VOV4.K’ho- Tơngai pa do, tàm Dăk Lăk sùm sền gŏ ală mpồl cau kòp Covid-19 tàm mpồl bơtiàn. Rcang sơndră mờ bơta gơlik geh kòp kal ke, Dăk Lăk geh lơh kràñ kơrnoat lơh glài, tơnguh broă mblàng yal hòi jà làng bol tơnguh uă bơta gĭt wă tàm broă rcang sơndră kòp. Mơkung tơnguh uă bơta pràn dờp mờ sơm kòp ai cau kòp Covid-19 tàm hìu sơnơm Krông Buk in tơnguh bơta pràn rlau bàr dơ̆, rcang tai 2 anih ai ơm yah ngài dờng tàm Buôn Ma Thuột, tơl tiah ai pơgap 1 rơbô 300 nă cau in.

Tơnơ̆ mờr 2 poh tơrmù khà ai ơm yah ngài mpồl bơtiàn jat Chỉ thị sồ 16 tơrmù lơh jat Chỉ thị sồ 15 bơh Thủ tướng Chính phủ dê, ƀòn dờng Buôn Ma Thuột, càr Dăk Lăk neh lơh kràñ wơl tai ală jơnau sồr ai ơm yah ngài nàng rcang sơndră kòp. Mìng 13 ngai lơm, sền gŏ tai 4 mpồl cau kòp tàm mpồl bơtiàn mờ mờr 50 nă cau bơtờp pa, ờ mìng lơh ƀòn dờng Buôn Ma Thuột pal ngui wơl Chỉ thị sồ 16 mờ kung gam bơyai lơh xét nghiệm mhar tàm gùt ù tiah ƀòn dờng dê in, mờ mờr 102 rơbô hìu bơnhă làng bol. Ồng Vũ Văn Hưng, Chủ tịch UBND ƀòn dờng Buôn Ma Thuột pà gĭt: geh 70 mpồl xét nghiệm neh geh crơng gơs, mờ xét nghiệm sùm bơh ngai 27/8. Bơdìh hơ̆, dơ̆ ai ơm yah ngài kràñ cê ngan rlau jơh mờ ƀòn dờng lơh jat, geh gàr niam broă xét nghiệm geh lơh sơr băc mhar, rơndap tap sèng, nàng tam cah is jơh ală cau F0 gam geh tàm mpồl bơtiàn. Ồng Vũ Văn Hưng đơs:

Lơh jat Chỉ thị sồ 16 là kơryan ờ ai khat dùl nă cau lơi lik lòt tàm gùng, ờ kờp ală cau lơh jat kơnòl broă dà lơgar dê. Mờ ngan bè hơ̆, ngai 01/9 ờ geh broă lơh tus tàm hìu bơsram ờ, ơm jơh ală broă bơsram sră. Lòt drà den geh ală mpồl cau, cau ùr, ơruh pơnu geh lòt drà ala ai làng bol in tus tơl tổ dân phố, thôn, ƀòn. Gùt ƀòn dờng geh xét nghiệm dơ̆ dùl dơ̆ jat mẫu pơgồp bal bơh jơh ală hìu bơnhă dê, tàm tơngai bơh 5 tus 7 ngai geh lơh sir.

Dùl tiah pa wàng se tàm xã Cư Êbur, ƀòn dờng Buôn Ma Thuột

Sùm 2 poh do, kòp Covid-19 tàm Dăk Lăk gơlik geh pal kơlôi rcang ngan. Ờ mìng tàm tiah drà Buôn Ma Thuột geh uă làng bol lơm gời mờ ală xã geh ết làng bol, bè xã Cư Bao (thị xã Buôn Hồ), xã Cư Né (kơnhoàl Krông Buk) mờ xã Ea Nam (kơnhoàl Ea H’Leo) sùm sền gŏ mpồl cau bơtờp tàm mpồl bơtiàn, mờ rlau 150 nă cau bơtờp kòp.

Bơta geh bal tàm ală mpồl cau bơtờp kòp do là ndrờm geh gơrềng tus broă lơh bơh ală mpồl lơh sa kă bro geh broă kă bro sùm mờ ală càr, ƀòn dờng gam geh kòp Covid-19 bơtờp uă. Broă jòi gĭt tiah lòt rê pà gŏ, gam geh uă broă lơh ờ hềt pràn tàm broă gròi sền cau măy rơndeh, rơndeh rơndồ, tàm yal tơngĭt bal đah ală càr mờ đah ală mpồl lơh broă geh gơnoar dê. Bè tàm thị xã Buôn Hồ, tơnơ̆ mờr 1 nhai sền gŏ mpồl cau kòp 57 nă cau bơtờp, broă jòi gĭt tiah lòt rê kung gam ơm wơl tàm 1 mpồl lơh sa kă bro, tài bơh ờ geh jơnau yal bè cau măy rơndeh tus jun mờ tui phan tàm mpồl lơh sa kă bro do dê tàm ală ngai bồ nhai 8 pa do. Thiếu tá Trần Ngọc Tú – Kuang atbồ Mpồl Kảnh sát gùng lòt sồ 1, Phòng Kảnh sát gùng lòt Kuang àng càr Dăk Lăk, bal mờ ală mpồl lơh broă geh gơnoar lơh kơnòl broă tàm Anih gròi sền kòp tàm rbàng sồ 110, gròi sền cau, rơndeh rơndồ bơh tiah đah tô dà lơgar mut tàm càr pà gĭt, tŭ do broă kal ke ngan broă jòi gĭt tiah lòt rê neh geh bơsong kơnờm công nghệ quét mã QR bơh tàm điện thoại at tê ngăc ngar.

Tŭ hơ̆ den ờ hềt geh công nghệ do ờ. Tŭ do den neh quét mã QR jơh lơm. Rơndeh tus là ndrờm sồr quét mã QR lơm, geh gah lơh sơnơm bal mờ Bộ Kuang àng tơn. Tŭ mờ quét mã den geh tơl làm jơh ală jơnau yal tơngĭt.

Sră wăc sềr rùp sền sơ wì bơta pơhìn bơtờp kòp Covid-19 kơnă xã tàm Dăk Lăk

Tềng đap bơta gơlik geh kal ke bơh kòp dê, pơrjum Mpồl đơng lam rcang sơndră kòp Covid-19 càr Dăk Lăk, ồng Phạm Ngọc Nghị- Chủ tịch UBND càr dê đơs là, kung gam geh bơta sền ờ sơ̆p mờ ờ rcang sền ngăc bơh làng bol mờ bơh mpồl lơh broă geh gơnoar dê. Bal mờ jơnau sồr lơh kràñ kơrnoat lơh glài, tơnguh broă mblàng yal, hòi jà làng bol tơnguh uă bơta gĭt wă tàm broă rcang sơndră kòp, ală tiah tàm càr pal rcang lài ai ală bơta digơlan gơlik geh kal ke rlau tai nàng geh gùng dà broă lơh ngan ngồn mờ di tŭ. Tềng đap mat, Dăk Lăk geh tơnguh uă bơta pràn tơrgùm mờ sơm kòp ai cau kòp Covid-19 in tàm hìu sơnơm Krông Buk bơh 100 nơm jơnờng tus 200 nơm jơnờng; rcang lơh tai 2 anih ai ơm yah ngài dờng tàm ƀòn dờng Buôn Ma Thuột, tơl tiah ơm ai pơgap 1 rơbô 300 nă cau in. Mờ jat ồng Phạm Ngọc Nghị đơs, bơta pràn sơm kòp ai cau kòp Covid-19 in tàm tiah do dê kung pal geh tơnguh uă.

Sồr Hìu sơnơm dờng tiah do dê pal rcang 500 nơm jơnờng, tài bơh bol he gam pal dong kờl ai ală càr tàm tiah Tây Nguyên in tai. Kờñ pal rcang phan bơna lài ngan. Ai bè tơnơ̆ do, tŭ geh cau kòp den he mìng geh pơn jat tai ai tai mpồl cau lơh broă. Tàm broă sơm kòp den lơh ngan nàng cau kòp in tus cờn 2 là geh rê bơh hìu sơnơm tơn. Ai tus cờn 3 mìng là bòl glàr ờ gĭt mbè lơi ngan.

Jat Anih gròi sền kòp tê jê să càr Dăk Lăk, tàm càr geh 1 kơnhoàl gơwèt “tiah tơlir”- tiah ờdo ờdă. 8 kơnhoàl tàm tiah geh bơta pơhìn bơtờp kòp; 3 kơnhoàl, 1 thị xã mờ ƀòn dờng Buôn Ma Thuột, là tiah geh bơta pơhìn bơtờp kòp uă, mờ kơnhoàl Krông Buk ơm tàm tiah tờm pơhìn bơtờp kòp uă ngan. Tàm kơnă cờn sơndră kòp Covid-19, Buôn Ma Thuột mờ Krông Buk neh ai ơm yah ngài mpồl bơtiàn kràñ ngan bơh mho ngai 26/8. Broă xét nghiệm tơrgùm jơh bơta pràn kung sơnđờm geh lam lơh. Tàm hơ̆, ƀòn dờng Buôn Ma Thuột sơnđờm xét nghiệm ai làng bol gùt ƀòn dờng in mờ kơnhoàl Ea Kar sơnđờm xét nghiệm tàm jơh ală ƀòn làng bol jơi bơtiàn kòn cau in. Làng bol Dăk Lăk kơ̆p kơnờm ală broă lơh ngan pa do geh dong sơr băc mhar tam cah is ală cau F0 gam geh tàm mpồl bơtiàn, tơn jơh broă sền gŏ tai ală mpồl cau bơtờp kòp uă, pơgồp bơnah kơryan kòp geh cồng nha gơwèt mờ kòp dờng Covid-19.

Jat VOV Tây Nguyên- Cau mblàng K’Hạnh