VOV4.K’ho- Pa do, Thủ tướng Chính phủ neh sồr gah Giao thông Vận tải ală càr, ƀòn dờng tàm gùt lơgar pờ “Gùng ai lòt” ai mã thẻ QR Code dong kờl mpồl lơh sa kă bro pơndiang, tac phan lơh gơs bơh suơn sre mờ ală bơta phan kuơmàng pal geh. Bơh lồi nhai 7 nam 2021 tus tŭ do, Sở Giao thông Vận tải càr Dăk Lăk neh lơh rlau 2 rbô mã QR Code “Gùng ai lòt” ai rơndeh rơndồ in nàng kờñ dong kờl ală mpồl pơndiang phan kung bè dong làng bol ƀuơn rlau tàm broă pơndiang, tac phan lơh gơs bơh suơn sre halà ală bơta phan ngui sa pal geh.

Ồng Đặng Quang Điện, Kang atbồ Hợp tác xã broă drơng ala kă bro pơndiang phan 63 càr, ƀòn dờng càr Dăk Lăk yal, mpồl lơh sa kă bro geh 45 nơm rơndeh kong goa pơndiang ală bơta phan lơh gơs bơh suơn sre, plai chi tàm ală càr Tây Nguyên lòt tus ală càr tiah đah tô dà lơgar mờ càr lơgar Hà Nội nàng tac. Tŭ tus Hà Nội mờ 2, 3 càr lơh jat broă ơm yah ngài jat Jơnau sồr sồ 16 bơh Thủ tướng Chính phủ dê, broă pơndiang phan bơna gơtìp lơyài tài bơh pal lơh jat ală broă lơh gròi sền rơcang sơndră kòp Covid-19. Tàm lồi nhai 7 pa do, Sở Giao thông Vận tải càr Dăk Lăk lam lơh pờ “ Gùng ai lòt” ai mã QR Code ai lài rơndeh pơndiang phan bơh mpồl lơh sa kă bro dê in ƀuơn rlau tàm broă lơh pơndiang, tac bro phan bơna tŭ tus ală càr, ƀòn dờng gam lơh jat broă ơm yah ngài mpồl bơtìan jat Jơnau sồr sồ 16 bơh Thủ tướng Chính phủ dê: “Bơh jơnau yal bơh anih lơh broă geh gơnoar dê bè broă ai mã QR Code pơndiang phan bơnah ngui sa pal geh, bol hi neh cih mat tàm internet, mờ sră nggal den ƀuơn ngan. Tơnơ̆ tŭ cih mat “Gùng ai lòt” geh ai mã QR Code tàm Sở Giao thông Vận tải càr Dăk Lăk den rơndeh bol hi geh lơh thẻ đal git rơndeh rơndồ tơn mìng tơ nơ̆ bơh 1 tus 2 jơ cih mat. Tŭ geh thẻ, broă pơndiang phan ngui sa pal geh lòt gan ală anih gròi sền kòp bơh càr dê kung bè ală càr, ƀòn dờng ndai geh mhar mờ ƀuơn uă rlau. Bơdìh hơ̆ tai, jơh ală oh mi măi rơndeh tàm kong ti kung geh dong kờl lơh xét nghiệm mhar kòp Covid-19 tàm anih gròi sền kòp Covid-19 mờ ờ roh priă jền mờ kung ờ roh uă tŭ tơngai”.

Ală cau măi rơndeh geh lòt gan anih gròi sền kòp Covid-19  mhar rlau tŭ geh mã QR Code “gùng ai lòt” tàm ală gùng dờng

Càr Dăk Lăk geh 6 gùng dờng lòt gan, geh: Gùng 14 (gam hòi là gùng Hồ Chí Minh), gùng 26, 27, 19 mờ 29 tơrbŏ mờ ală càr Lâm Đồng, Gia Lai, Dăk Nông, Khánh Hòa mờ Phú Yên. Tŭ do, jơh ală gơl gùng dờng ndrờm geh anih gròi sền rơcang sơndră kòp Covid-19, sền gròi cau mờ rơndeh rơndồ mut mờ lòt tus ală càr.

Trung tá Đặng Thanh Hòa – Kuang bàng gròi sền gùng lòt Anih Cảnh sát gùng lòt Krông Búk, gơ wèt Kuang àng càr Dăk Lăk pà git, tàm anih gròi sền kòp Covid-19  tàm gùng tiah đah tô mat tơngai lik càr dê là rbàng 110 gơ wèt xã Ea H’leo rềp mờ càr Gia Lai, kờp bal pah ngai geh git nđờ rhiang nơm rơndeh rơndồ mờ git nđờ rbô nă cau lik mờ mut tàm càr Dăk Lăk. Tŭ ală rơndeh rơndồ pơndiang phan bơna geh sră đal git rơndeh rơndồ geh mã QR Code gam geh tơngai ai ngui bơh Sở Giao thông Vận tải ală càr, ƀòn dờng  dê lơh den geh sền sơ wì lài nàng rơndeh rơndồ in geh lòt tàm tơngai mhar ngan rlau jơh: “Anih Cảnh sát gùng lòt Krông Buk ai jơh cau lơh broă ơm gròi sền ngai mang nàng gàr ờdo ờdă gùng lòt kung bè dong kờl broă rơcang sơndră kòp Covid-19. Lơh jat jơnau sồr “Gùng ai lòt” bơh Thủ tướng Chính phủ dê, jơh ală mpồl lơh broă geh sền sơwì mã QR Code, dilah ală mpồl pơndiang phan geh ai mờ tơl tơngai ngui den bol hi geh ai bơta ƀuơn ngan rlau jơh nàng mhar geh lòt gan anih gròi sền”.

Bơh ngai 19/7/2021 tus tŭ do, Sở Giao thông Vận tải Dăk Lắk lơh rlau 2 rbô nơm rơndeh rơndồ in mã QR Code nàng lòt tàm ală “gùng ai lòt” tŭ pơndiang phan ngui sa pal geh

Jat ồng Lê Đình Minh – Phó Kuang atbồ Sở Giao thông Vận tải càr Dăk Lắk pà git, lơh jat jơnau đơng lam bơh Chính phủ dê kung bè Bộ Giao thông Vận tải dê, broă dong kờl ală mpồl pơndiang phan ngui sa pal geh, Sở neh yal tus ală mpồl pơndiang phan tàm càr Dăk Lăk cih mat lơh mã đal git QR Code rơndeh rơndồ nàng geh ai lài lòt, pơndiang phan tàm ală “Gùng ai lòt”.  

Broă ring bal lơh mã QR Code ai lài “Gùng ai lòt” geh lơh mờ ală phần mềm điện tử lơm bơh tàm mạng internet, mờ sră nggal ƀuơn, mhar mờ mìng tàm pơgap ờ hềt tus nggùl ƀùi là neh geh lơh. Ồng Lê Đình Minh đơs: “Kờp tus tŭ do, bol hi neh lơh geh 2 rbô 36 mã QR Code ai ală rơndeh rơndồ in lòt pơndiang phan ngui sa pal geh tus ală càr, ƀòn dờng tàm gùt lơgar. Sở Giao thông Vận tải pơn jat tai yal mờ sồr ală mpồl lơh sa kă bro pơndiang phan cih mat lơh mã QR Code “Gùng ai lòt” nàng ƀuơn rlau tàm broă pơndiang phan ngui sa pal geh tàm tŭ tơngai kòp bơ tờp tŭ do gam gơlik geh kal ke tàm càr kung bè gùt lơgar. Bol hi neh ai ală mpồl ơm gròi sền ngai mang mờ jơh 7 ngai tàm poh ai ală mpồl pơndiang phan in. Mpồl lơh sa kă bro mìng tong sră nggal tàm internet là bơh 1 tus 2 jơ geh tơl bơta den bol hi lơh mơ nàng dong kờl pơndiang, tac bro phan bơna mhar rlau”.

          Cau mblàng K’Duẩn