VOV4.K’ho- Dak Lak pal tơnguh cơl dŭ pơrlòng rcang lài tàm dơ̆ pơrlòng jơh bơsram kấp pe nam 2021, do là jơnau sồr bơh Thứ trưởng Bộ Giáo dục– Đào tạo ồng Nguyễn Văn Phúc tàm dơ̆ lơh broă mờ Mpồl đơng lam pơrlòng jơh bơsram kấp pe nam 2021 càr Dak Lak dê bè broă lơh rcang lài ai dơ̆ pơrlòng jơh bơsram kấp pe tiah do dê tàm mho ngai 2/7. Mpồl lòt sền tàm tiah in, photo jơnau pơrlòng, tiah lơh phách, tiah ai điềm pơrlòng mờ phan bơna tàm bàr pe anih pơrlòng tàm ù tiah càr dê. Tàm hơ̆, tơrgùm lòt sền tàm ală tiah geh uă cau tus bal pơrlòng khat gơboh.

Tềng đap bơta kòp Covid-19 gam gơlik geh kal ke, Thứ trưởng Bộ Giáo dục– Đào tạo ồng Nguyễn Văn Phúc tơngkah bal mờ gàr niam dơ̆ pơrlòng geh bơyai lơh niam, di mờ kơrnoat, càr Dak Lak kung pal sền gròi ngan tus broă gàr niam bơta ờdo ờdă tàm broă rcang sơndră kòp ai kuang bàng, cau pơgru, cau lơh broă drơng broă pơrlòng mờ cau pơrlòng in tus bal pơrlòng.

Dơ̆ pơrlòng jơh bơsram kấp pe nam do, Dak Lak geh rlau 19 rơbô 800 nă cau tus bal pơrlòng. Càr ai 32 tiah pơrlòng mờ rlau 840 anih pơrlòng. Rlau 2 rơbô 700 nă Kuang bàng, cau pơgru, cau lơh broă gah bơto bơtê, kuang àng, gah lơh sơnơm... geh hòi jà tus bal tàm ală kơnòl broă sền pơrlòng, sền gròi, gàr niam bơta lơngap lơngai mờ ờdo ờdă...

Cau mblàng K’Hạnh