VOV4.K’ho- Bal mờ uă tiah tàm gùt lơgar dê, kòp Covid-19 gam lơh gơrềng ờ niam ngan tus ală broă lơh lơh sa, mpồl bơtiàn tàm càr Dăk Lăk dê. Nàng gơdờp mờ kòp dờng, tơnguh uă cồng nha lơh sa, kă bro kung bè ală broă lơh drơng broă dà lơgar dê, jơh bal làng bol mờ mpồl lơh sa kă bro bal mờ gơnoar ătbồ càr Dăk Lăk gam lơh pràn ngui măy mok yal tơngĭt jơnau, wèt tus tam gơl sồ. Broă tam gơl bơh sơnrờp gam cèng wơl ală cồng nha niam ngan jăt di jơnau sồr lơh jăt jơnau kờñ dơ̆ lĕ bal, tam dră mờ kòp mơkung bơtàu tơnguh lơh sa- mpồl bơtiàn.

Công ty Trách nhiệm hữu hạn Pơndiang phan ô tô An Phước là dùl tàm ală mpồl lơh sa kă bro pơndiang phan dờng tàm ƀòn dờng Buôn Ma Thuột, càr Dăk Lăk dê bal mờ pơgăp 80 nơm rơndeh pơndiang phan, pơndiang jun phan lơh geh bơh sươn sre lòt tus ală càr, ƀòn dờng mờ tăc mờ lơgar ndai. Ồng Phạm Đông Thanh- Kuang ătbồ Công ty pà gĭt, kòp Covid-19 gam gơbàn bơh bồ nam 2020 tus tŭ do neh lơh gơrềng uă ngan tus broă lơh broă bơh công ty dê. Ală nam lài mờ tŭ gơbàn kòp, kờp bal pah nam công ty pơndiang pơgăp 300 rbô tấn phan lơh geh bơh sươn sre, mơya tŭ bơnah phan bơna kă bro neh gơmù pơgăp 20%, priă cồng kung gơmù ndrờm bè hơ̆ sơl. Nàng kờñ gơdờp mờ kòp bơtờp, Công ty neh rơcăng lài lơh pràn ngui măy mok yal tơngĭt jơnau nàng jòi cau lơh broă bal, kă bro mờ kĭ sră hơ pơrgon mơkung sồr lơh đơng lam geh cồng nha rlau. Ồng Phạm Đông Thanh, đơs: Tam gơl sồ là broă lơh kuơmàng ngan nàng tơnguh uă cồng nha lơh sa, kă bro bơh công ty dê, kuơmàng là tàm tơngai gơbàn kòp bè tŭ do. Gơwèt mờ công ty, jơh ală sră hơ pơrgon halà ală broă lơh kă bro mờ cau năc blơi phan den tam gơl lơh bơh tàm email, geh tŭ là ală sră blơi phan, sră cơng tàng kă bro ndrờm geh lơh bơh email lơm. Priă den pơyua bơh tàm internet banking. Geh bal broă đơng lam den kung ngui ală bơta neh geh lài tàm internet lơm, pơnyơu bè ală internet mpồl bơtiàn halà phần mềm cih is ai mpồl lơh sa kă bro in. Bơh ală phan neh geh lài tàm internet hơ̆ nàng tơrmù ƀà broă ơm rềp tìp mat bal.

Dăk Lăk lơh pràn tam gơl sồ nàng gơdờp mờ kòp dờng

Ồng Lương Văn Minh- Phó Kuang ătbồ Mpồl ală mpồl lơh sa kă bro càr Dăk Lăk dê pà gĭt, jơh gùt càr geh mờr 18 rbô mpồl lơh sa kă bro. Kòp dờng Covid-19 neh lơh gơrềng uă ngan tus broă lơh broă bơh ală mpồl lơh sa kă bro dê mờ broă ngui măy mok yal tơngĭt jơnau, tam gơl sồ geh sền là gùng lòt sồr pal lơh nàng ală mpồl lơh sa kă bro gơtùi kis gơs, bơtàu tơnguh tàm tơngai tŭ do. Uă mpồl lơh sa kă bro tàm càr kung neh rơcăng lài tam gơl pa mờ bơh sơnrờp lơh geh cồng nha. Bè đah Mpồl ală mpồl lơh sa kă bro càr Dăk Lăk dê den kung gam jơh nùs ngan crơng gơs Anih tờm tàm tơrbŏ sồ mpồl lơh sa kă bro nàng dong kờl ală cau tàm mpồl. Ồng Lương Văn Minh, đơs: Mpồl ală mpồl lơh sa kă bro càr dê kung gam hòi jà crơng gơs Anih tờm tàm tơrbŏ tam gơl sồ mpồl lơh sa kă bro. Gùng lòt mờr tus den pal lơh jăt tàm tơrbŏ mờ tam gơl sồ ai mpồl lơh sa kă bro in. Bơh hơ̆, ală mpồl lơh sa kă bro tăc phan bơna bơh internet online, hơ̆ sồng tus tàm drà kă bro bơh măy mok tàm tơngai kòp bơtờp bè do.       

Lòt bal mờ làng bol, mpồl lơh sa kă bro tàm tơngai gơbàn kòp kal ke, ală kấp, ală gah tàm càr Dăk Lăk kung gam lơh pràn lơh jăt ală gùng dà broă lơh ngui măy mok yal tơngĭt jơnau, tam gơl sồ. Ồng Ngô Việt Hồng- Phó Kuang ătbồ Cục Dia càr Dăk Lăk dê pà gĭt: ală cồng nha bơh sơnrờp lơh geh niam ngan. Tŭ do, jơh ală mpồl lơh sa kă bro tàm càr neh lam lơh lơh sră cih măt cih yal mờ tơm dia điện tử. Càr kung gam lơh pràn lam lơh lùp dồs dia, lùp dồs priă pal tă tàm broă lơh kă bro ù tiah, rơndeh mô tô, rơndeh ô tô bơh điện tử. Ồng Ngô Việt Hồng, đơs: Bơh broă lơh jăt dùl ròt ală broă lơh kă bro điện tử, yal loh làng song dơ pă tàm ală anih yal tơngĭt jơnau mpồl bơtiàn, den rơcăng sơndră geh cồng nha mơkung tơrmù rềs àr gơ aniai ai cau tơm dồs priă dia mờ kuang bàng lùp dồs priă dia in sơl. Dơ̆ bàr tai là bè jŏ jòng, broă yal loh làng song dơ pă ờ ndơ̆p mpồn jơh ală priă dia tơm, priă dia dồs, dùl mpồl bơtiàn điện tử bè hơ̆ den ngan ngồn là gơ niam rlau.         

 Ồng Nguyễn Tuấn Hà- Phó Chủ tịch Ủy ban Nhân dân càr Dăk Lăk pà gĭt, tàm tơngai kòp bơtờp kal ke, broă tam gơl sồ gơwèt mờ càr pal kờñ ngan mờ geh kuơ ngan. Nhai 3 nam 2021 pa do, Tỉnh ủy Dăk Lăk neh ring bal Kơrnoat bè Tam gơl sồ càr Dăk Lăk tơngai bơh nam 2021- 2025, pơlam gùng dà tus 2030. Tàm hơ̆, tềng đăp măt, càr geh lời pơgăp 300 tơmàn đong bơcri ai gah broă lơh tam gơl sồ in, jơh nùs lơh ngan lơh gơlik bơta tam gơl pràn kơldang tàm bơtàu tơnguh lơh sa- mpồl bơtiàn càr dê. Ồng Nguyễn Tuấn Hà, đơs: Gĭt nền tam gơl sồ lơh gơnoar broă kuơmàng tàm dơ̆ tam gơl bơh bơta yau gơ gơs bơta pa lơh sa mờ măy mok dơ̆ 4, là tŭ tơngai niam nàng Dăk Lăk in jăt thàn, lòt bal mờ gơtùi sơrlèt guh bè ngui jak chài măy mok tàm jơh ală broă tàm rài kis mpồl bơtiàn dê. Kuang đơng lam bồ Tỉnh ủy, Ủy ban Nhân dân càr jơh nùs lơh ngan rwah tam gơl sồ nàng tam dùl bă jơh ală bơta, tơl làm ală gùng dà broă lơh ătbồ jơh ală bơta ală broă lơh lơh sa- mpồl bơtiàn bơh càr dê.

 Kòp Covid-19 gam lơh gơrềng ờ niam ngan tus jơh ală bơta bơh rài kis dê. Broă ngui măy mok yal tơngĭt jơnau, wèt tus tam gơl sồ là broă lơh ờ gơtùi pleh klàs mờ càr Dăk Lăk gam pà gŏ bơta rơcăng lài, jơh nùs bơh he dê nàng kờñ lơh jăt niam jơnau kờñ dơ̆ lĕ bal, tam dră mờ kòp geh cồng nha mơkung bơtàu tơnguh lơh sa- mpồl bơtiàn sơl.

            Cau cih Công Bắc- Cau mblàng Lơ Mu K’Yến