VOV4.K’ho- Tàm 2 ngai bơh ngai 17 tus ngai 18/7, Dak Lak geh tai uă cau bơtờp mờ virus Sars CoV-2. Kơlôi rcang rơngòt gơlik geh ờ tơl phan sa, phan ngui sa tàm tơngai ơm yah ngài mpồl bơtiàn jat Chỉ thị sồ 15 bơh Chính phủ dê, den làng bol tàm ƀòn dờng Buôn Ma Thuột neh ur ar lòt blơi phan, lơh bàr pe phan bơna tàm ală drà ờs mờng gơguh giá nisơna mờ ờ hoan geh ngan.

Cục Ătbồ drà kă bro Dak Lak gam lơh pràn broă lòt sền nàng kơryan bơta tơnguh giá tăc jòi geh priă jền

Ồng Đoàn Ngọc Thượng, Phó Chủ tịch Ủy ban Nhân dân ƀòn dờng Buôn Ma Thuột pà gĭt: ƀòn dờng kung neh lơh broă rơndap lơh ai tơl phan ngui sa mờ jơnau kờñ kuơ màng ai làng bol in. Bơdìh hơ̆, ƀòn dờng kung neh rcang lài ală gùng dà broă lơh tam pà bal, lơh geh phan bơna tàm bơta ờ niam ngan rlau jơh nàng gàr tơl ai làng bol in phan ngui sa, ờ rơngòt bơta ờ tơl phan bơna. Nàng di pal mờ jơnau kờñ blơi phan bơh làng bol dê, siêu thị Co.opmart Buôn Ma Thuột neh geh broă rơndap lơh prap ơn ală phan bơna ngui sa kờñ pal geh bè: phe, ală phan bơna sa mhar bè bung mi, bung, phở ro ală bơta; phan tĕ, phan hộp mờ phan ơn mrềt ală bơta. Mơkung gàr tơl phan ngui sa ris bè: poăc, ka, tap, biăp, bùm, plai đo.

Cục Ătbồ drà kă bro càr Dăk Lăk neh lơh sră lơh glài dùl hìu ràng tăc phan Bách Hoá Xanh tàm gùng Ngô Quyền, sơnah ƀòn Tân An, ƀòn dờng Buôn Ma Thuột tài bơh lơh tìs tăc phan ờ gŏ lir sră cih măt giă tăc phan mờ tăc mờ giă kas ngan rlau mờ giă neh lip tàm sră pơ àr, tìs mờ jơnau sồr tàm tơngai gơbàn kòp. Mpồl lơh broă geh gơnoar neh lơh sră nggal nàng lơh glài jăt di jơnau sồr. Tơngai do, tàm hìu ràng tăc phan geh uă làng bol gam lòt blơi phan nàng rê prăp nàng rơcăng sơndră kòp Covid-19, tài bơh nùs nhơm kơlôi rơcăng rơngòt ờ geh phan bơna tàm tơngai lơh jăt jơnau sồr ơm yah ngài mpồl bơtiàn jăt Chỉ thị sồ 15 bơh Chính phủ dê. Cục Ătbồ drà kă bro càr Dăk Lăk neh geh sră nggal sồr ală anih lơh broă gơwèt bal sơlơ lòt sền, gròi sền tai bañ lời gơlik geh jơnau prăp pồn phan, tơnguh giă gơwèt mờ ală bơta phan ngui sa kờñ pal geh.

Cau mblàng K’Hạnh mờ Lơ Mu K'Yến