VOV4.K’ho- Càr Dak Lak gam lam lơh broă lơh “dong kờl kàl pơrlòng” tàm 32 anih pơrlòng jơh bơsram kấp pe nam 2021, mờ mờr 1 rơbô nă ơruh pơnu dong kờl is tus bal. Jat Tỉnh Đoàn Dak Lak yal, broă lơh dong kờl kàl pơrlòng nam do geh lam lơh tàm tơngai càr geh cau bơtờp mờ virus Sars CoV-2. Den tàng bè hơ̆, ală cau dong kờl is geh tơrgùm dong kờl pơs wàs, ƀồm sơnơm lơh kloh khuẩn ală tiah pơrlòng, mblàng yal kơrnoat pơrlòng, jơnau sồr bè rcang sơndră kòp Covid-19 mờ ală bơta mờ cau tus bal pơrlòng in kờñ pal kah.

Dak Lak geh mờr 1 rơbô nă ơruh pơnu dong kờl is tus bal dong kờl tơngai pơrlòng nam 2021    

Bơdìh hơ̆, ndrờm bè tơl nam sơl, ală cau dong kờl is pơn jat tai sền gĭt mat cau pơrlòng geh rài kis kal ke nàng hòi jà tă pơgồp bal dong kờl. Ngan ngồn, pang yal tơngĭt dong kờl kàl pơrlòng Dak Lak tàm màng xã hội Facebook ngan ngồn tơlik mat mờ yal sùm ală jơnau yal bè broă lơh dơ̆ pơrlòng nàng dong mè bèp mờ kơnòm bơsram in gĭt loh jơnau yal dùl bă mhar ngan mờ di pal ngan.

Cau mblàng K’Hạnh