VOV4.K’ho- Plai sầu riêng tiơng pơn rơ bơh càr Dăk Lăk dê gam gơtìp kal ke ờ hềt geh tŭ lơi sền gŏ bơh lài tus tŭ do. Kòp Covid-19 bal mờ ală kòl yan tàm broă pơndiang, tac bro gơlik geh tàm càr mờ bơdìh càr, lơh bơta plai chi do ờ gơtùi tac tàm uă tiah. Pa rơp bồ kàl, mơya neh geh cau pal tac gơ jă gơ jal plai sầu riêng mờ khà priă lơyah ngan, ai kàl tờm bơh sầu riêng Dăk Lăk dê geh sơn đờm bơh nhai 8 do, mờ cồng nha tơnhàu mờr 70 rbô tấn. Nàng gàr cồng nha lơh sa làng bol in, gah lơh sa sươn sre mờ gơ noar atbồ càr gam lơh ngan jòi anih tac, bơsong kal ke, tơrmù ƀà bơta kơlôi rơcang ai cau lơh broă sa in.

Bal mờ broă lòt lơh broă tàm anih lơh broă tàm ƀòn dờng Buôn Ma Thuột, bi H’Nêc Êñuôl, ơm tàm ƀòn Alê B, ƀòn dờng Buôn Ma Thuột, càr Dăk Lăk sùm yal tac sầu riêng hìu bơnhă dê tàm pang facebook is bi dê. Pơgap mờ do 3 poh, tŭ sầu riêng mut tàm kàl tơnhàu, bi tac mờ khà priă bơh 15 tus 30 rbô đông tàm dùl kĭ jat bè tơl bơta sầu riêng. Tơ nơ̆ hơ̆, kòp Covid-19 gơlik geh kal ke, ƀòn dờng Buôn Ma Thuột ngui jơnau sồr sồ 16, broă tac sầu riêng gơtìp uă ngan kal ke, mìng gơtùi tac rac rài cau tac bro in mờ khà priă 7 rbô đông tàm dùl kĭ. Bi H’Nêc pà git, ală jơnau wờl să bơh cau lơh broă sa dê bè git nđờ tấn sầu riêng neh gơtìp tuh sang sur in sa là geh ngan. Hìu bơnhă bơklau bi Nêc dê ơm tàm kơnhòal Cư Kuiñ, là dùl tiah ndai bơh càr Dăk Lăk dê ơm yah ngài mpồl bơtìan jat jơnau sồr sồ 16 gam pơhìn digơlan ờ geh priă cồng dùl êt lơi tơn, bulah sầu riêng tơnhàu geh uă ngan: “Tàm kơnhòal Cư Kuiñ, nđờ lồ sầu riêng bơh hìu bơbklau dê ờ geh cau lơi blơi tơn. Ờ gơtùi tac tàu tiah hơ̆ gơtìp wàng se, den tàng pal tuh sang sur in sa. Ai gar den ìs nàng tac cau in ờng sơntìl. Jơh gùt ƀòn Jung A, Jung B, xã Ea K’Tuar, hìu bơklau geh 6 lồ mờ nggùl, là kơnhòal gơtìp wàng se, ờ ai cau lik mut den tàng ờ gơtùi tac, den tàng mìng git tuh sang sur in sa”.

Dăk Lăk tŭ do geh mờr 10 rbô lồ sầu riêng, khà tơnhàu nam lài geh mờr 70 rbô tấn. Kàl tơnhàu sầu riêng tàm càr sùm sơn đờm tàm nhai 7 mờ ală bơta sầu riêng sơntìl yau; nhai 8 den tơnhàu sầu riêng Ri6; lồi nhai 8, bồ nhai 9 tơnhàu sầu riêng Dona mờ Monthon tac hờ lơgar ndai. Dơ̆ bơ tờp kòp Covid-19 do neh lơh gơbàn kal ke dờng ngan ai cau lơh broă sa geh sơntìl sầu riêng yau in tài gơtìp kòl yan tàm broă tac sầu riêng gơlik geh tàm kàl tơnhàu uă tơn. Ală cau tam sầu riêng Ri6, Dona, geh cồng nha lơh sa uă rlau 2 dơ̆ kung ờ suk ngan tài bơh sầu riêng neh sơn đờm dum, gơ jrùh mơya ờ hềt geh tềl tơnggŏ lơi bơh drà kă bro. Ồng Y Hrah Êban, cau tam sầu riêng tàm xã Ea Tu, ƀòn dờng Buôn Ma Thuột kơlôi rơcang bè do: “Sầu riêng nam do gơtìp kal ke ngan tài tus tŭ do kung ờ hềt geh cau lơi lùp blơi, hơ̆ là bơta lài ngan, ai dơ̆ 2 den drà kă bro tus tŭ do kung ờ hềt klo jơnau yal tơnggit lơi bè khà priă sơl”.

Broă tac bro sầu riêng tàm Krông Păk, Dăk Lăk tŭ ờ hềt gơtìp gơ rềng tài bơh kòp Covid-19

Jat ồng Nguyễn Hoài Dương, Kuang atbồ Sở Nông nghiệp mờ Phát triển Nông thôn càr Dăk Lăk yal, Sở neh git bơta kòl yan, ờ gơtùi tac sầu riêng tàm ală tiah gam ơm yah ngài mpồl bơtìan jat jơnau sồr sồ 16 mờ pa geh sră nggal dan Ủy ban Nhân dân càr bơsong. Jat hơ̆, Sở dan Ủy ban Nhân dân càr Dăk Lăk pơlam ală sở, gah broă lơh geh gơ rềng, ai tơlik broă rơndap lơh atbồ, rơcang sơndră kòp bè lơi ờ mìng nền nòn, mờ gam ờ lơh kòl yan tus broă tac sầu riêng mờ ală bơta phan lơh gơs bơh sươn sre. Bè ală bơta sầu riêng geh cồng nha lơh sa jơnhua ngan rlau jơh càr dê, mut tàm kàl tơnhàu bơh bồ poh tus, Dăk Lăk digơlan pal kơ nờm tus broă lơh bal bơh uă Bộ, gah broă lơh, ală càr, ƀòn dờng tàm gùt lơgar. Ồng Nguyễn Hoài Dương pà git: “Bol hi geh sră nggal pơyua Ủy ban Nhân dân, dan Ủy ban Nhân dân càr tàm tơrbŏ bal mờ Bộ Công thương, Bộ Thông tin truyền thông geh anih kă bro điện tử mờ ală càr, ƀòn dờng ndai, yal tơnggit bè sầu riêng mờ tŭ tơngai tơnhàu bơh ală tiah dê, nàng geh bơta tàm tơrbŏ bal mờ ală anih tờm blơi phan”.

Ală nam rềp ndo, sầu riêng mờ chi sa plai neh tiơng pơn rơ bè dùl gah lơh sa tờm bơh broă lơh sa sươn sre Dăk Lăk dê, bơdìh mờ kơphe, tiêu, dong uă ƀòn tàm càr lik klàs rƀah, brồ guh lơh pas. Bulah bè hơ̆, mờ bơta gơlik geh bơh kòp Covid-19 dê bal mờ ală bơta kòl yan bè broă pơndiang, tac bro, plai chi Dăk Lăk dê sùm pal kong mờ hoàc huơr kơn jơ̆ ngan. Kàl tơnhàu pơ ò nhai 5 pa do, khà priă pơ ò geh tŭ gơmù hơ đơm 5 rbô đông tàm 1 kĭ; neh geh uă cau tam pơ ò pal tuh sang tài ờ geh anih tac. Tŭ do tus sầu riêng mờ bơ kung gơtìp kal ke tàm tơngai bơ tờp kòp Covid-19 sơl. Tàm bơta bè hơ̆, cau lơh broă sa Dăk Lăk gam gròi sền broă lơh jat jơnau đơng lam bơh Chính phủ dê mờ kơp kờñ là, sră nggal sồ 1015 bơh Thủ tướng Chính phủ dê mờ Phó Phó Thủ tướng ồng Lê Văn Thành pa kĭ ngai 25 nhai 7 pa do geh ală tiah mhar lơh jat dùl ròt bal, lơh gơlik bơta ƀươn ngan rlau jơh ai broă tac mờ pơndiang phan bơna pal geh pah ngai, tàm hơ̆ geh plai chi mờ phan lơh gơs bơh sươn sre. Bơh hơ̆ gơtùi tă bơsong kòl yan gam gơlik geh, tơrmù tus khà lơyah ngan rlau jơh ală hoàc huơr ai ală tiah lơh gơlik phan bơh sươn sre, plai chi dờng tàm càr in.

Cau mblàng K’Duẩn