VOV4.K’ho- Ală mpồl ồs đèng tàm càr Dăk Lăk neh lơh gơs broă lơh niam wơl gùng che pờ tơlik ồs đèng, pờ wơl đèng drơng mờr 16 rbô 500 hìu bơnhă tàm ală kơnhoàl Ea Kar, M’Drăk, Ea H’leo. Lài hơ̆, tài gơ rềng bơh càl rbut dờng sồ 5, mìu sơr bal mờ càl pồt pràn neh lơh pừ dùl ròt ală jrong đèng, tac che đèng, lơh aniai trạm biến áp tàm ală kơnhoàl do.

Ồs đèng Ea H'leo tam gơl jrong đèng mờ Trạm biến áp

Mùl màl, tàm tiah rềp nhàr đah Ea Kar mờ M’Drăk, mìu sơr lơh tơrlah ù, chi che pă, pừ tàm gùng che đèng gơ wèt gùng che 471F18, lơh chơt đèng 11 rbô 600 nă cau ngui đèng tàm 2 kơnhoàl do. Ală anih gơlik geh bơta ờ niam hơđang bơnơm jơnhoa, lơh kal ke tus mờ broă lơh niam wơl. Bulah bè hơ̆, gah ồs đèng Ea Kar neh mhar ai cau lơh broă, lơh gơs broă pờ wơl đèng bơh bồ poh do tơn.

Ồs đèng Ea Kar lơh niam wơl che đèng gơtìp tac

Ndrờm bè hơ̆ sơl, tàm ù tiah bơh ồs đèng Ea H’leo atbồ, càl pồt pràn lơh pừ 1 jrong đèng mờ lơh aniai 1 trạm biến áp mờ mờr 5 rbô nă cau ngui đèng gơtìp chơt đèng. Broă lơh niam wơl neh geh ồs đèng kơnhoàl lơh gơs tàm ngai tơn. Tàm 2, 3 tiah ndai, ală mpồl ồs đèng Dăk Lăk kung ai cau gròi sền, mhar bơsong ală broă gơlik geh bè ồs đèng tài mìu, càl pồt pràn, kuơmàng là tàm ală tiah gam gơtìp wàng se, tam cah is rơcang sơndră kòp Covid-19.

Cau mblàng K’Duẩn