VOV4.K’ho- Ngai 28/10, càr Dăk Lăk git gŏ tai 126 nă cau bơtờp kòp Covid-19, tàm hơ̆ geh 39 nă cau geh git gŏ tàm mpồl bơtiàn. 126 nă cau bơtờp kòp Covid-19 pa mờ 39 nă cau git gŏ tàm mpồl bơtiàn tàm càr Dăk Lăk tơrgùm uă ngan tàm ală kơnhoàl Cư Mgar, Krông Buk, thị xã Buôn Hồ mờ ƀòn dờng Buôn Ma Thuột.

Ƀòn dờng Buôn Ma Thuột sùm git gŏ cau bơtờp kòp tàm mpồl bơtiàn

Do kung là ală tiah geh uă cau bơtờp kòp tàm mpồl bơtiàn tàm 1 poh do mờ ală cau kòp uă ngan geh gơ rềng tus bơta bơtờp kòp bơh ală cau rê bơh tiah geh kòp ală càr, ƀòn dờng tiah đah jum dà lơgar. Uă xã, sơnah ƀòn tàm ală tiah do neh tơnguh khà mhar ngan bơh khà 1, khà 3 tus khà 3, khà 4, hơ̆ là bơh tiah ờ geh jơnau pơhìn bơtờp kòp, tiah geh jơnau pơhìn bơtờp kòp tus tiah geh jơnau pơhìn bơtờp kòp uă mờ tiah pơhìn bơtờp kòp uă ngan. Gah lơh sơnơm càr Dăk Lăk gam lơh ngan lùp sền, jòi cau ơm rềp, lam lơh tam cah is mờ ai mẫu xét nghiệm ală cau geh gơ rềng tus bơta bơtờp kòp ơm rềp mờ ală cau kòp, git gŏ F0 tàm mpồl bơtiàn.

Gơ rềng tus broă gơlik geh bơh kòp Covid-19 tàm Dăk Lăk gam kal ke ngan, ngai 28/10, Ủy ban Nhân dân càr Dăk Nông neh geh sră nggal jal mhar sồr bơh ngai 29/10, kuang bàng mờ cau lơh broă càr Dăk Nông dê ờ geh lòt tus halà rê tàm càr Dăk Lăk tàm 14 ngai, ờ kờp ală tŭ kuơmàng pal lòt lơh broă halà geh bơta ring bal bơh anih lơh broă geh gơnoar dê.

Cau mblàng K’Duẩn