VOV4.K’ho- Tơngai tŭ do, càr Dăk Lăk geh cau gơtìp kòp Covid-19, tàm hơ̆ neh geh cau sơm bời kòp. Càr Dăk Lăk geh gal cau lơh broă tàm ƀòn dờng Hồ Chí Minh mờ ală càr Bình Dương, Đồng Nai rê, geh bơta kòp mờ neh gơs F0. Kơnờm mờ broă lơh jăt nền nòn broă tam cah is, wàng se mhar ală tiah geh gŏ gơtìp kòp, den tàng ală tiah tàm càr Dăk Lăk neh lơh ngan kơrian geh cồng nha broă gơtờp bơh kòp tus tàm mpồl bơtiàn.

Mìng is xã Quảng Hiệp, kơnhoàl Cư̆ Mgar neh geh mờr 1 rơbô nă cau bơh ƀòn dờng Hồ Chí Minh mờ càr Bình Dương rê nàng pleh mờ kòp gơtờp. Tàm hơ̆ geh tus 100 nă cau rê mờ rơndeh Honda. Kơnờm mờ broă lơh jăt niam broă yal gah lơh sơnơm, broă tam cah ngài tơrgùm bal, den tàng bŭ lah tàm xã Quảng Hiệp neh geh 6 nă cau geh gŏ mờ virus Sars CoV-2 mơya ờ gơtờp tàm mpồl bơtiàn.

                Ƀòn Khoá, xã Cư̆ Pui, kơnhoàl Krông Bông ngai sơnrờp geh sơbì jơnau sồr wàng se

Ồng Ngô Minh Đức, Chủ tịch UBND xã Quảng Hiệp pà git: Xã geh gal oh kòn làng bol kòn cau lòt lơh broă tàm ală càr hờ đah jum. Ală cau do gơwèt hìu rơƀah den tàng tŭ rê nàng pleh mờ kòp gơtờp ndrờm ờ tơl ală bơta. Gơnoar atbồ, mpồl lơh broă neh lam sồr ală hìu nhă geh tơl ngui tơl sa dong kờl, tam pà bal nàng cau tam cah is geh tơl phan sa, phan ngui mờ ală phan ngui geh kuơ tàm rài kis. Ồng Đức đơs là: Tài kơnờm mờ broă lơh jăt nền nòn broă tam cah is bơh cau do mờ cau ndai, bơh hìu nhă do mờ hìu nhă ndai den tàng kòp neh ờ gơtờp tàm mpồl bơtiàn. “Tàm broă tam cah ngài den xã bơyai lơh crơng gơs tơl ƀòn dùl mpồl nàng sền gròi cau tam cah is tàm hìu. Bơh broă sền gròi, gŏ ală cau gơtìp kal ke den xã neh di tŭ lam sồr ală làng bol, ală cau geh nùs nhơm niam tus bal mờ gơnoar atbồ, dong kờl phe, dong kờl ƀung mi mờ ală phan ngui geh kuơ ndai di pal mờ rài kis pah ngai. Di lah ală cau tŭ do gam gơtìp kòl tàm ală tiah kòp mờ kờñ rê den di gơlan jăt jơnau đơng lam bơh UBND càr neh rò nàng rê, di lah kờñ. Gơwèt mờ xã, tŭ ală làng bol rê, den rơcang rò, dờp mờ geh tiah tam cah is, mờ di tŭ dong kờl nàng làng bol iang nùs tàm tiah tam cah is”.

Bol añ tus ƀòn Khoá, xã Cư̆ Pui, kơnhoàl Krông Bông tàm ngai sơnrờp geh tơn jơh broă kơrian wàng se. Làng bol kòn cau Rơđê kis tàm do neh rê wơl mờ rài kis bè ờs bè lòt lơh broă, lòt ai dà tơmŭt tàm sre kòi, sền gàr, sơnka suơn kơphe, tơwès ñhơ̆t kơnrồ in… Mơya cau lơi kung pal pơn chèo mờ gàr bơta ngài ờ do ờ dă. Làng bol ngòt ngan tàm broă tìp mờ cau krơi, tài pa sơrlèt mờ ală ngai ờ sŭk ngan. Ngai 23 nhai 7, geh 2 nă oh kòn kis tàm ƀòn Khoá rê bơh càr Bình Dương neh gơtìp kòp Covid-19. Bơh 2 nă cau do, 26 nă cau kis tàm ƀòn Khoá neh geh gŏ mờ virus Sars CoV-2. Hơ̆ là ờ hềt kờp tus mờ git nđờ jơ̆t nă cau F1.

Gah lơh sơnơm càr Dăk Lăk ai mẫu kòp bơh làng bol tàm xã Cư̆ Pui, kơnhoàl Krông Bông nàng sền gròi kòp Covid-19 tŭ xã do geh dờp cau gơtìp kòp Covid-19

Jơnau boh bơr mờ bi Y Nghị Mlô, kòn cau Rơđê kis tàm ƀòn Khoá, bi Y Nghị pà git: Do là dơ̆ sơnờp tơnơ̆ mờ 21 ngai tam cah is, bi mŭt tàm ƀlàng ñhơ̆t nàng sền gàr kơnrồ. Pơ-ùr mờ kòn neh geh gŏ mờ Virus Sars CoV-2, neh geh lòt sơm kòp. Y Nghị là cau F1, den tàng 3 poh tơn ơm tam cah is tàm hìu, mờ 8 dơ̆ kuang bàng lơh sơnơm tus ai mẫu xét nghiệm mơya bơtoah ngan ndrờm ờ gŏ mờ kòp. “Tàm broă tam cah is, añ ưn ngài ngan anih lơh broă geh gơnoar neh ai tơl bơta niam, dong kờl añ bè phan ngui, phan sa nàng añ iang nùs tam cah is tàm hìu, ờ lik bơdìh tìp mờ cau, pleh mờ gơtờp kòp. Añ iang nùs ngan”.

Ồng Nguyễn Văn Tâm, Bí thư Đảng ủy xã Cư̆ Pui pà git, tơngai do jơh ală mpồl lơh broă chính trị tàm xã neh lơh jăt broă lơh 4 tàm tiah tơn mờ lơh ngan kơrian, bañ lời tiah gơtìp kòp gơtờp. Mờ tus ngai 17 nhai 8 pa do, jơh ală tiah wàng se kơrian ndrờm neh geh ơm kis mờ lơh broă bè ờs wơl.

Ồng Nguyễn Văn Toàn, Chủ tịch UBMT dà lơgar xã Cư̆ Pui đơs là: bơta lơh geh cồng nha tàm broă tam dră mờ kòp gơtờp tus tàm mpồl bơtiàn là: Lơh jăt nền nòn jơnau bơto sồr 5K. Tàm hơ̆ broă “cau tàm tiah lơi, ơm tơn tàm tiah hơ̆” là broă lơh tờm ngan, pal geh lơh jăt nền nòn ngan. Nàng 178 hìu bơh làng bol kis tàm ƀòn Khoá lơh jăt niam broă wàng se, kơrian, tam cah ngài, gơnoar atbồ xã neh cih rùp gùng lòt tus tơl hìu tàm gùt ƀòn mờ bơta geh cau F0, F1. Xã crơng gơs mpồl tam dră mờ kòp gơtờp mờ mpồl lơh sơnơm, kuang àng, cau sền gàr ƀòn tàm hìu lơh broă xã ơm sùm ngai kung bè mang. Ală cau do git loh rùp hìu tàm ƀòn, git loh rài kis bơh tơl hìu tàm tiah wàng se kơrian nàng bơto sồr, bơsong jơh ală bơta bơh sơnrờp tơn. Kuơ màng, mpồl do neh lam sồr, ai tơl phan sa, phan ngui ală hìu tàm tiah gơtìp wàng se, kơrian in. Ồng Nguyễn Văn Toàn đơs: “Lài jơh là broă sền gròi, đơng lam bơh gơnoar atbồ kung bè cấp uỷ, gơnoar atbồ xã neh lơh mùl màl, di pal, tàm hơ̆ là di pal mờ làng bol. Bol añ geh mpồl lam lài tàm tơngai gơtờp kòp, sùm git ală nùs nhơm, jơnau kơ̆p kờñ, tàm hơ̆ uă ngan là bơto sồr làng bol cau lơi ơm tàm hìu cau hơ̆, bañ lik bơdìh. Ờ tơl phan sa, phan ngui ha là jơh ală bơta lơi den ndrờm geh ală mpồl lơh broă lam lài lơh. Bơh piang sào, dà hùc, rài kis pah ngai den mpồl kuang bàng bơh xã tus hờ ƀòn ndrờm jơh nùs, geh kơnòl”.

Rah rài tàm kơnhoàl Krông Bông gam geh gŏ ală cau F0, mơya do là ală cau tàm tiah tam cah is. Bơh bồ nhai 8 tus tŭ do, kơnhoàl Krông Bông ờ gŏ geh cau gơtờp virus Sars CoV-2 lơi tàm mpồl bơtiàn. Ồng Lê Văn Long, Chủ tịch UBND kơnhoàl Krông Bông đơs: tŭ ală mpồl lơh broă chính trị tus bal nền nòn, pràn mờ ai geh nùs nhơm ring bal, jơnau git wă tàm broă lơh jăt bal nền nòn bơh làng bol dê dê tiah gơtìp uă kòp gơtờp geh kơrian. “Krông Bông là kơnhoàl sơnrờp ngan lam lơh 37 tiah tam cah is tơrgùm bal mờ mờr 1 rơbô nă cau geh tam cah is tơrgùm bal bơh ngai 24 nhai 7 tus tŭ do. Ală cau gơtờp mìng là ală cau geh kòp rê bơh tiah gơtìp kòp mờ gam tam cah ngài tơrgùm bal tàm tiah tam cah is kơnhoàl dê, den di lah gơtìp kòp den kung geh cèng sơm kòp tàm càr. Gam tai den ờ geh gơtìp tàm mpồl bơtiàn. Den tàng kòp ờ gơtìp tàm. Tŭ do, tàm kơnhoàl neh lơh geh ală tiah tơlir niam, ai geh ală bơta ƀuơn nàng làng bol ală jòn cau tàm kơnhoàl in tơrgùm tàm broă tơnguh bơtàu broă lơh sa, pơgồp bal mờ broă rơcang sơndră mờ kòp gơtờp tàm tơngai tus geh niam rơlao”.

Tiah kòp pa geh gŏ là tàm ƀòn Kwang A, xã Cư̆ Bao, thị xã Buôn Hồ, do là mpồl cau kòp gơtờp tàm mpồl bơtàn uă dơ̆ 2 tàm càr Dăk Lăk bơh tŭ gơtìp kòp dơ̆ 4 gơbàn. Tơnơ̆ mờ tŭ geh dờp bè mpồl cau gơtờp 29 nă cau F0 tàm ƀòn Kwang A, bơh 12 jơ mang ngai 19 nhai 8 nam 2021, UBND thị xã Buôn Hồ neh ngui Chỉ thị sồ 16, lơh jăt ală broă lơh mhar tàm broă rơcang sơndră mờ kòp Covid-19 tàm gùt xã Cư̆ Bao. Ồng Phạm Ngọc Tiên, Bí thư Đảng ủy, Chủ tịch UBND xã Cư̆ Bao pà git, Mpồl đơng lam rơcang sơndră mờ kòp Covid-19 xã Cư̆ Bao kung neh ai mpồl sền gàr bơta lơngăp lơngai, drơng rài kis ai ală hìu làng bol tàm tiah gơtìp wàng se, kơrian in. “Tàm broă wàng se den bol añ lam sồr ală cau geh nùs nhơm niam tus bal mờ Mpồl đơng lam bơh xã nàng dong kờl, ai tơl bơta niam dong kờl làng bol tàm tiah wàng se kơrian in geh rài kis tơl niam bañ gơlời hìu lơi jơgloh, hìu lơi ờ tơl sa”.

Jăt bác sĩ Trần Kim Long, dong broă tàm gah rơcang sơndră mờ kòp gơtờp, Anih tờm gròi sền kòp tê jê să càr Dăk Lăk yal, kờp tus lồi poh lài, mpồl lơh sơnơm neh bơyai lơh jòi, ai mẫu xét nghiệm mhar mờr 1 rơbô nă cau gơrềng tus mờ mpồl cau gơtìp kòp do. Mìng is tàm Nông trường Cư̆ Bao, gơwèt Công ty Cổ phần Cao su Dăk Lăk (Dakruko), tŭ dờp geh jơnau yal tàm Nông trường geh ờ uă công nhân geh gŏ mờ virus Sars CoV-2, kuang đơng lam nông trường neh pơgồp bal mờ Anih gròi sền kòp tê jê să càr Dăk Lăk xét nghiệm mhar ai jơh kuang bàng, công nhân, cau lơh broă tàm Nông trường in. Nàng rơcang sơndră mờ kòp Covid-19 geh cồng nha, nông trường neh ngui broă lơh 3 tơn tàm tiah hơ̆, jơh ală công nhân geh lơh broă ndang mờ tam cah is tàm Nông trường ndang.

Bơh bồ nhai 7 tus tŭ do, càr Dăk Lăk neh geh uă mpồl cau gơtòp kòp tàm mpồl bơtiàn, mơya ndrờm geh càr lơh ngan rơcang sơndră mờ kòp gơtờp. Mìng ờ kờp mpồl cau gơtòp sơnrờp ngan gơrềng tus mờ cau lơh broă bơh hìu rơndeh Tiến Oanh dê, ală mpồl cau gơtòp kòp ndrờm geh cồng nha kơrian, wàng se tàm 14 ngai.

Cau cih Lê Xuân Lãm-Nam Trang-Cau mblàng Ndong Brawl