VOV4.K’ho - Bơh nhai 10 tus tŭ do, càr Dăk Lăk geh gŏ cau gơtìp mờ Covid-19 gơguh uă ni sơna mờ gơs dùl tàm ală “tiah geh uă” bè kòp Covid-19 tàm gùt lơgar dê. Tềng đăp mờ bơta kal ke bơh kòp gơtờp, broă rơcang sơndră mờ kòp tàm càr Dăk Lăk neh ai tơngŏ ală bơta ờ pràn, tàm hơ̆ uă ngan là bè cau lơh broă, bơta pràn xét nghiệm mờ bơta pràn sơnơm vaccine. Càr gam lơh ngan tơmù ală bơta kal ke mờ tơmù khà cau gơtờp.

Càr Dăk Lăk tàm dơ̆ 4 bơh kòp Covid-19 neh gŏ khà cau gơtờp gơguh uă ngan mờ mờr 5 rơbô nă cau gơtìp kòp Covid-19 ală ngai do. Tàm hơ̆, ƀòn dờng Buôn Ma Thuột neh rơlao 1 rơbô nă. Tàm khà rơlao 600 nă cau pa gơtìp bơh 2 poh do, geh tus 90% khà cau geh gŏ tàm mpồl bơtiàn, tơnguh khà gơtìp kòp tàm ƀòn dờng tus cấp 4.

                  Mpồl lơh sơnơm gam xét nghiệm mhar làng bol kis tàm ƀòn dờng Buôn Ma Thuột in

Ồng Vũ Văn Hưng, Chủ tịch UBND ƀòn dờng Buôn Ma Thuột pà git, kòp Covid-19 tàm ƀòn dờng tŭ do kal ke ngan kờñ jòi cau neh gơtìp geh cồng nha. “Tŭ do, cau gơtìp kòp tàm mpồl bơtiàn ờ loh tiah gơtờp mờ tàm hơ̆ uă ngan là bơta tờm bơh cau rê bơh tiah gơtìp kòp ờ yal mờ ờ lơh jăt broă tam cah is tàm hìu. Tŭ do, lơh jăt broă jòi cau F1 den kal ke ngan tài khà cau gal ngan. Mơya ƀòn dờng kung crơng gơs 21 sơnah ƀòn, xã, crơng gơs mpồl jòi cau gơtìp kòp sơl, hơ̆ sồng geh mpồl jòi cau gơtìp kòp ƀòn dờng tai. Hơ̆ sồng Viện Vệ sinh dịch tễ Tây Nguyên kung dong kờl dùl mpồl nàng jòi, bơyai lơh xét nghiệm jơh tàm ƀòn dờng”.

Khà cau gơtìp kòp gơguh tàm tŭ khà gơ glòm sơnơm vaccine tàm gùt càr Dăk Lăk tŭ do gam tàm khà ờ uă ngan tàm gùt lơgar. Kờp tus bồ nhai 11 do, khà cau geh cit sơnơm vaccine ding sơnrờp geh 58,6% mờ cit ding dơ̆ 2 là 9,11%. Khà gơ glòm sơnơm vaccine ờ uă neh lơh gơguh bơta gơtờp kòp tàm mpồl bơtiàn kung bè lơh gơguh kal ke tus mờ broă sơm kòp cau kòp in.

Gờñ gơ glờm sơnơm vaccine ai gùt làng bol in là broă lơh geh cồng nha ngan tàm broă rơcang sơndră mờ kòp Covid-19

Ồng Trịnh Quang Trí, Kuang atbồ Anih tờm gròi sền kòp tê jê să càr Dăk Lăk pà git: Tus ngai 30 nhai 10, càr Dăk Lăk neh dờp di pơgăp 1 tơlăk ding sơnơm vaccine rơcang sơndră mờ kòp Covid-19 bơh Dà lơgar. Di lah cit jơh khà sơnơm vaccine do den geh tơl gơ glòm geh 72% khà cau geh cit ding sơnrờp mờ khà cit kung mìng rơ̆p geh càr chồl mhar. “Ală hìu sơnơm xã, sơnah ƀòn tŭ do den cih geh di pơgăp bơh 200 tus 300 ding ai 1 mpồl tàm xã 1 ngai in. Den tàng, gùt càr khà mhar tàm 1 ngai geh di pơgăp 40 rơbô nă. Kờp jơh khà sơnơm vaccine cih jơh lài mờ ngai 5 nhai 11. Bal mờ hơ̆, kờp dŭ tàm nhai 11 nam 2021 do geh dờp tai ală dơ̆ cih sơnơm vaccine ndai. Mìng is ƀòn dờng Buôn Ma Thuột, hơ geh 100% khà làng bol bơh 18 sơnam rơlao hờ đang geh cit 1 ding sơnơm vaccine sơndră mờ kòp Covid-19 lài mờ ngai 15 nhai 11 nam 2021”.

     Khà cau gơtìp kòp gơguh mhar tàm càr Dăk Lăk pal tơnguh tai ală tiah sơm kòp cau kòp Covid-19 in

Càr Dăk Lăk neh gŏ mờr 5 rơbô nă cau kòp Covid-19, tàm hơ̆ geh 50% khà cau gam sơm kòp. Pal kah ngan, 10 ngai pa do, khà cau gơtìp kòp tàm ngai tàm càr Dăk lăk sùm tàm khà 3 sồ, khà cau gơtìp kòp tàm mpồl bơtiàn uă mờ uă tiah gơtìp kal ke. Jăt ồng Nay Phi La, Kuang atbồ Sở Y tế càr Dăk Lăk yal, di lah kòp gam ờ gơmù tàm ală ngai tus, den ƀòn dờng pal ai jơh bơta pràn nàng sơm kòp cau F0, mờ di gơlan geh kờñ tus mờ broă dong kờl. “Pal kơrian mơ bơh cờn dơ̆ 1 mờ cờn dơ̆ 2 den tàm do gơtìp kal ke bè cau bác sĩ tus bal sơm kòp hồi sức tích cực den gơwèt mờ gah lơh sơnơm càr Dăk Lăk geh di pơgăp 30 nă bác sĩ, là ờ gơtùi di pal mờ broă sơm kòp do, den tàm tơngu me hơ̆ pal hòi tai broă dong kờl bơh Dà lơgar kung bè hìu sơnơm Chợ Rẫy mờ tŭ cau kòp uă rơlao den gah lơh sơnơm lơh rơndăp broă dan wơl phan bơna Hìu sơnơm ing bơh hìu sơnơm ƀòn dờng Hồ Chí Minh, Hìu sơnơm càr Bình Dương tơnơ̆ mờ tŭ neh lơh gơs kơnòl nàng rơcang sơndră mờ bơta ờ niam ngan càr dê”.

Tàm dơ̆ tus sền, dong kờl càr Dăk Lăk tam dră mờ kòp gơtờp tàm ngai 27 nhai 10 lài do. Mpồl kuang bàng lơh broă bơh Hìu sơnơm Chợ Rẫy kung neh tam pà bal bè broă lơh, broă mờng chài sơm kòp gơwèt mờ cau kòp Covid-19 in. Jăt Tiến sĩ, bác sĩ Nguyễn Tri Thức, Kuang atbồ Hìu sơnơm Chợ Rẫy đơs, càr Dăk Lăk pal tơmù ờ uă ngan broă di gơlan gơtờp tàm bơrlŭ bal tàm tiah sơm kòp, tàm tiah tam cah is tơrgùm bal; tơmù ờ uă ngan cau kòp gơtìp jroă; gàr niam bơta pràn kơl dang să jan, cau lơh broă bơh gah lơh sơnơm dê mờ broă hòi jà broă tus bal bơh mpồl bơtiàn nàng drơng mờ dơ̆ tam dră jŏ jòng mờ kòp Covid-19: “Bol añ dan tơnguh bơta pràn xét nghiệm. Dơ̆ bàr tai là mờ bơta pràn gơguh pal kơlôi tus mờ hìu sơm kòp Hìu sơnơm ing tơnguh di pơgăp bơh 4 tus 5 rơbô nơm jơnờng, hơ̆ sồng bol añ pơgồp bal jơnau đơs bè Hìu sơnơm ntrờn bè lơi hơ̆ sồng ală broă lơh tam cah is cau F1 bè lơi nàng pleh mờ gơtờp bơrlŭ bal mờ geh ală jơnau dan nàng Bộ Y tế bal mờ Chính phủ tơnguh khà sơnơm vaccine nàng cih rơcang sơndră mờ kòp gơtờp ai làng bol càr Dăk Lăk in”.

Càr Dăk Lăk gam mhar lơh jăt ală broă lơh nàng rơhời kơrian kòp Covid-19 gơtờp tàm mpồl bơtiàn. Bơdìh mờ gơnoar bơh gơnoar atbồ, ală cấp, gah lơh broă gơrềng bal, tơl nă làng bol pal lơh jăt nền nòn ală broă rơcang sơndră mờ kòp di mờ jơnau bơto sồr “tơl nă làng bol là dùl nă cau ling” tàm “tiah tam dră” mờ kòp, nàng gờñ gròi sền kòp gơtờp mờ rê mờ rài kis “bè ờs pa”.

Cau cih Nam Trang-Cau mblàng Ndong Brawl