VOV4.K’ho- Dăk Lăk geh lơh ngan hòi jà tă pơgồp ală priă jền nàng rơcăng ai cau rƀah in, dong kờl cau rƀah geh wă rò sa tềp dùl bă wil tơl. Do là dùl tàm ală tơngume geh Mặt trận dà lơgar Việt Nam càr Dăk Lăk dê lam lơh tàm pơrjum tơn jơh broă lơh nam 2021 mờ lam lơh Broă lơh pơgồp bal ring bal lơh broă nam 2022 geh lơh tàm ngai 28/12.

Jăt jơnau yal tàm pơrjum, tàm nam do, Ủy ƀan Mặt trận dà lơgar Việt Nam ală kâp càr Dăk Lăk neh lơh pràn mblàng yal, hòi jà làng bol lơh jăt ală broă lơh rơcăng, sơndră kòp Kovid-19. Hòi jà mờ bơyai lơh dờp bơnah priă tă rlau 35 tơmàn 300 tơlak đong, ală măy mok phan ngui gah lơh sơnơm mờ phan bơna dong kờl broă lơh rơcwng sơndră kòp Kovid-19 tàm càr.

Mò H’Kim Hoa Byă là Kwang ătbồ Ƀan hòi jà làng bol Tỉnh ủy, Củ tịc Ủy ƀan Mặt trận dà lơgar Việt Nam càr Dăk Lăk dê pà gĭt, mờ ală kal ke tài gơrềng kơn jơ̆ ngan bơh kòp Kovid-19 dê, tơngai tus, Mặt trận ală kâp geh pơn jăt tai hòi jà tă pơgồp ală priă jền nàng dong kờl tơrmù ƀà kal ke ai cau rƀah mờ ală cau ờ pràn in. Tềng đăp măt là lơh ngan sền gròi rơcăng nàng jơh tơl nă làng bol, ngan là cau rƀah geh wă rò sa tềp wil tơl.

 Cau mblàng Lơ Mu K’Yến