VOV4.K’ho- Chính phủ neh ai ngui Nghị quyết sồ 63 bè ală kơnòl broă, gùng dà broă lơh tờm nàng sơlơ dong gơguh lơh sa, ai càn priă bơcri priă dà lơgar mờ tăc phan mờ lơgar ndai kơ̆ kơljap ală nhai lồi nam 2021 mờ bồ nam 2022. Mang ngai 12/7, jơnau yal bơh Hịêp hội Ngân hàng Việt Nam (VNBA) pà gĭt, geh 16 ngân hàng kă bro neh ring bal tơrmù priă cồng ai càn priă dong kờl mpồl lơh sa kă bro in sơr lèt gan kòp Covid-19. Ală mpồl lơh sa kă bro tàm ù tiah càr Dak Lak sền gròi ngan tus broă do, tài bơh do là tŭ tơngai niam nàng mpồl lơh sa kă bro in sơr lèt gan kal ke, lơh wơl broă lơh sa, kă bro.

Jat khà kờp bơh Ngân hàng Dà lơgar càr Dak Lak dê: kờp tus ngai 31/5/2021, ală mpồl ai càn priă tàm ù tiah càr dê geh kờp jơh priă dồs gơtìp gơrềng tài bơh kòp Covid-19 là 15 rơbô 436 tơmàn đong.

Năc tàm Dak Lak gam kơ̆p kơnờm mờ gơn kơnờm ngan ală mpồl ai càn priă tơrmù priă cồng jat jơnau sồr bơh Chính phủ dê kung bè Ngân hàng dà lơgar Việt Nam nàng sơr lèt gan tơngai kòp bè tŭ do

Tàm tơngai do, ală mpồl ai càn priă neh tơrmù priă cồng càn priă ai 7 rơbô 892 nă năc in mờ priă dồs là 6 rơbô 401 tơmàn đong, khà priă cồng geh tơrmù là 8 tơmàn 814 tơlak đong. Broă ală ngân hàng tơrmù priă cồng gơwèt mờ ală mpồl lơh sa kă bro, dong mpồl lơh sa kă bro in bơnah lơi tơrmù ƀà bơta kal ke. Mơya do là khà dùl ết ngan, mờ rah rài ngan. Kuang atbồ dùl công ty lơh sa, kă bro kơphê tàm kơnhoàl Krông Pách, càr Dak Lak pà gĭt, tŭ do công ty gam dồs ngân hàng mờr 50 tơmàn đong. Nam 2020 công ty kung geh ngân hàng tơrmù priă cồng. Mơya nam 2021 do, priă cồng kung gam bè ờs sơl.

Ồng Nguyễn Hữu Hoàng Dương, Kuang atbồ Công ty tăc mờ blơi phan bơh lơgar ndai Hoàng Dương Ban Mê pà gĭt: tŭ do công ty gam dồs ngân hàng 8 tơmàm 700 tơlak đong, mờ priă cồng là 9,9% dùl nam. Bàr nam do broă lơh sa kă bro bơh công ty dê gơtìp kal ke tài bơh kòp Covid-19. Phan bơna gơ kòl ờ gơtùi tăc, tàm tŭ giá blơi phan lơh gơlik phan bơnabơh den gơguh wơl, priă cồng ngân hàng ờ gŏ gơmù. Ồng Nguyễn Hữu Hoàng Dương đơs:"Tŭ do den mpồl lơh sa kă bro ờ hềt gŏ bơnah lơi bơh ngân hàng dong kờl ai mpồl lơh sa kă bro in. Tàm tơngai kòp bè do den 2 nam do mpồl lơh sa kă bro kal ke ngan. Phan bơna ờ gơtùi tăc bơdìh càr den là kal ke uă ngan. Kơ̆p kờñ ngan ngân hàng dong kờl ai mpồl lơh sa kă bro in nàng mpồl lơh sa kă bro in jai lơh broă tàm tơngai kòp. Kơ̆p kờñ ngân hàng tơrmù priă cồng ai công ty in, nàng công ty in tơm dồs rơ hời mờ tơm priă cồng gơmù lơyah den hơ̆ sồng geh bơta pràn nàng lơh broă tai".

Agribank tiah đah tô Dak Lak là mpồl ai càn priă gam lơh ngan lam lơh broă lơh tơrmù priă cồng mờ ai càn ală bơnah priă càn ai mpồl lơh sa kă bro tàm Dak Lak gơtìp gơrềng tài bơh kòp Covid-19

Ồng Nguyễn Văn Sanh, Kuang atbồ Hợp tác xã drơng broă lơh sa suơn sre Thanh Bình, xã Dur Kmăl, kơnhoàl Krông Ana pà gĭt: kàl mrềt pang pa do, Hợp tác xã lơh sa suơn sre Thanh Bình neh pơgồp bal mờ Viện kơlôi sơnơng mờ bơtàu tơnguh phan tam Việt Nam pơlam tàp broă lơh chài lơh gơlik phe kă bro sơntìl kòi Đài thơm 8  jat tơl khà VietGAP ai làng bol tàm hợp tác xã in. Broă lơh do neh pờ geh gùng dà lơh sa, lơh gơlik phe is mờ niam bơkah. Mìng is să tờm ồng Sanh neh ai sră ngui ù bơh hìu bơnhă dê nàng càn 3 tơmàn 400 tơlak đong bơcri tàm broă lơh sa, kă bro. Tus tŭ do, ồng Sanh kung bè ală cau tàm hợp tác xã ờ hềt geh ngân hàng tơrmù priă cồng. Ồng Nguyễn Văn Sanh đơs:

Tŭ do, kal ke ngan bè khà priă bơcri, ngan là khà priă kơryan dà ngơr, trồ prang soat dà, lơh niam wơl den kờñ ngan geh priă jền. Bè lơh broă bal den geh bàr pe nă cau, bal mờ Kuang atbồ neh pal ai phan bơna bơh hìu bơnhă he dê càn priă tàm pơgơl phan bơh ngân hàng dê nàng tă tơm priă đèng mờ priă lơh niam wơl, den hơ̆ sồng priă cau lơh broă- priă nhai ai oh mi in tai. Tus tŭ do, den ờ hềt geh ngân hàng lơi dong kờl bè priă cồng. Kơ̆p kờñ là, tài bơh kòp do den ngân hàng tơrmù ƀà dùl bơnah lơi priă cồng.

Jơnau yal bè broă 16 ngân hàng kă bro, Hiệp hội Ngân hàng Việt Nam (VNBA) ring bal tơrmù priă cồng ai càn dong kờl mpồl lơh sa kă bro in sơr lèt gan kòp Covid-19. Do là bơta mờ mpồl lơh sa kă bro, kơ̆p kơnờm ngan, mờ gơn kơnờm ngan!

Cau cih Lê Xuân Lãm- Cau mblàng K’Hạnh