VOV4.K’ho- Tàm ƀòn dờng Buôn Ma Thuột, càr Dak Lak tŭ do geh dùl tiah lơh sa mờ măy mok mờ 2 mpồl lơh sa mờ măy mok mờ pơgap 4 rơbô nă cau gam lơh broă. Tềng đap bơta gơlik geh kal ke bơh kòp dờng Covid-19, ală công ty, hìu măy halà anih lơh broă neh mờ gam lam lơh uă gùng dà broă lơh rcang sơndră kòp jat jơnau sồr bơh Dà lơgar dê kung bè ală tiah nàng kờñ gàr miam bơta ờdo ờdă ai cau lơh broă kung bè broă lơh sa kă bro.

Công ty Cổ phần lòs Đông Nam Á tàm tiah lơh sa mờ măy mok Hoà Phú, ƀòn dờng Buôn Ma Thuột càr Dak Lak geh rlau 600 nă Kuang bàng, công nhân viên mờ cau lơh broă gam lơh broă. Mò Lê Thị Tuyết Hạ - Phó Kuang atbồ dờng công ty đơs, lơh sa kă bro bơh mpồl lơh sa kă bro dê pơgồp bal mờ bơta ờdo ờdă rcang sơnrdă kòp, den jơnau sồr 5K bè gah lơh sơnơm dê geh lơh jat nền mờ lơh jat niam ngan tus tơl mpồl, mpồl lơh sa dê. Mò Lê Thị Tuyết Hạ đơs.

Sơn rờp là lơh jat jơnau sồr 5K bơh Bộ Y tế dê. Mờ công ty kung sồr jơh tơl nă cau lik mut tàm công ty sồr pal yal tiah lòt rê, lòt gan cơldŭ lơh kloh khuẩn; ai dùl mpồl nàng lơh broă mờ năc mờ dờp sră tăc phan, sră cơng tàng nàng pleh ală cau bơh tiah ngài ơm rềp mờ cau tàm công ty dê. Bơdìh hơ̆, bol añ gam lơh jat broă ai ơm yah ngài tàm pà bal lơh broă tàm ală gah sră nggal; hìu bềp sa bal den lơh kơlikcăng kơryan... nàng gàr niam broă rcang sơndră kòp geh cồng nha mờ gàr niam broă lơh sa.

Tiah ai ơm yah ngài rcang lài bơh mpồl lơh sa kă bro tàm mpồl lơh sa mờ măy mok Tân An 1

Ai Công ty TNHH Xuân Hòa sùm lơh gơlik phan cơ khí tàm Mpồl lơh sa mờ măy mòk Tân An 1, sơnah ƀòn Tân Lợi, ƀòn dờng Buôn Ma Thuột tŭ do geh mờr 100 nă cau lơh broă. Lơh jat broă rcang sơndră kòp kràñ ngan, công ty neh lơh cơl dŭ lơh kloh khuẩn tàm mpồng lik mut, ai cau ơm lơh broă sùm lơh broă đo was să jan, sồr tơl nă cau lik mut tàm công ty rào tê mờ dà lơh kloh khuẩn, bơto pơlam yal tiah lòt rê mờ gah lơh sơnơm, pà mờ sồr pơn chèu glòm muh mat; lơh tiah ai ơm yah ngài rcang sơndră lài mờ pah dơ̆ ndrờm ƀồm sơnơm lơh kloh khuẩn jơh gùt công ty. Mò Trần Thị Thanh Hoa – Kuang atbồ cau lơh broă Công ty Xuân Hoà pà gĭt, tơl nă cau lơh broă bơh mpồl lơh sa kă bro dê kung neh lơh jat nền tơl làm ală jơnau sồr rcang sơndră kòp tŭ rê mờ hìu bơnhă mờ ơm kis tàm ù tiah do dê. Mò Trần Thị Thanh Hoa đơs :

Bol añ sồr jơh ală công nhân tàm công ty tŭ jơh jiơ lơh broă den rê song tĕ tàm hìu, pleh ơm rềp tơm bơh bơr mờ uă cau tàm tơngai bè tŭ do, mìng lik bơh tàm hìu tŭ geh broă  kuơ ngan nàng gàr niam pràn kơl dang să jan mờ sùm geh cồng nha lơh broă.

Tàm ƀòn dờng Buôn Ma Thuột, càr Dak Lak tŭ do geh 106 mpồl lơh sa kă bro lơh broă tàm 2 tiah- mpồl lơh sa mờ măy mok tơrgùm bal, mờ pơgap 4 rơbô nă cau lơh broă.

Tơl nă cau mut lik tàm ală tiah, mpồl lơh sa mờ măy mok tàm ƀòn dờng Buôn Ma Thuột ndrờm lơh jat broă lơh kloh khuẩn tàm ơdŭ lơh kloh khuẩn

Jat ồng Đoàn Ngọc Thượng – Phó chủ tịch UBND ƀòn dờng Buôn Ma Thuột đơs, tềng đap bơta gơlik geh kal ke ờ gơtùi gĭt lài tài bơh kòp dờng Covid-19, ngan là kòp neh bơtờp tus tàm bàr pe tiah, mpồl lơh sa mờ măy mok tàm uă tiah tàm gùt lơgar dê, lơh hoàc huơr uă ngan, UBND ƀòn dờng neh sồr ală mpồl lơh sa kă bro tàm ù tiah càr dê mut lơh broă lơh rcang sơndră kòp tàm khà uă ngan rlau jơh. Crơng gơs mpồl bơyai lơh lòt sền, gròi sền jơh ală mpồl lơh sa kă bro, dilah sền gŏ mpồl lơh broă lơi lơh tìs broă lơh rcang sơndră kòp geh lơh glài kràñ. Bơh hơ̆, rcang lài sơndră wơl mờ jơh nùs lơh ngan uă ngan rlau jơh nàng gàr sùm lơh jat “broă lơh dơ̆ lĕ bal” bơtàu tơnguh lơh sa- mpồl bơtiàn mờ kung rcang sơndră kòp geh cồng nha. Ồng Đoàn Ngọc Thượng đơs:

Nàng lơh jat niam broă lơh rcang sơndră kòp Covid-19 geh cồng nha tàm tơngai tus tàm ală tiah, mpồl lơh sa mờ măy mok den lài ngan pal lơh jat niam broă lơh mblàng yal nàng ală mpồl lơh sa kă bro in lơh jat tơl làm ală broă lơh rcang sơndră kòp jat jơnau bơto sồr bơh Bộ Y tế dê. Atbồ niam khà công nhân gam lơh broă tàm ală công ty, UBND ƀòn dờng kung geh hời rơ hời sồr ală hìu măy, anih lơh broă ai tiah ơm rlô, tiah sa, tiah lơh broă tàm dùl tiah tơn ai cau lơh broă in dilah geh tơl bơta; sùm lòt sền ală rơndeh rơndồ pơn diang phan, ngan là cau măy rơndeh lòt tàm ală tiah kòp rê lơh jat broă pơn diang phan bơna tàm ală mpồl lơh sa kă bro dê.

Dơ̆ bơtờp kòp Covid-19 dơ̆ 4 do, Dak Lak neh geh 5 nă cau bơtờp mờ virus Sars CoV-2, tàm hơ̆ geh 4 nă cau kòp neh bời kòp mờ geh ai rê tàm hìu. Càr kung neh ai ơm yah ngài tơrgùm bal, ai ơm yah ngài tàm hìu sơnơm rlau 200 nă cau F1, ai ơm yah ngài tàm hìu rlau 20 rơbô 500 nă cau. Nàng tơrmù ƀà tus khà lơyah ngan rlau jơh bơta pơhìn  kòp Covid-19 bơtờp tàm uă tàm mpồl bơtiàn, bơh dơ̆ bơtờp kòp dơ̆ 4 tus tŭ do, ală anih lơh broă geh gơnoar neh tơrgùm jơh bơta pràn nàng jòi gĭt tiah lòt rê, căng tiah kơryan kòp mờ xét nghiệm ală cau geh gơrềng. Broă gàr niam rài kis ai ală hìu bơnhă gơtìp wàng se kơryan kòp in kung geh lơh mhar ngan.

Cau cih Tuấn Long- Cau mblàng K’Hạnh