VOV4.K’ho - Ală càr tàm Tây Nguyên đơs bal mờ càr Dak Lak đơs is neh mŭt tàm kàl mìu. Mơya, tàm xã Ea Siên, thị xã Buôn Hồ, càr Dak Lak gam ờ hềt geh mìu, broă lơh bơtơ̆t rơbòng dà gơtìp soăt dà lơh mờr 2 rơbô lồ phan tam gơtìp aniai uă mờ rơlao 1 rơbô 400 hìu làng bol ờ geh dà ngui sa.

Suơn kơphe ơnàng rơlao 1 lồ gam tàm tơngai geh plai bơh hìu nhă ồng Hứa Văn Quân, kis tàm xã Ea Siên, thị xã Buôn Hồ gam gơtìp mờ trồ prang lơh aniai uă ngan. Suơn kơphe gam tàm tơngai ròng plai dờng bè ờs nha pal tơlir niam mơya tŭ do ntê, nha neh gơtìp ro, plai dềt gơtìp gơjrùh jơh.

              Làng bol kis tàm xã Ea Siên, thị xã Buôn Hồ gam kơ̆p gơn trồ mìu nàng sơndră mờ trồ prang

Ồng Hứa Văn Quân pà gĭt, di lah tàm 2, 3 ngai tus mờ trồ ờ mìu, suơn kơphe ờ geh tuh dà den di gơlan ờ geh tơnhào là jơnau ờ gơtùi pleh ngan. “Tŭ do bè ală nam lài ờ gơtìp trồ prang den suơn kơphe geh plai pal dờng rơlao uă ngan, mơya tài trồ prang den tàng tờm ờ pràn mờ lơh gơtìp plai dềt rơlao mờ ală nam. Trồ prang gam lơh ntê, nha tờm kơphe gơtìp ro, plai dềt gơtìp gơjrùh uă, geh tŭ geh uă tờm neh chơ̆t”.

Kung ndrờm bal bè hơ̆ sơl, suơn kơphe tam bơrlŭ bal mờ tơngời ơnàng 1 lồ 4 sào bơh hìu nhă mò Siu H’ Niê, kis tàm ƀòn 2B, xã Ea Siên, thị xã Buôn Hồ kung gam gơtìp mờ trồ prang uă ngan. Mò Siu H’ Niê yal, nam lài bă ù do geh tơnhào tus 4 tấn kơphe gar, 5 tấn tơngời gar, mơya nam do trồ prang lơh kơphe gơtìp ro, tơngời tam bơrlŭ bal den neh chơ̆t jơh. Priă geh bơh hìu nhă mò Siu H’ Niê dê mìng kơnờm tàm 1 lồ 4 sào ù do, mơya trồ prang neh lơh aniai jơh. “Trồ prang duh bè do tơngời chơ̆t jơh bloh, nam lài tơnhào geh 20 tơlăk đong den nam do roh gời, gam suơn kơphe kung neh ro nha, plai gơjrùh. Dà tàm bơtơ̆t dơng dà den soăt jơh bloh. Di lah 2, 3 ngai tai ờ geh mìu den cồng nha tơnhào gơmù uă ngan. Trồ prang dờng lơh aniai uă ngan”.

             Gĭt nđờ rơhiang lồ tơngời pa tam tàm xã Ea Siên, thị xã Buôn Hồ gơtìp chơ̆t ro tài ờ geh dà tuh

Jăt khà kờp bơh UBND xã Ea Siên pà gŏ, lơh sa kàl prang nam 2021 gùt xã geh mờr 2 rơbô lồ phan tam ală bơta; tàm hơ̆ 1 rơbô 500 lồ phan tam jŏ tơngai là kơphe, tiêu, mắc ca, jràng; gam tai rơlao 500 lồ ù là phan tam ờ jŏ tơngai, tàm hơ̆ geh: Kòi, tơngời, khoah mờ rơmĭt.

Jăt ồng Nguyễn Quốc Cường, Chủ tịch UBND xã Ea Siên yal, bơta trồ prang tàm xã neh gơtìp tàm uă nam, tàm hơ̆ uă ngan là tàm kàl prang. Mơya, broă trồ prang gơtìp tàm gùl kàl mìu bè tŭ do là ờ hoan gơtìp. Ồng Cường yal tai, tàm ù tiah krơi is tàm do, den tàng dà căt ờ hoan geh ngan, dà drơng tàm broă lơh sa mờ ngui sa mìng geh ai bơh bàr broă lơh bơtơ̆t rơbòng dà Ea Mích, Ea Blang mờ ală tơnao dà, dà dờng, dà croh dềt. broă ờ hềt geh mìu dờng lơh ală broă lơh bơtơ̆t dơng dà, tơnao dà ha là dà dờng, dà croh gơtìp soăt.

Rơlao mờ hơ̆ tai, ală broă lơh bơtơ̆t dơng dà là Ea Mích mờ Ea Blang? uă nam do ờ hềt geh toah wàs, lơh niam wơl den tàng broă dơng dà ờ geh jăt mờ khà lài ngan geh ai, lơh gơtìp ờ tơl dà uă rơlao. Gơtìp prang bàn ờ mìng lơh aniai mờr 2 rơbô lồ phan tam, mờ gam lơh 7 rơbô 500 nă làng bol kis tàm xã do ờ tơl dà ngui sa uă ngan. “Trồ prang gơtìp tàm xã neh lơh gơtìp kal ke tus mờ broă tuh dà phan tam mờ dà ngui sa làng bol dê. Bè dà ngui sa den UBND xã neh dan mờ thị xã Buôn Hồ lơh broă lơh dà ngui sa tơrgùm bal ƀồm bơh tơnao dà Krông Bŭk Hạ tus anih tềng ƀòn 2A nàng lơh kloh mờ ai dà ngui sa làng bol kis tàm ală ƀòn in; bè dà tuh phan tam in den xã kung neh yal ală gùng dà broă lơh nàng toah wàs, lơh niam wơl ha là lơh kơl jăp wơl bàr broă lơh bơtơ̆t dơng dà Ea Bích mờ Ea B’Lang? ha là di gơlan lơh tai ală broă lơh bơtơ̆t dơng dà ndai nàng drơng tàm broă tuh dà phan tam tàm xã in”.

Trồ prang gơtìp tàm gùl kàl mìu tơngŏ bơh trồ tiah dê ngai sơlơ kal ke mờ ờ gĭt lài tàm Tây Nguyên.

Cau cih Tuấn Long-Cau mblàng Ndong Brawl