VOV4.K’ho- Pơrjum dơ̆ 2 Hội đồng Nhân dân càr Dăk Lăk khoá 10, tơngai lơh broă bơh nam 2021- 2026 geh bơyai lơh tàm 2 ngai bơh ngai 12 tus ngai 13/8. Geh bơyai lơh tàm tơngai kòp Covid-19 gơlik geh kal ke tàm càr dê, pơrjum dơ̆ do neh geh bơyai lơh jat broă lơh pờ tơlik tơn tàm internet mờ 8 anih tàm tơrbŏ bal nàng gàr niam ală jơnau sồr rcang sơndră kòp.

Tàm anih tờm pơrjum Hội  đồng  Nhân  dân  càr Dăk Lăk

Tàm pơrjum do, Hội đồng Nhân dân càr Dăk Lăk neh sền sơ wì cồng nha lơh jat broă rơndap lơh bơtàu tơnguh lơh sa- mpồl bơtiàn, sền gàr niam bơta lơngap lơngai dà lơgar, sền gàr bơta lơngap lơngai 6 nhai bồ nam; ală kơnòl broă, gùng dà broă lơh tờm 6 nhai lồi nam 2021. 6 nhai pa do, bulah gơtìp gơrềng tài bơh kòp dờng Covid-19, mơya mờ broă lơh tơrgùm bal đơng lam, sồr lơh jat “jơnau kờñ dơ̆ lĕ bal” jơh nùs lơh ngan rcang sơndră kòp mờ kung pal bơtàu tơnguh lơh sa- mpồl bơtiàn, kờp jơh priă lơh geh tàm ù tiah càr dê (GRDP- giá pơn ndrờm mờ nam 2010) kung gam lơh geh rlau 22 rơbô 200 tơmàn đong, gơguh 9,11%. Kờp jơh priă tă dia dà lơgar dê lơh geh 3 rơbô 595 tơmàn đong, gơguh 11,5% pơndrờm dùl tŭ bal mờ nam lài; ală broă lơh niam chài rơgơi- mpồl bơtiàn geh lơh sùm bè ờs; ală broă lơh gàr tơl niam rài kis mpồl bơtiàn geh sền gròi lơh jat; rài kis làng bol dê geh gàr niam.

Tàm anih tờm pơrjum Hội  đồng  Nhân  dân  càr Dăk Lăk

Tàm dơ̆ pơrjum, ală Kuang bàng geh ai jơnau đơs tă pơgồp bal bè gùng dà broă lơh lơh jat kơnòl broă ală nhai gam wơl bơh nam 2021 dê; cribơyai, ring bal ală Nghị quyết geh gơrềng tus broă rơndap lơh bơtàu tơnguh lơh sa- mpồl bơtiàn càr Dăk Lăk dê 5 nam tus. Tàm jơh 8 anih tàm tơbŏ bal, lài mờ tŭ tus bal pơrjum dơ̆ 2, Hội đồng Nhân dân càr Dăk lăk khoá 10, ală Kuang bàng ndrờm geh test mhar kháng nguyên Sars CoV-2 mờ geh ai nggui yah ngài, pơn chèu glòm muh mat nàng lơh jat niam jơnau sồr rcang sơndră kòp.

Cau mblàng K’Hạnh