VOV4.K’ho- Nàng pơn jờng srơh “kơnòm bơsram 3 niam” mờ bơceh pa kơnòm dềt tàm hìu bơsram kấp 3, càr Dăk Lăk neh lam lơh broă lơh “Hìu kơnòm bơsram 3 niam mờ anih bơceh pa kơnòm să” tàm 2, 3 hìu bơsram kấp 3. Anih pa do geh kơp gơn geh gơ gơs anih tìp mat, lơh quèng, cribơyai đah kơnòm bơsram mờ cau pơgru nàng tơnguh rlau tai srơh bơceh pa tàm kơnòm bơsram.

Bơh nam bơsram do, hìu bơsram kấp 3 Trần Phú neh ai ngui “Anih bơceh pa kơnòm să” bơh hìu bơsram dê. Do là broă lơh geh Tỉnh đoàn Dăk Lăk dong kờl lam lơh mờ priă tă lơh mờr 50 tơlak đong, ngui cơldŭ pơrjum pơgru dê geh lơh niam wơl, bơka wơl gơs anih ơnàng ngan, geh tùh sră sền nàng git mờ ală bơta sră bè kơlôi sơnơng khoa học, giáo dục chính trị, lí luận, sơn đờm mut lơh broă; ràng tơlik ală rơndap broă lơh, broă lơh bơceh pa bơh kơnòm bơsram geh khà jờng tàm ală dơ̆ pơrlòng dê. Vàng Ngọc Đan, kơnòm bơsram ơdŭ 12A1 pà git, tơnơ̆ tŭ geh khà dùl tàm nam lài, nam do, Đan bal mờ mpồl bơyô he dê pơn jat tai lam lơh rơndap broă tus bal Bơceh pa Khoa học kỹ thuật kấp càr. Tàm tơngai pal ơm yah ngài jat ală jơnau sồr rơcang sơndră kòp Covid-19, anih bơceh pa kơnòm să hìu bơsram dê neh gơ gơs là anih dipal nàng mpồl in sền tai uă sră nggal nàng jòi git, cribơyai bè broă lam lơh tơngume jơnau bơceh: “Tŭ bol oh bơsram pờ tơn tàm internet den gơtìp uă ngan kal ke tŭ lùp, cribơyai mờ cau pơgru. Tơnơ̆ do, tŭ kòp neh ờ huan bơtờp uă den bol oh geh lơh bal, geh lùp tơn cau pơgru, geh ngui anih bơceh pa do nàng bol oh gơtùi cribơyai mờ cau pơgru dùl bă ƀuơn rlau nàng geh uă broă lơh bơceh pa”.

“Hìu kơnòm bơsram 3 niam” là broă lơh pơgồp bơnah tơnguh jơnau git wă sền gàr tiah ơm kis ai kơnòm bơsram in

Bi Trần Minh Tú, Bí thư Đoàn Hìu bơsram kấp 3 Trần Phú pà git, do là anih lời ai kơnòm bơsram mờ cau pơgru in tàm cribơyai, kơlôi sơnơng khoa học mờ bơt bơtàu jơnau bơceh pa, tơngume broă lam lơh ai ală dơ̆ pơrlòng in.

Nàng pơn jờng kơnòm bơsram bơceh pa mờ tus bal kơlôi sơnơng khoa học, pah nam, hìu bơsram ndrờm lam lơh dơ̆ pơrlòng bơceh pa khoa học kỹ thuật kấp hìu bơsram mờ rơ wah ală tơngume broă lơh geh pơn rơ nàng tus bal pơrlòng kấp càr. Nam bơsram do, dơ̆ pơrlòng kung geh lam lơh bơh bồ nhai 11 mờ tŭ do gam pơn jat tai dờp ală jơnau bơceh pa, tơngume broă lơh bơh kơnòm bơsram dê cih mat. Tơnơ̆ tŭ rơ wah geh ală tơngume broă lơh, jơnau bơceh pa gơtùi lam lơh ngan ngồn den geh jàu cau pơgru in pơlam mờ dong kờl kơnòm bơsram lơh sir phan bơna nàng tus bal pơrlòng: “Gơ wèt mờ anih bơceh pa kơnòm să den geh lam lơh 2, 3 broă lơh nàng tơnguh bơta bơceh pa ai kơnòm bơsram in. Lài ngan là bè dơ̆ pơrlòng bơceh pa khoa học kỹ thuật kấp càr. Bơdìh hơ̆ tai den tàm nam bơsram 2021- 2022, tơnguh bơta pràn jak lơh broă mpồl ai đoàn cau pơgru pơlam kơnòm bơsram, tề lam ală oh, tam pà mờng chài lơh khoa học kỹ thiật bè lơi mờ ai tơlik jơnau bơceh pa ai kơnòm bơsram in bơceh bè lơi, pơlam mùl màl nàng lơh gơlik phan niam ngan rlau jơh dilah gơtùi mờ cèng tus anih bơceh pa kơnòm să do nàng ràng tơlik”.

Jat bi Trần Doãn Tới, Phó Bí thư Tỉnh đoàn, Chủ tịch Mpồl cau bơsram dờng càr Dăk Lăk pà git, tàm nam do, geh bơta dong kờl bơh Mpồl cau bơsram dờng dà lơgar VN dê, càr Dăk Lăk neh rơ wah lam lơh 4 broă lơh “Anih bơceh pa kơnòm să mờ hìu kơnòm bơsram 3 niam” tàm 4 hìu bơsram kấp 3 gơ wèt ală kơnhoàl Krông Bông, Krông Pắk, Ea Sup mờ ƀòn dờng Buôn Ma Thuột. Do là ală hìu bơsram geh pơn rơ tàm broă lam lơh srơh niam, là hìu bơsram tàm tiah kal ke, tiah nhàr dà lơgar. Tơl broă lơh geh khà dong kờl là 50 tơlak đong, geh 3 bơnah broă, tàm hơ̆ “Hìu kơnòm bơsram 3 niam” geh mòn mờ sơ lo, dơm lòs geh rkàng jơm; tềng hờ đap geh 1 ƀlàng dờng lir jơnau tơnggit, tơl khà bơh srơh “Kơnòm bơsram 3 niam dê”, đah ngkời tam pà gơs 3 tap nàng prap sră sồ siă, khàr đù, lon sang tĕ mờ geh ơn tềng ƀlàng hìu bơsram. “Anih bơceh pa kơnờm să” geh ƀlàng nàng kơnòm bơsram in tơrgùm bal, tìp mat, kơlôi sơnơng khoa học. Tơl broă lơh gam geh dong kờl tai rlau 100 pang sră ală bơta.

Tùh sră tàm Anih bơceh pa kơnòm să bơh Hìu bơsram kấp 3 Nguyễn Bỉnh Khiêm, kơnhoàl Krông Păk dê

Bi Trần Doãn Tới đơs là, ală broă lơh do geh pơgồp bơnah tơnguh tai bơta pơn jờng nàng ală hìu bơsram in pơn jat tai lam lơh geh cồng nha rlau ală srơh cau kơnòm să bơceh pa mờ kơnòm bơsram 3 niam tàm hìu bơsram, lơh gơlik bơta pơn jờng ai kơnòm bơsram in pơlam tàp, rơcang lài kơlôi sơnơng khoa học, lơh gơlik bơta kờñ gơboh mờ bơta tam gơl pa tàm broă lơh bơto bơtê mờ bơsram tàm hìu bơsram kấp 3: “Tơngai tus, broă lam lơh srơh “Kơnòm bơsram 3 niam” mờ “Cau kơnòm să boceh pa” den kung gam pơn jat tai lam lơh mờ ală anih bơceh pa tàm ală mpồl tàm jơh ală hìu bơsram kấp 3 tàm gùt càr. Bơh 4 anih bơceh pa sơn rờp do den bol hi geh lam lơh uă mờ lơh ngan tus lồi tơngai lơh broă tàm nam 2022 geh  10 anih bơceh pa tàm ală hìu bơsram. Bơh hơ̆ geh là bơta pơn jờng, bơta pràn chul chồl nàng tàm tơngai tus ală hìu bơsram lơh ngan bè lơi tơnguh rlau tai mờ lam lơh geh cồng nha srơh kơnòm bơsram 3 niam mờ srơh cau kơnòm să bơceh pa.”

Ală nam rềp ndo, Mpồl tam klac ală Mpồl khoa học mờ kỹ thuật càr Dăk Lăk neh pơgồp bal mờ Sở Giáo dục mờ Đào tạo, Sở Khoa học mờ Công nghệ sùm bơyai lơh pơrlòng bơceh pa lời ai ơruh pơnu, kơnòm pa tàu mờ kơnòm dềt in. Nam lài, geh 123 broă lơh “Măi đo is mờ yal khà ngui dà ngui sa” bơh dùl nă kơnòm bơsram tàm xã Dur Kmăn, kơnhoàl Krông Ana dê. Dơ̆ pơrlòng là broă lơh kờñ tơnguh bơta pràn mờ tơnguh bồ tơngoh kơlôi sơnơng bơceh pa bơh ală ơruh pơnu, kơnòm pa tàu, kơnòm dềt dê tàm càr Dăk Lăk, dong ală oh tơnguh tai jơnau git wă, pơlam tàp bơta chài bơceh pa mờ tơnguh srơh tàm pơrlòng bơsram sră, lơh broă bơceh pa.

Cau mblàng K’Duẩn