VOV4.K’ho - Mờ broă lơh “Sòl àng gùng ƀòn”, gĭt nđờ jơ̆t kơi sồ gùng lòt tàm tiah nhàr dà lơgar càrDak Lak neh geh crăp ồs đèng àng; ai geh bơta ƀuơn làng bol in tàm broă lòt rê mờ pơgồp bal tàm broă sền gàr niam bơta lơngăp lơngai ờ do ờ dă tàm tiah nhàr dà lơgar. Do là ală broă lơh geh pơnrơ ngan bơh Tỉnh Đoàn Dak Lak dê pơgồp bal tàm broă bơ̆t bơtàu ƀòn lơgar pa.

Bồ nhai 3 nam do, làng bol kis tàm thôn 8, xã Ia Rvê, kơnhoàl Ea Súp, càr Dak Lak chờ hờp ngan tŭ gơl gùng tờm tàm ƀòn geh crăp ồs đèng àng. Broă lơh “Sòl àng gùng ƀòn” tàm thôn 8 jòng rơlao 1 kơi sồ, mờ 20 nơm ñjrong đèng àng, ngui năng lượng măt tơngai, kờp jơh khà 35 tơlăk đong.

                    Broă lơh sòl àng gùng ƀòn tàm ƀòn 8, xã Ia Rvê, kờnhoal Ea Súp ngui năng lượng măt tơngai

Do là broă lơh geh bal tàm broă “Nhai pe tiah nhàr dà lơgar” geh Tỉnh Đoàn Dak Lak pơgồp bal mờ Tỉnh Đoàn Lâm Đồng lơh tàm tiah nhàr dà lơgar càr  Dak Lak, tàm hơ̆ Tỉnh Đoàn Lâm Đồng dong kờl phan, mpồl đoàn viên ơruh pơnu mờ làng bol tàm càr do dong kờl ngai crăp.

Ồng Phạm Hồng Lĩnh, kuang atbồ thôn 8, xã Ia Rvê, kơnhoàl Ea Sup yal, bơh tŭ geh ồs đèng àng tàm gùng, ală broă lơh bơh làng bol tàm ƀòn neh gơs niam rơlao, làng bol cau lơi kung chờ hờp lơm. “Tŭ ờ hềt geh crăp ồs đèng tàm gùng den kung kal ke ngan bè broă sền gàr bơta lơngăp lơngai. Tơnơ̆ mờ tŭ neh crăp geh ồs đèng àng do den làng bol chờ hờp ngan, lài ngan là bơta lơgăp lơngai tàm ƀòn, tàm gùng ƀòn, làng bol chờ hờp ngan mờ kờñ bal. Bơh tŭ geh àng tàm gùng do den làng bol lĭk tàp pràn să jan mờ trồ mang tŭ lơi kung bơh 9 jơ nggùl tus 10 jơ hơ̆ sồng rê bĭc”.

Lài mờ hơ̆, bơh lồi nam lài, tàm ƀòn Drang Phôk, xã Krông Na, kơnhoàl Buôn Đôn, broă lơh sòl àng gùng ƀòn kung geh lơh mờ jòng 1 kơi sồ nggùl mờ 27 tiah geh crăp ƀong đèng.

          Công ty Điện lực Dak Lak dong kờl crăp broă lơh tàm ƀòn Drang Phôk, xã Krông Na, kơnhoàl Buôn Đôn

Ồng Y Chuôn BKrông, làng bol kis tàm ƀòn Drang Phôk pà gĭt, broă lơh do bơh tŭ geh lơh gơs mờ ai ngui tus tŭ do neh cèng geh cồng nha niam. Geh ồs đèng àng tàm gùng ờ mìng dong kờl tàm broă lòt rê niam ờ do ờ dă, gàr niam bơta lơngăp lơngai tàm ƀòn mờ gam lơh gùng lòt niam rơlao, làng bol gĭt wă tàm broă gàr kloh niam gùng lòt mờ sền gàr bal phan bơna uă rơlao. “Jơh ală làng bol cau lơi kung chờ hờp lơm, tài neh geh ồs đèng àng, lòt rê tŭ trồ mang, tŭ gơtìp kòp tê jê să, lòt còp să den geh ồs đèng àng tàm gùng den tàng ờ glar bòl, gŏ chờ ngan”.

Tus tŭ do, tàm càr Dak Lak neh geh 8 ƀòn tàm tiah nhàr dà lơgar geh crăp ồs đèng àng tàm ƀòn mờ di pơgăp 13 kơi sồ gùng lòt tàm ƀòn neh geh ồs đèng àng. Tàm khà do geh broă lơh bơh Công ty Điện lực Dak Lak dong kờl, kuang bàng, cau ling ală pôs ling tiah nhàr dà lơgar pơgồp bal lơh. Geh ờ uă broă lơh geh Tỉnh Đoàn Dak Lak lam sồr gùt mpồl bơtiàn tus bal lơh nàng geh ồs đèng àng tus mờ làng bol kis tàm tiah nhàr dà lơgar.

Bi Y Lê PasTơr, Phó Bí thư thường trực Tỉnh Đoàn Dak Lak pà gĭt, bơh nam 2014 tus tŭ do, broă lơh sòl àng gùng ƀòn neh geh ală cấp bộ đoàn tàm càr Dak Lak lơh jăt mờ uă broă lơh geh rơcang lài. Geh ờ uă Huyện đoàn mờ đoàn neh lam sồr geh bơta pràn lơh broă do, pơgồp bal mờ điện lực ală kơnhoàl nàng lơh, crăp broă lơh do tàm ală ƀòn.

Bal mờ hơ̆, tàm 2 nam pa do, Tỉnh Đoàn Dak Lak pơn jăt tai lơh broă sòl àng gùng ƀòn tiah nhàr dà lơgar, tơrgùm bơta pràn nàng lơh tàm ală gùng gơwèt ală ƀòn tàm tiah nhàr dà lơgar. Tơngu me là tus nam 2022 geh lơh 20 kơi sồ gùng nhàr dà lơgar geh ồs đèng àng. “Jơh ală bơta pràn ndrờm geh mpồl bơtiàn lơh 100% lơm. Mờ tus do, Ban thường vụ Tỉnh Đoàn kờp dŭ geh lơh ồs đèng àng jăt gơl gùng nhàr dà lơgar tơn. Den do là rơndăp broă gam dan cấp uỷ kung bè hòi jà lam sồr tai geh ală bơta pràn. Mờ tơngu me bè sòl àng gùng nhàr dà lơgar den geh lơh jŏ jòng, kờp dŭ lơh di pơgăp 20 kơi sồ tàm tơngai lơh tơngai lơh broă bơh nam 2017 tus 2022, lơh ngan tus lài mờ tŭ tơn jơh tơngai lơh broă, lài mờ tŭ pơrjum dờng Đoàn cấp càr geh bơyai lơh den geh lơh gơs rơndăp broă geh ai do mờ geh yal tàm pơrjum”.

Ală broă lơh sòl àng gùng ƀòn geh lơh neh pơgồp bal tàm broă gàr niam bơta lơngăp lơngai, tơnguh niam rài kis phan bơna, nùs nhơm ai làng bol tàm ală tiah geh dờp bơta kuơ. Gơwèt mờ làng bol kis tàm tiah nhàr dà lơgar bơh càr Dak Lak, ală broă lơh do neh cèng wơl cồng nha mùl màl, pơgồp bal tàm broă lơh tam gơl muh măt ƀòn lơgar, gàr niam bơta lơngăp lơngai, ờ do ờ dă tàm tiah nhàr dà lơgar.

Cau cih H’ Xíu-Cau mblàng Ndong Brawl