VOV4.K’ho- Lơh jat jơnau hòi jà bơh ală kấp bộ Đoàn tàm càr, uă đoàn viên ơruh pơnu tàm Dak Lak neh cih sră tus bal dong kờl is tàm ală mpồl lơh broă dong kờl tiah lam lài rcang sơndră kòp Covid-19. Ờ ngòt bơta bòl glar, kal ke, ală cau tus bal is gam tă pơgồp bơta pràn tàm ală broă lơh tàm ală tiah ai ơm yah ngài tơrgùm bal, dong kờl tơn ală y, bác sỹ mờ ală mpồl lơh broă ndai nàng sơm bat tê bal kơryan kòp.    

Mờr 2 poh tus bal lơh broă tus bal dong kờl is tàm tiah ai ơm yah ngài tơrgùm bal tàm Hìu sơnơm kơnhoàl Krông Pách, bi Phan Ngọc Bảo Nhi, ơm tàm xã Hòa An, kơnhoàl Krông Pách, càr Dăk Lăk neh kuèng ngan mờ broă lơh tàm bơta soh phan sền gàr glòm jơh să jan bulah trồ tơngai duh halà trồ mìu. Là bác sĩ pa jơh bơsram lik klờng den bi geh tam pà broă lơh dong kờl kham mờ ai mẫu xét nghiệm ai ală cau pa rê bơh ală càr geh kòp in.

Bơh tàm điện thoại, bi Phan Ngọc Bảo Nhi đơs, sền gŏ bơta kòp tàm Dăk Lăk gơlik geh kal ke, khà cau kòp gơguh, bi neh rcang lài cih sră mờ pơyoa jơnau cih tàm điện thoại tơn mờ Kuang atbồ Sở Y tế càr Dăk Lăk nàng dan cih mat tus bal mờ tiah lam lài sơndră kòp. Tơnơ̆ hơ̆, Kuang atbồ Sở neh geh jơnau hơ wơl mờ jun sră dan bơh bi dê rê tàm Mpồl đơng lam sơndră kòp kấp kơnhoàl nàng dờp mờ rơndap broă lơh. Bi Phan Ngọc Bảo Nhi đơs:

 Oh sền gŏ kòp tàm Dăk Lăk sơnđờm bơtờp uă, khà cau bơtờp kòp gơguh pah ngai den oh kờñ tus bal sơndră kòp nàng dong ai tơl nă cau in tài bơh tàm Dăk Lăk kung ờ tơl mpồl cau lơh broă sơl. Đơs bal là broă lơh uă ngan, bòl glar dùl ết, mờ kung bòl ngan sơl. Mơya tàm tŭ lơh broă bal mờ jơh tơl nă cau nàng tus bal sơndră kòp den oh pơñ iờ să ngan mờ chờ hờp ngan.

Jơnau cih bi Phan Ngọc Bảo Nhi dê pơyoa tus mờ Kuang đơng lam bồ Sở Y tế Dăk Lăk

Kung là cau tus bal is tus bal dong kờl tàm tiah ai ơm yah ngài tơrgùm bal tàm hìu sơnơm kơnhoàl Krông Pách, broă lơh pah ngai bơh bi Nguyễn Tấn Huy, ơm tàm thôn 2, xã Tân Tiến, kơnhoàl Krông Pách dê là dong kờl pơndiang phan ngui tàm ală cơldŭ mờ pơs wàs tàm tiah ai ơm yah ngài. Bi Nguyễn Tấn Huy yal, bi gam là cau bơsram dờng nam dơ̆ 2 Hìu bơsram Đại học Khoa học Tự nhiên ƀòn dờng Hồ Chí Minh. Tài bơh kòp den bơh nhai 5 bi pal ơm rlô ing broă bơsram rê tàm ƀòn pleh kòp. Tŭ Huyện đoàn Krông Pách yal sac rơwah cau tus bal is, geh bơta ring bal bơh hìu bơnhă dê, bi neh dan cih mat mờ geh dờp mut lơh broă dong kờl tàm tiah ai ơm yah ngài rlau 1 poh do. Bi Nguyễn Tấn Huy đơs:

Hìu nhă neh rcang nùs nhơm lài jơh bloh den tŭ geh dơ̆ dan cih mat den hìu bơnhă kung ai lòt bè ờs sơl, tài bơh kờñ dong kờl ai mpồl bơtiàn in. Tàm do den broă lơh kung bè ờs sơl mơya tài bơh tàm ù tiah kòp uă den ờ geh cau tàm ala lơh broă halà bè lơi sơl. Ală gơ̆p bơyô dilah lòt den cèng bal tơl phan ngui is, pràn kơl dang să jan là di, mut tàm do den rài kis ờ di bè ơm tàm hìu ờ, sa sào tơrgùm bal den geh uă bơta krơi is sơl.

Bi Nguyễn Tấn Huy geh hìu bơnhă lam lòt tus tàm tiah ai ơm yah ngài tơrgùm bal nàng tus bal dong kờl rcang sơndră kòp

Bi Nguyễn Văn Hà, Bí thư Huyện đoàn Krông Pách pà gĭt, tŭ tàm kơnhoàl geh cau kòp mờ crơng gơs tiah ai ơm yah ngài tơrgùm bal nàng dờp làng bol rê bơh ală càr geh kòp, Huyện đoàn neh nhap nhar ngan tam gơl ală broă rơndap lơh broă lơh, lơh lài ai broă lơh rcang sơndră kòp Covid-19 mờ gàr tơl niam rài kis mpồl bơtiàn tàm ù tiah kơnhoàl dê. Ring bal mờ hơ̆ den dong kờl cau kal ke, mpồl Kuang bàng đoàn dê neh hòi jà mpồl cau tus bal is lơh broă dong kờl tiah lam lài rcang sơndră kòp. Dơ̆ sơnrờp geh 15 nă ơruh pơnu tus bal is geh dờp sră dan mờ rơndap ai lơh broă dong kờl tàm tiah ai ơm yah ngài tơrgùm bal bơh kơnhoàl Krông Pách dê. Bi Nguyễn Văn Hà đơs:

Bơh tŭ lam lơh den khà đoàn viên ơruh pơnu cih sră dan tus bal lơh geh jơnau kờñ bơh Ban thường vụ Huyện đoàn dê. Bol añ kung lơh jat loh jơnau sồr, bơh cih sră dan mut tus bơta ring bal bơh tàm hìu bơnhă, bơh ală tiah, mpồl lơh broă dê yal tơngĭt. Tìp mat tơn tơl nă cau tus bal is, iăt kơno jơnau kơ̆p kờñ, bơta kơ̆p kơnờm mờ lam lơh bơt bơtàu ală mpồl lơh broă ngan ngồn mờ tàm jàu ai ală tiah in nàng rơndap tap sèng, tam pà broă lơh, bơto pơlam ală ơruh pơnu in tus bal dùl bă geh cồng nha ngan rlau jơh gơwèt mờ ală broă lơh tus bal is.

Broă lơh dong kờl bơh bác sĩ Bảo Nhi dê tàm tiah ai ơm yah ngài

Tàm kơnhoàl Cư Mgar, bơh lồi nhai 7 pa do, mìng tơnơ̆ bàr pe ngai lĭp sră yal jơnau sac rơwah cau tus bal dong kờl is, Ban Thường vụ Huyện đoàn Cư Mgar neh dờp uă ngan sră dan tus bal is tàm mpồl lơh broă “rcang sơndră kòp tiah lam lài ào tơlir”. Jat bi Y Wal Mlô, Bí thư Huyện đoàn Cư Mgar đơs, gùt kơnhoàl neh sơnđờm mut lơh tai 18 mpồl rcang sơndră kòp tiah lam lài ào tơlir 2 kấp kơnhoàl mờ xã bal mờ 280 nă cau tus bal is nàng dong kờl lơh broă rcang sơndră kòp, rcang lài phan bơna ai ală tiah ai ơm yah ngài tơrgùm bal in. Mìng is mpồl kấp kơnhoàl neh dờp sră dan tus bal is bơh rlau 50 nă cau cau tus bal is dê. Huyện đoàn neh cih mat, bơyai lơh pơlam tàp ală jơnau sồr mờ rcang lài bơta chài ờdo ờdă ai cau tus bal is in. Mơkung yal mờ Mpồl đơng lam rcang sơndră kòp kấp kơnhoàl nàng rcang kơnòl broă di pal ai ală mpồl lơh broă do in. Bi Y Wal Mlô đơs: 

Uă gơ̆p bơyô đoàn viên ơruh pơnu sơnam gam kơnòm ngan, geh cau mìng jơh bơsram kấp pe dan tus bal is tàm ală tiah lam lài tàm broă rcang sơndră kòp tàm ù tiah kơnhoàl dê. Gơtùi sền gŏ nùs nhơm lam lài, tus bal is rcang lài lòt lài dờp ală broă kal ke, broă lơh pa bơh ală gơ̆p bơyô đoàn viên ơruh pơnu dê đơs bal mờ bơh rơnàng kơnòm să tàm ù tiah kơnhoàl Cư Mgar dê đơs is den sùm geh lơh jat niam. Bơta hơ̆ sền gŏ gơnoar, kơnòl bơh ơruh pơnu dê tàm broă sơm bat tê bal mờ kấp ủy, gơnoar atbồ ală tiah dê tàm broă rcang sơndră kòp.

Ơruh pơnu tus bal dong kờl is tus bal ntrờñ phan ngui dong làng bol tàm tiah ai ơm yah ngài in

Mờ bơta kơlôi “ờ tus bal dong kờl is tŭ do den gam geh tŭ lơi tai nàng dong kờl”, uă đoàn viên ơruh pơnu neh ờ ngòt mờ dan cih mat tus bal tàm ală mpồl tus bal is dong kờl tàm tiah lam lài rcang sơndră kòp Covid-19. Ờ kờp ngai halà mang, trồ tơngai halà trồ mìu bòl glar, kal ke, bal mờ ală mpồl lơh broă ndai, rnàng kơnòm să Dăk Lăk gam lơh ngan tă pơgồp bơta pràn mờ ală broă lơh mờ broă lơh ngan ngồn nàng sơm bat tê bal kơryan kòp.

          Cau cih H’Xíu H’mốc- Cau mblàng K’Hạnh