neh kĭ sră nggal lam lơh ală broă lơh jal mhar rcang sơndră kòp Covid-19 tàm ù tiah pa geh gŏ cau bơtờp kòp Covid-19 dơ̆ 4 tàm kơnhoàl Ea H’leo (cau kòp sồ 7186). Jat sră nggal ai ngui, gùt ƀòn dờng Buôn Ma Thuột geh ờ ai gơnoar broă tơrgùm uă ir 10 nă cau gơwèt mờ ală anih tăc phan sa, Anih drơng broă ñô sa, anih ràng tăc dà kơphê, dà hùc; tiah nhơl lơh rài bồ tơngoh mpồl bơtiàn. Ơm ing lơh broă ală anih lơh sa kă bro ñô sa jat kềng gah gùng. Kung jat sră nggal do, làng bol rê halà tus bơh càr bơh ală tiah geh bơta kòp Covid-19 gơlik geh kal ke sồr pal tus tơn tàm hìu sơnơm rềp ngan rlau jơh nàng yal tiah lòt rê mờ geh bơto pơlam lơh jat broă ai ơm yah ngài tàm hìu tàm tơngai 21 ngai. Tàm ù tiah kơnhoàl Ea H’leo lơh jat niam ală broă lơh wàng se kơryan kòp, ai ơm yah ngài nàng rcang sơndră kòp sơnđờm kờp bơh 9 jiơ mang ngai 31/5/2021 tus di tŭ geh jơnau yal pa.

Cau mblàng Ndong Brawl-K' Hạnh