VOV4.K’ho- Mờ bơta sơm bat tê bal bơh uă mpồl, mpồl cau mờ ală cau dùl nă să is, tàm ală ngai pa do, Ủy ban Mặt trận dà lơgar Việt Nam càr Dak Lak neh hòi jà geh mờr 200 tấn biăp, bùm, plai đo ală bơta, dong kờl ai ƀòn dờng Hồ Chí Minh in nàng dong kờl làng bol tàm tiah tờm kòp.

          Ală rơndap pơndiang phan bơh ală kơnhoàl jun phan bơna tơrgùm tàm Tỉnh đoàn

            Biăp, bùm plai đo geh tam cah is, lơh sàng goh lài mờ tŭ ơn tàm kơldung nàng pơndiang  

Mờ broă tàm tơrbŏ bal bơh ală pang tàm màng xã hội Facebook, ờ mìng làng bol Dak Lak lơm mờ ală cau lơh tam biăp tàm càr Lâm Đồng kung dong kờl bal sơl, pơyoa phan bơna tus nàng dong kờl làng bol tiah gơtìp wàng se kơryan kòp Covid-19 in. Mò H’ Kim Hoa Byă, Kuang atbồ Mpồl hòi jà làng bol Tỉnh ủy, Chủ tịch Ủy ban Mặt trận dà lơgar Việt Nam càr Dak Lak pà gĭt, 1 poh do, Mặt trận ală kấp tàm càr neh hòi jà tă pơgồp bal geh mờr 200 tấn biăp, bùm, plai đo. Ală phan bơna do geh tơrgùm rê tàm 1 anih nàng tàm cah is, sơr bì ală biăp, bùm, plai đo ồm, lề lài mờ tŭ ơn tàm kơldung jun pơndiang tus tàm ƀòn dờng Hồ Chí Minh.

Ală rơndeh pơn diang bềng biăp, bùm, plai đo mờ phan ngui sa cèng bal nùs nhơm, broă lơh niam bơnĕ bal mờ jơnau pơndờm pơnđiang bơh làng bol Dak Lak dê sơm bat tê bal mờ gùt lơgar kơryan kòp.

Cau mblàng K’Hạnh