VOV4.K’ho- Drim ngai 8/4, ồng Phạm Ngọc Nghị Chủ tịch Ủy ban Nhân dân càr Dăk Lăk đơng lam dơ̆ pơrjum sền swì, bơsong bàr pe broă geh gơrềng tàm broă lơh sră nggal bơcri priă lơh ală rơndăp broă lơh tàm càr.

Dơ̆ pơrjum

Tàm dơ̆ pơrjum, cau bơcri priă, ala măt ală sở, gah sơnah lơh broă neh yal bè ală bơta kal ke, kòl yan tàm broă bơsong bàr pe broă geh gơrềng tàm broă lơh ală sră nggal bơcri priă lơh ală rơndăp broă lơh tàm ù tiah càr dê, tàm hơ̆ geh: Sră wăc rùp Rơndăp ù tiah tam cah tiah Tơrgùm mpồl nhơl chờ ƀòn lơgar brê bơnơm, nhơl chờ lơh rài bồ tơngoh mờ ƀlàng golf  tơnau dà Ea Nhái; dan lơh Rơndăp broă lơh Tiah tờm Logistics tiah Tây Nguyên bơh Tổng Công ty Cổ phần Bưu chính Viettel dê. Đơs pơndŭt dơ̆ pơrjum, ồng Phạm Ngọc Nghị Chủ tịch Ủy ban Nhân dân càr Dăk Lăk tam pà bal ală bơta kal ke, kòl yan mờ ală cau bơcri priă.

Mơkung jàu ală sở, gah sơnah lơh broă càr mờ ală tiah in pơgồp bal mờ ală anih lơh broă geh gơrềng kờp sền rơndăp ù tiah, tơrgùm kờp, lơh sir gơs ală jơnau yal, bơto pơlam lơh ală sră nggal pal geh jăt jơnau sồr, gờñ jun yal mờ Ủy ban Nhân dân càr in sền swì, tă bơsong kal ke kòl yan nàng kờñ ală rơndăp broă lơh geh lơh geh cồng nha, pơgồp bơnah bơtàu tơnguh lơh sa- mpồl bơtiàn bơh càr dê.

Cau mblàng Lơ Mu K’Yến